3
Mulungu Komkema Musa
1 Musa kakala yowachunga menhe na ng'hondolo wa mkwe yake yakemigwe Yeslo, mkulu wa nhambiko wa isi ya Midiani, kadilongoza dale jake kachola kutali ng'hani kuluwala mbaka Holebu, kuna idigongo da Mulungu.
2 Viyavikile haja, msenga wa MNDEWA wa kuulanga kamulawilila mmoto ukwaka mkitutua. Musa kalola mkukanganya avija kija ikitutua vukikalile kikwaka moto ila hakilukule.
3 Abaho Musa kalonga, “Beta nikwenhuke, nikalole mbuli ino ya mkanganyo, habali kino ikitutua hakilukula.”
4 MNDEWA viyonile kamba kachola haja kulola, Mulungu kamkema kulawa haja mkitutua, “Musa! Musa!”
Na Musa kedika, “Nie hano.”
5 Mulungu kamulongela, “Sambiukwenhuke, vula ng'hwabasa zako, kwavija hanhu aho hawimile hang'ala.
6 Nie iyo Mulungu wa wahenga zako, Mulungu wa Ablaham, na Isaka, na Yakobo.” Musa viyahulike vino, kagubika kihanga chake, kwavija kadumba kumulola Mulungu.
7 Abaho MNDEWA kalonga, “Niyona migayo iwopata wanhu zangu muisi ya Misili, niwahulika vowolila sama ya waja wowagaza. Niimanya migayo yao yose,
8 avo nihumuluka hasi kuwakombola kulawa mmakono ga Wamisili, na kuwalava muisi ija, na kuwagala kuisi inogile ili na ugazi, isi ili na lutuba na ugoli, isi ya Wakanaani, Wahiti, Waamoli, Wapelizi, Wahivi, na Wayebusi.
9 Kililo cha Waislaeli kinivikila, vivija nyona vija Wamisili vowowagaza.
10 Avo izo, nikutume ha Falao, ukawalave wanhu zangu, Waislaeli, wasegele muisi ya Misili.”
11 Ila Musa kamulongela Mulungu, “Nie iyo yalihi, mbaka nichole ha Falao nikawalave Waislaeli wasegele muisi ya Misili?”
12 Mulungu kalonga, “Nie nowa hamoja na gweye, na uhawalava wanhu kulawa muisi ya Misili, monitambikila nie hana idigongo dino. Kino chowa kilaguso kamba nie iyo nikutumile.”
13 Ila Musa kamulongela Mulungu, “Kamba nihachola ha Waislaeli na kuwalongela, ‘Mulungu wa wahenga zenu kanhuma kumwenu,’ na kamba wahaniuza, ‘Twaga jake dijo dilihi?’ Niwalongeleze?”
14 Mulungu kamulongela Musa, “NIE IYO NIE. Vino vivo vondauwalongele Waislaeli, ‘NIE kanhuma kumwenu.’
15 Vino vivo vondauchole kuwalongela Waislaeli, ‘MNDEWA, Mulungu wa wahenga zako, ayo yali Mulungu wa Ablaham, na Isaka, na Yakobo, kanhuma nie kumwenu. “Dino dijo twaga jangu mazua gose, twaga dondanitambulwe kulawa mulelo umwe mbaka mulelo uyagwe.” ’
16 Genda ukaiting'hane na wakulu wa Islaeli uwalongele kamba MNDEWA, Mulungu wa wahenga zao, ayo yali Mulungu wa Ablaham, na Isaka, na Yakobo, kakulawilila na kukulongela, ‘Niwalola na nigona gaja gomtendeligwa muisi ya Misili.
17 Na nie nika kilagano cha kuwasegeza mweye kulawa mmigayo yenu muisi ya Misili na kuwagala muisi ya Wakanaani, Wahiti, Waamoli, Wapelizi, Wahivi, na Wayebusi, isi ili na lutuba na ugoli.’
18 “Wakulu wa Islaeli wokutegeleza. Abaho gweye hamoja na iwakulu molondigwa mchole ha mndewa wa Misili, na kumulongela, ‘MNDEWA, Mulungu wa Waeblania, katulawilila. Avo tuleke tuchole mwanza wa mazua madatu muluwala, tukalave nhosa ha MNDEWA Mulungu wetu.’
19 Ila nivimanya kamba mndewa wa Misili hadaha kuwaleka mweye mchole kamba mkono wangu wene mhiko haumshulutize kutenda avo.
20 Avo nougolosa mkono wangu na kuwatoa Wamisili na vinhu bwando va mikanganyo vondanivitende mmwao. Abaho kowaleka mweye mchole.
21 “Na nie nowatenda Waislaeli watogoligwe na Wamisili, wowagwelela vinhu kipigiti vondamsegele, avo hamsegela bila kinhu.
22 Kila mtwanzi wa Kiislaeli yapule vinhu va kuihamba va madini ga feza na zahabu na vivalo vinogile kulawa mwa Wamisili wokala behi nao, na kulawa mwa watwanzi wokala mzing'anda za wanhu wa habehi yao, vinhu vino vondamuwapule Wamisili mowavaza wanenu wa kimbigalo na wa kitwanzi na mowabokonya Wamisili ugoli wao.”