18
Bise'e looba yiesi Babiloniaha
1 Iki de nuha nna tti bela'ati attu anjeli re tsitsi lebie ugwadie yebáha dabie nna xien charába bele'e bedani nu xxeni ra leeha yiesi lo yu‑ni
2 nna unnebie idisa, ree:
―¡Chiba biginni Babiloniaha, delába yiesi nu ra xxeni leniha! Nnanna nna chiba beyakana lisi ka nu xxegwiha lhe chiba beyakana ata reta'a ka espíritu satsaha lhe ata reta'a iyába ka nu sia xxilakani, delába ka nu ankakana tsiga arlo Tata Do Yebáha lhe anágaba rixxini ka benne kana.
3 Kumu ka benne se'e lhe'e iyába ka yiesi se'e yiesi lo yu‑ni, chiba biyietike ruinke nu satsa ruin yiesi ra xxeni leniha, delába chi bedhá ikike Tata Do Yebáha nna bedú xibike arlo ka diosi ka nu subi subi. Lhe anágaba ka nu rinnabia se'e yiesi lo yu‑ni bengabakana nu satsa len yiesiha nna ka nu reki gwetto'oha nna chi utta xxatta gekani de rutto'okana len yiesi Babiloniaha iyába nu raka leni.
4 Delola nna biyienti tsi'i attu benne yebáha unnebie, ree:
―Gwaliria lhe'e yiesi‑na, lebi'i ka benne chi ankale kia, kini abittu iselale uinle nu satsa ruin yiesi‑na nna satele ka elha disa ka nu satena‑na.
5 Kumu chiba ugwani xxatta tulha ruin yiesi‑na nna nu ruinnaha chiba bisinna axta yebáha. Tata Do Yebáha nna chi bebeki lebie ugwebie na elha disa ge nu satsa ruinnaha.
6 Gwalodeki geni, gwaludhaka na attiba bedhakana leha. Chupa‑la luesi nuha, gwalodeki geni. Nu ilhá uta'ana begi'ana leha, adírula ilhá gwaleyoin nuha gwalogi'a na.
7 Ttiba benna ttaba lhe utitta tábana nu tee geniha, aníha‑gaba gwalugwe na elha disa tsitsi lhe gwaluni kini eleni xxattinna. Kumu yiesiha lhi'u leni rulaba leni rakinna: “Neti ttiba ttu nuila rinnabia ankaa doa. Labí ankaa nuila bidabi lhe nigaba kwesia de elenti.”
8 De nuha nna sun lhe'e ttu sába isia elha disa ge yiesiha: isia elhutti geni lhe eleninna lhe gattina ubina lhe itena lo giha lhe, kumu Tata Do Yebaa benne anke Xxanari'iha unie elhuxtisi geni kumu tsitsi ra le benneha.
9 Ka nu rinnabia se'e yiesi lo yu‑ni, ka nu bisákana naha lhe bedí baakana lenna iyába nu uka lekani, ka nuha kwesikana lhe elenkinna tti ilákinna seni geni itena lo giha.
10 Idittuliba tse'ekana de elha rasi ge nu sate yiesiha, nianna tti innákana:
―¡Gwalíchiru lelu xa Babilonia nu ra xxeni lelu, lhe ra tsitsi lelu lhe! ¡Karusi'irulu! Ttu nnelaba bisia elha disa tsitsi gelu.
11 Ka nu reki gwerixxi se'e yiesi lo yu‑ni nna kwesigabakana lhe elenigabakinna ge yiesiha kumu lanúru go'ona nu rutto'okanaha.
12 Rutto'okana oru lhe plata lhe ka íyya ragalha ka nu daka xxatta lhe ka perla lhe. Anágaba rutto'ogabakana ka lari tse ka nu tee lákani lino lhe seda lhe ka lari xiná chulha lhe ka nu xiná tú lhe. Rutto'ogabakana iyá looba ka yaga rure ixixxi lhe iyába nu anka ge marfíl lhe nu anka ge yaga lhe nu anka ge bronce lhe mármol lhe.
13 Anágaba nna rutto'ogabakana canela lhe yala lhe iyá looba nu rure ixixxi lhe vinu lhe seti lhe yiedi lhe xua lhe ka ku'una lhe ka neru lhe ka kwayu lhe ka carreta, lhe anágaba axtala ka benne rutto'okana.
14 Nianna tti gákana yiesiha:
―¡Iyába nu tse ridá leluha, garua daa nuha! ¡Ttu tsaba chi bennittilu ka nuha lhe iyába ka nu daka xxatta ru'u leluha, ttu tsaba labíru dhilu ka nuha!
15 Ka nu rutto'oha, ka nu chi tee xxatta gekaniha de rutto'okana lhe de ro'okana len yiesiha, idittuliba tse'ekana de gasikinna ge elha disa tsitsi sate yiesiha nna kwesikana lhe elenkinna lhe.
16 Nianna tti innákana:
―¡Gwalíchiru le yiesi ra xxeni len‑na, yiesi nu rukuna ka lari tse, lhe ka lari xiná chulha lhe ka lari xiná tú lhe! ¡Lana raka galhaba latini ka oru, ka íyya ragalha ka nu daka xxatta lhe ka perla lhe! ¡Karusi'iruna!
17 ¡Ttu nnelaba bise'e lo iyá elha tse tee geniha!
Ka nu rinnabia lhe'e ka barcuha lhe ka nu riben sina lhe'e ka nuha lhe, anágaba ka nu redá lhe'e ka barcuha lhe iyába ka nu riben sina lo indatooha lhe, iyába ka nuha idittuliba tse'ekana
18 ilákinna tsapi seni ge yiesiha ritena. Nianna innekana idisa, innákana:
―¡Lanúru attu yiesi xxeni luesi nuná re!
19 Nianna tti begadi tee ikikani nna ribesikana idisa lhe relenkinna, rákana:
―¡Gwalíchiru le yiesi ra xxeni len‑na! ¡Karusi'iruna! De tee geni nna iyába ka nu se'e barcu gekinna, utta gekani de ugwekikana gwerixxi lenna. Nnanna nna ttu nnelaba chi bise'e loona.
20 ’Gwaledeakinle geni, lebi'i ka nu se'ele yebáha, lhe gwaladeakinle, lebi'i ka nu chi ankale ge Tata Do Yebáha, lhe anágaba lebi'i ka apóstol lhe ka profeta lhe gwaledeakinle kumu gele nuná chi bokixa Tata Do Yebáha yiesi‑na tti begwebie na elha disa‑na.
21 Nianna ttu anjeli ra xxeni lebie bedaxxue ttu íyya. Ankana ttiba ttu íyya xxeni ge mulinu nna bekinnie nuha lhe'e indatooha nna rabie:
―Aníba iginni Babilonia yiesi nu ra xxeni leniha, nna ttu tsaba tse'e loona labíru eselana.
22 Xa Babilonia, lo ka neda gelu‑na labíru iyieni ulha ka benne lhe nigaba udhesike lo ka arpa, nigaba ukwesike ka flauta lhe nigaba ka trompeta lhe. Lanúrugaba ka nu runi iyá looba sina tse'eru, lhe nigaba iyieniru tsi'i ka mulinu kwenkana gwesi'i xuxtila lhe.
23 Ka rela‑na labíru uden xiani ge ka gi lo ka neda gelu‑na, lhe nigaba iyienru elha gwedeaka lasi ge ka dha'a raka lagwi gelu‑na. Aníha aka kumu ka nu lhe'esi geluha ka nu reki gwetto'oha, ka nuha ukakana nu uná xxeni lekani yiesi lo yu‑ni nna bixúkinna elha gwesá gelu‑na ki uxí yiekana ka benne se'e lhe'e iyába ka yiesi se'e yiesi lo yu‑ni.
24 Lo ka neda gelu‑na bitabi reni ge ka profeta ge Tata Do Yebáha lhe bitabi reni ge ka benne chi ankake gebie lhe anágaba bitabigaba reni ge iyába ka benne chi bettikana yiesi lo yu‑ni.