15
Ka anjeliha denke gasi loo ka elha disa ka nu uyú ka benne
1 Nianna tti bela'ati attu seña xxeni yebáha, ttu seña nu rebanabinri'i tti rilenri'i na. Lhe'e señaha bela'ati biria gasi ka anjeli denke gasi loo ka elha disa. Ka nuní ankakana elha disa ka nu chi daluxa ugwe Tata Do Yebáha ka benne, kumu len ka nuní chi ulhuxa loe elha rise'iki geeha.
2 Anágaba nna bela'ati ttiba ttu indatoo, iyya gwanaba raka loni chixxina gi nna bela'agabati ka benne udaake bese'eke lo nimala biria lhe'e indatooha lhe lo mentu geniha lhe. Ka benneha nuha abittu uxielhake tsia númeru ge lániha latike. Ka benneha se'eke ro'o indatooha denke ka arpa begwe Tata Do Yebáha ke
3 nna rulhake le'a bilha Moisés benne bixúe lo sina ge Tata Do Yebáha lhe rulhake le'a bilha benne anke Neru toha lhe, rulhake ráke:
¡Xxeniba anka ka nu ruinlu, lhe rebanabintu tti rilentu kana
xa Tata Do Yebaa benne ankalu Xxanatu!
¡Lu ankalu benne ra tsitsi xxatta lelu!
Nu dika ixúba ruinlu lhe ruinbalu nu ankaba gwalí lhe.
Lu ankalu benne rinnabialu ka yiesi se'e yiesi lo yu‑ni.
4 Iyá xeaba ka benne gatta elha rasi geke len lu xa Tata
lhe iyábake innáke: “Xxeniba ra lelu.”
Kumu sunruba lu ankalu benne nari xú, labí tulha ruinlu.
Ka benne se'e lhe'e iyába ka yiesi se'e yiesi lo yu‑ni,
itake nna udú xibike arlolu,
kumu chiba bilákanie ruinbalu attiba ankaba geni.
5 Iki de nuha nna bela'ati biyali yotu do yebáha, delába ata xua i'ina yu'u ka tisa bodha'an Tata Do Yebáha len ka benne Israel‑ni.
6 Lhe'e yotuha biria gasi ka anjeli denke gasi loo ka elha disa, delába ka elha disa uyú ka benne. Ka anjeliha nna nukuke ka lari sibi ankakana nari xú lhe raka lhalhaba lokani lhe. Ro'o lastoke nna di ka yieti ankakana taga'a ge oru.
7 Ttu ka nu ttapa anka baniha, delába ka nu rula'a ttiba rule'e ka nimalaha, ttu ka nuha begwena ka anjeliha ttu ttu ka copa ge oru saa tíbakana elha rise'iki ge Tata Do Yebaa benne anka banie ttu dia liiha.
8 Lhe'e yotuha bisá tí seni ge nu xxeni ra le Tata Do Yebáha lhe nu tsitsi ra leeha lhe. Laxkala lanú aka geni ga'ana lhe'e yotuha axtaliba ganna chi gwate ka benne iyába gasi loo ka elha disa ka nu ugwe gasi ka anjeliha ke.