22
1 Nianna tti bele'en anjeliha neti ttu yoo ridá inda lhe'eni. Inda ridá lhe'e yooha ruinna kini aka ben ka benne ttu dia lii. Iyya gwanaba raka loni de ankana yaa xú. Ririana ata du xxila ata do Tata Do Yebáha rinnabie lhe ata do benne anke Neru toha lhe.
2 Yooha tena lagwi neda xeni tee lhe'e yiesiha nna abi'iba ro'o yooha daa ka yaga ka nu rutekana elha nabani ge ka benne ttu dia lii. Tsi'inu (12) lidú runna ka yagaha nu xixxi lhe'e ttu ida, daa beoba ribia gekani. Lhaga ge ka yagaha ixúna kini aka ramedi ka benne se'e lhe'e ka yiesi se'e yiesi lo yu‑ni.
3 Lhe'e yiesiha labíru aka nu satsa nu abittu ru'u le Tata Do Yebáha, kumu niha du xxila ata do Tata Do Yebáha rinnabie lhe niha do benne anke Neru toha lhe, nna ka benne rixúke lo sina ge Tata Do Yebáha, ka benneha‑ba udú xibike arloe.
4 Niha ilákanie kwinaga Tata Do Yebáha nna tsia lábie lo xeake.
5 Niha labíru aka rela lhe labíru iyasa gi lhe, nigaba xiani ge tatubisa‑na, kumu Tata Do Yebaa benne anke Xxanari'iha, labe udenie geke. Ka benne udenie gekeha, ka benneha nuha innabiake ttu dia lii.
Jesús‑ni rabie: “Chi tte esiaya”
6 Nianna tti ra anjeliha neti:
―Ka tisa‑ni ankake nu gwalí lhe ankake nu dika uxxen leri'i geke lhe. Tata Do Yebaa benne anke Xxanari'iha, delába benne runie ki rinne ka profeta geeha nu raka lebie una ka benne. Neti benne ankaa anjeli geeha udhelhe neti kini ule'enia ka benne rixúke lo sina geeha nu chi tte dabiga aka.
7 Jesús‑ni ree:
―¡Chi tte esiaya! Karubáru ka benne udoke tisa ge nu dia lo yetsi‑ni, delába ka tisa chi rigixxi'ake ge nu si aka.
8 Neti Juan, ankaa benne biyienti lhe bela'ati iyá nuní nna tti bela'ati lhe tti biyienti iyá nuní, nianna bedú tteba xibia arlo anjeliha, runia utsá loa bie.
9 Ttaka benneha nna ree neti:
―¡Bittu uinlu aná! Kumu neti ankagabaa benne rixúni Tata Do Yebáha ttiba lu lhe ttiba ka betsi to geluha lhe, delába ka benne ankake profeta geeha lhe anágaba neti ankagabaa ttiba ka benne rudoke tisa ge nu dia lo yetsi‑ni. Lu arlo Tata Do Yebáha‑la bedú xibilu nna betsá lolue.
10 Nianna tti rabie neti:
―Bittu ukatsilu ka tisa dia lo yetsi‑ni, delába ka tisa rigixxi'akana ge nu si aka, kumu chi tteba aka nu ra ka tisa‑ni.
11 Begwelha nu ruin tulhaha, uinruna tulha nna nu ruin nu satsaha, uinruna nu satsa lhe begwelha nu ruin nu dika ixúha, uinruna nu dika ixú nna nu chi biriesina ki akana ge Tata Do Yebáha, aníha‑bala riesina ki satíaba akana gebie.
12 Jesús‑ni ree:
―Chi tte esiaya. Neti dechea nu ralha ttu ttule dhile kua nu benbale.
13 Neti ankaa benne riduloa lhe ankaa benne rulhuxa looa lhe.
14 Karubáru ka benne rigí xoke ki akake nari xú arlo Tata Do Yebáha kini tee lo neda geke esinke goke nu xixxi ge yagaha, delába yaga nu rutena elha nabani geke ttu dia lii lhe kini aka eta'ake ro'o ka puerta ge yiesiha lhe.
15 Ttaka ka nu ruinkana nu anka tsiga lhe ka nu ruin elha gwesá lhe ka nu risákana nu subi subi lhe anágaba ka nu runi elhutti lhe ka nu rudú xibikani arlo ka nu labí gwalí ankakana diosi lhe anágaba ka nu ru'u lekani rinnekana gwen lasi lhe, iyá ka nuná labí eta'akana lhe'e yiesiha.
16 ―Neti Jesús, udhelhaa anjeli kia‑ni kini kixxi'anie le nuní, lebi'i ka benne chi ria lele neti. Neti ankaa benne datiaya David lhe ankaa beli riria ka dila‑na lhe.
17 Espíritu ge Tata Do Yebáha lhe nuila ge benne anke Neru toha, ráke bie:
―¡Utá!
Anágaba ka benne iyienkanie nu ra ka benne‑ni, innágabake:
―¡Utá!
Nna iyába ka benne ebisike inda lhe aka leke i'iyake indaha lhe, itake nna kwentaba i'iyake indaha, delába inda nu uinna kini aka benke ttu dia lii.
18 Iyábale ka benne riyieninle ka tisa dia lo yetsi‑ni, delába ka tisa rigixxi'akana ge nu si aka, neti upeya le: ganna nuxa ttúle udienle iki ka tisa‑ni, Tata Do Yebáha ugwebie le ka elha disa ka nu dia lo yetsi‑ni
19 nna ganna nuxa ttúle kuale iki ka tisa dia lo yetsi‑ni, anágaba Tata Do Yebáha labí ugwelhe le gole nu xixxi ralhale gole ge yaga nu utena elha nabani gele ttu dia lii lhe labí ugwelhe le eta'ale lhe'e yiesi le'a geeha lhe. Lo yetsi‑ni rigixxi'a iyá nuní.
20 Jesús benne rigixxi'e nuní rabie:
―¡Netiru ria, chi tte esiaya!
Amén. ¡Betá, tata Jesús benne ankalu Xxanatu!
21 Jesús benne anke Xxanari'iha edá lebie aka lenie iyá ttele. Amén.