7
Jesús‑ni diabie laní Jerusalén‑ni
1 Iki de nuha nna Jesús‑ni daka Galilea‑niba rekie. Labí raka lebie tsekie daka Judea, kumu ka nu loni ge ka benne Israel‑ni ruinkana uttikane.
2 Ttaka kumu de chi dabiga isia laní ge ka benne Israel‑ni nu tee láni Laní Ge Ka Yo'o Lhaga,
3 nianna tti ra ka betsieha bie:
―Bittu eya'anlu nii. Biria nna ugía daka Judea‑ni kini anágaba ka nu rudhetinlu se'e niha ilákinna ka nu xxeni ruinlu.
4 Kumu ttu nu raka leni iláni ka benne nu ruinna, labí gatsila tsekina uinna nuha. Laxkala lu ganna nuná ruinlu, bela'a nuná arlo ka benne.
5 Aníha ra ka betsieha bie kumu nigaba lakana a ria lekani gebie.
6 Jesús‑ni nna bekabie gekani, ree:
―Neti labí chi bisia ura kia tsiaya. Lebi'i bixaba ura aka lele tsiale.
7 Kumu ka benne labí tee ttu bixa ge itisikanie le. Netiligaba ritisikanie kumu de rigixxi'aya deki satsaba anka nu ruinke.
8 Lebi'i gwaltsia laní, neti labí dhaya kumu labí chi bisia ura kia.
9 Aníha‑ba rabie kana nna beya'anbe Galilea.
10 Ttaka iki de tti chi ugwapi ka betsieha diakana laní, nianna ugwapigabe diabie, ttaka labí die la loo, ttisidiba gatsiba die.
11 Ka nu loni ge ka benne Israel‑ni nna ugilabe rekikana lo laníha nna ra luesikani:
―¿Gála rekina ganna?
12 Gebe rinne iyába ka benne reki niha, nu raba: “Benne tseba ankana.” Adíkana nna rákana: “Labí ankana benne tse. Ruinba leni ki ridí yienna ka benne.”
13 Ttaka ni ttú ka benne rinneha labí reyaxakanie inneke gebie idisa, kumu rasibakanie ge ka nu loni gekeha.
Jesús‑ni rule'enie ka benne ka tisa ge Tata Do Yebáha ro'o yotuha
14 Ttiba salhe chi dia laníha, nianna tti ugwapi Jesús‑ni die ro'o yotuha nna uduloe rule'enie ka benne.
15 Ka nu loni ge ka benne Israel‑ni nna rebanabakinna, rákana:
―¿Gasina nna raka xxatta ge nuní, ki abígaba bedhetina?
16 Jesús‑ni nna bekabie gekani, ree:
―Laa nu anka kigaa nuní rule'a; nu anka ge benne udhelhe netiha‑ba nuní rule'a.
17 Benne raka lebie unie nu ru'u le Tata Do Yebáha, benneha nuha gwate danie ganna nu rule'a‑ni gwankana ge Tata Do Yebáha o nu anka kibaa nuní rule'a.
18 Nu rinnena nu anka gebani, ruinba nuha kini inná xxeni leni arlo ka benne; ttaka neti rinnea nu anka ge Tata Do Yebaa benne udhelhe netiha, benneha nuha runia kini ra xxeni lebie. Neti nuha rinnea nu anka gwalí, labí gwen lasi rinnea.
19 ¿Laaba ganna Moisés‑ni boka'ane bia bennabi ge Tata Do Yebáha len lebi'i? Ttaka nna niba ttúle a ruinle nu ra loni. ¿Beakala nna ruinlale uttile neti ganna?
20 Ka nu se'e niha nna bekabikana, rákane:
―Nu xxegwiha‑ba yu'u latilu. ¿Nú ruinna uttina lu?
21 Jesús‑ni nna bekabie gekani, ree:
―Iyábale uka tenle tti bilenle benia ttu milagru la sá tti reyaka leri'i.
22 Ki anágaba lebi'i meskiba raxxína sá reyaka leri'i, sinagaba nuha ruinle tti richúle lo bela lati ka nubiyú to gele; ruinbale nu bodha'an Moisés‑ni, meskiba laa kwinaga Moisés‑ni biria ikie ki uinle aní, sinuki ka xuttoleha‑liba chi dáke ruinke aní.
23 Ki lebi'i gwadú richúle lo bela lati ka nubiyú to gele tti risia ka sá reyaka leri'i. Ruinle aníha kini abittu rigu'u ni'ale bia bennabi bodha'an Moisés‑ni. Ki lebi'i ruinle aná, ¿beakala rise'enle len neti de chi beyonia ttu benne rani la sá tti reyaka leri'i, benneha nna chiba beyaka chábie?
24 Bittu iyubinle kuale bala'ana ge nu rilenle, sinuki gwalinneba attiba ankaba geni.
Ka benne rinnaba tisake ganna Jesús‑ni nuha anke Cristu
25 Nianna ra ttu chupa ka nu Jerusalén‑ni:
―¿Si laaba nuníba nuha ruinkana uttikana?
26 Gwaluyúruga la looba du nuní rinnena nna labí bixa rákana na. Laaruba ganna ka nu loni geri'i‑na chiba ridielhakana deki gwalíba nuní ankana Cristu nu chi ga'anani Tata Do Yebáha idhelhe.
27 Ttaka nuní gwa yúbari'i gá dana. Cristuha nna atti isie yiesi lo yu‑ni nna labí yuri'i gá daa benneha.
28 Jesús‑ni nna ro'o yotuha‑ba doe gwele'eni ka benne nna tti biyieninie nu rákanaha, nianna unnebie idisa, ree:
―Lebi'i gwankabiabinle neti lhe gwa yúbale gaxa anka lasia lhe, ttaka labí nu yu'u ikia benia kini daya. Benne udhelhe netiha, benneha anke benne gwalíga udhelhe neti. Lebi'i labí ankabienle benneha.
29 Neti nna gwankabiabatie kumu ata doeha‑ba biriaya daya lhe labe udhelhe neti lhe.
30 Nianna benkana udaxxukane, ttaka ni ttúkana a bedaxxukane kumu labí chi bisia ura gebie iyaxxue.
31 Laa kiga de nuha nna ixeba ka benne se'e niha ugía leke gebie, nianna ráke:
―Cristuha, tti isie, ¿si ixerula ka milagru uin benneha ttichula nu ruin benne‑ni?
32 Ka fariseo‑ni biyienbakinna nu rinne ka benne se'e niha ge Jesús‑ni, nianna lakana lhe ka nu loni ge ka bixxudiha lhe udhelhakana ka gwen sina ge yotuha kini sadaxxukane.
33 Jesús‑ni nna rabie kana:
―Attu sattiruba dhoa len lebi'i, iki de nuha nna eya'abaa ata do benne udhelhe netiha.
34 Nianna tti egilale neti, ttaka labí eselinle neti kumu ata esinaaha, lebi'i labí aka esiale niha.
35 Ka nu loni ge ka benne Israel‑ni nna rinnaba tisa luesikani, rákana:
―¿Gá ruin nuní eyyana nna abí saxxakari'i na? ¿Si tsiachuna ata se'eru ka benne geri'i lhe'e ka yiesi dittu‑na nna ule'egabinna ka nu dittu‑na ak?
36 ¿Bíla dienna innána tti rana: “Meskiba egilale neti nna labí eselinle neti” lhe tti rana: “Ata esinaaha, lebi'i labí aka esiale niha”?
Jesús‑ni rinnebie ge inda nu rute elha nabani ttu dia lii ge ka benne
37 Tti chi bisia sá lhuxa laníha, la sáha nuha anka laní xxeniru. La'ania udú lii Jesús‑ni nna unnebie idisa, ree:
―Ganna nuxa ttu le rebisile inda, teeki itale len neti kini i'iyale inda.
38 Attiba ra lo ka yetsi ge Tata Do Yebáha benne tsia lebie neti, lhe'e lastobie uxunni liiba inda nu rute elha nabani ttu dia lii gebie.
39 Ge Espíritu dhi ka benne tsia leke ge Tata Do Yebáha, ge benneha nuha rinne Jesús‑ni tti rabie aníha. Kumu axta la'ania labí chi uxí ka benne Espírituha kumu Jesús‑ni labí chi beyapie yebáha kini inná xxeni lebie.
Ka benne labí turo'o rinnekana ge Jesús‑ni
40 Tti biyienin ka benne se'e niha nu ra Jesús‑ni, nianna ra ttu chupake:
―Benne‑niligaba nna gwalí anke profeta benne chi ga'anna isiaha.
41 Adí ka benne nna ráke:
―¡Ko'o! Benne‑ni anke Cristu.
Ttaka adíke nna ráke:
―Galo iria benne anke Cristuha daka Galilea.
42 ¿Laaba lo ka yetsi ge Tata Do Yebáha rixxi'a ra deki benne anke Cristuha teeki aka benneha benne datiabie David‑ni nna teeki gali benneha lhe'esi Belén, daka ata uka lasi David‑ni?
43 Aníha uka nna delo ni'a ge Jesús‑ni nna ya yaba le rulaba le ka benne, labí turo'o rinneke.
44 Ttu chupakana nna ruinkana udaxxukane, ttaka ni ttúkana a beyaxakinna udaxxukane.
45 Ka nu rise'e gweyú ro'o yotuha, ka nu dia tadaxxukana Jesús‑ni, ka nuha beyekikana besinkana ata se'e ka fariseo‑ni lhe ka nu loni ge ka bixxudiha lhe. Ka fariseo‑ni nna rákana ka nuha:
―¿Beakala a dechele nuha?
46 Ka nuha nna bekabikana, rákana:
―Labí chetu na kumu lanú ttu benne chi biyienintu innebie tti rinnena.
47 Nianna tti bekabi ka fariseo‑ni gekani, rákana kana:
―Lebi'i, ¿si chigaba uxí yiena le?
48 Gwalinnáchu, ¿si nuxa ttu ka nu rinnabia geri'i‑na o nuxatu ttu ka fariseo chi ugía letu geni?
49 ¡Ko'o, labí! Ttaka ka nu rudo nagakani ge nuha, ka nuná labí yúkana nu ra lo bia bennabi bodha'an Moisés‑ni. Ka nuná ukinniba Tata Do Yebáha kana.
50 Nianna Nicodemo nu ankagabana fariseo, nu ugíana gwanne lena Jesús‑ni ttu lo rela, lana nuha rana adí ka fariseo‑ni:
51 ―Ki yule lo bia bennabi geri'i‑na rixxi'a ra deki labí aka geri'i ukinniri'i ttu benne ganna abíba lade'axa chi biyienin nagari'i bixa benie.
52 Nianna bekabikana geni, rákana:
―Lu nna, ¿si nu Galileagabalu? Begilaruga lo ka yetsi ge Tata Do Yebáha. Lo ka nuná labí rigixxi'a ra deki daka Galilea teeki iria ttu profeta ge Tata Do Yebáha.
Ttu nuila bexuinkinna na len ttu nubiyú
53 [Nuha‑ba rákana nna kua ttu ttubakana bodaxxu neda gekani deyya lisikani.