32
Yakobo Koisasala Kuiting'hana na Esau
1 Yakobo kagendelela na mwanza wake, na wasenga wa Mulungu wa kuulanga waiting'hana nayo.
2 Yakobo viyawawene kalonga, “Ino iyo ng'hambi ya asikali wa Mulungu.” Avo kahakema hanhu haja Mahanaimu.
3 Avo Yakobo kawatuma wasenga wamulongole wachole ha Esau, mkulu wake, ako Seili muisi ya Edomu.
4 Kawagwelela ndagizi, yolonga, “Mulongeleni mndewa wangu Esau mbuli zino, ‘Mtumigwa wako Yakobo kolonga, “Nikala na Labani na kusigala haja mbaka lelo.
5 Nna ng'ombe, mhunda, madale ga ng'hondolo na menhe, nyakadala wakitwanzi na wakimbigalo. Nokugalila usenga uno, mndewa wangu, mhate ngekewa haulongozi wako.” ’ ”
6 Abaho waja iwasenga viwabwelile wamulongela Yakobo, “Tuchola ha mkulu wako Esau, na heyo kokwiza kukubokela yali hamoja na wambigalo mia nne.”
7 Yakobo kadumba ng'hani na kudungwadungwa. Avo kawagola wanhu iyali nao, ng'hondolo, menhe, na ngamia mmadale mabili.
8 Yakobo kagelegeza, yolonga, “Kamba Esau yeheza na kudivamhila dale dimwe, dale diyagwe dosigala.”
9 Abaho Yakobo katambika, yolonga, “Mulungu wa muhenga wangu Ablaham na Mulungu wa tataangu Isaka, MNDEWA, gweye unilongele nie nibwele muisi yangu na ha ndugu zangu, na kunongela konhendela ganogile.
10 Nie silumbile kutendeligwa unhu wose na kuwabule uzenzeleganye kuundagusile nie mtumigwa wako. Niloka Lwanda lwa Yolodani bila kinhu ila fimbo iiyeka na sambi nobwela na madale gano mabili.
11 Nokutambikila, nikombole kulawa mmakono ga mkulu wangu Esau, nodumba siku kokwiza kunivamhila nie na watwanzi zangu hamoja na wanangu.
12 Ila gweye kunongela kamba, konhendela ganogile mmbuli zangu zose, na kulongeza lukolo lwangu mbaka vondaluwe bwando kamba misenga ya mumgwazo wa ibahali vuileka kudahika kupetigwa.”
13 Ikilo ija Yakobo kawasa haja, na kasagula nhunza ya kumgwelela Esau mkulu wake kulawa m'vinhu vayakalile navo,
14 bogwa wa menhe mia mbili (200) na songolomi wa menhe malongo mabili (20), bogwa wa ng'hondolo mia mbili (200) na songolomi wa ng'hondolo malongo mabili (20),
15 ngamia malongo madatu (30) wokong'heza hamoja na wana zao, bogwa wa ng'ombe malongo mane (40) na songolomi longo dimwe (10), na bogwa wa mhunda malongo mabili (20) na songolomi longo dimwe (10).
16 Kawagola waja iwang'onyo mmadale na kila dale kamwika mtumigwa wake imwe kuwa kilangizi wa ididale. Abaho kawalongela waja iwatumigwa, “Longoleni na wano iwang'onyo ila ikeni nafasi kulawa dale dimwe mbaka dale diyagwe.”
17 Kamulagiza ija yalongole, yolonga, “Uhaiting'hana na mkulu wangu Esau na yahakuuza, ‘Gweye kwa mtumigwa wa munhu yalihi? Kwahi kuuchola? Na wang'onyo wano walongole wa munhu yalihi?’
18 Gweye mulongele, ‘Wang'onyo wano wa mtumigwa wako Yakobo, wano iwo nhunza iyomgalila mndewa wake Esau, na heyo ka kuchugu kokwiza.’ ”
19 Vivija kamulagiza imtumigwa wa ikabili na wa ikadatu na wose wakalile vilangizi wa igamadale. “Vino vivo vondammulongele Esau kipigiti vondamuiting'hane nayo.
20 Na mmulongele, ‘Mtumigwa wako Yakobo kokwiza kuchugu chetu.’ ” Yakobo kagelegeza, kalonga, “Nomuhoza na nhunza zino zinimulongozela, siku nahaiting'hana nayo, konibokela.”
21 Yakobo kazilongoza izinhunza, na heyo mwenyego kasigala haja hang'hambi ikilo ija.
Yakobo Koifida na Msenga wa Mulungu wa Kuulanga
22 Ikilo iija Yakobo kalamuka na kawasola watwanzi zake wabili, watwanzi zake wabili wa kunze, na wanage longo dimwe na imwe, abaho kaloka Lwanda lwa Yaboki.
23 Viyeshile kuwalosa, kalosa na vinhu vose viyakalile navo.
24 Avo Yakobo kasigala yeiyeka.
Abaho keza munhu, kasonga kuifida nayo mbaka imitondo.
25 Ija imunhu viyonile kolemelwa kumuhuma Yakobo, kamkwasa mdipengene viwakalile wokiifida, na idipengene disiguka.
26 Abaho ija imunhu kamulongela Yakobo, “Ndekesa nyhole, kwavija usiku ocha.”
Ila Yakobo kamulongela, “Sikulekesa mbaka vondaunimoteze.”
27 Ija imunhu kamuuza, “Twaga jako dijo dilihi?”
Kamwidika, “Twaga jangu Yakobo.”
28 Abaho ija imunhu kamulongela, “Songela sambi hukemigwa kabili Yakobo, ila kokemigwa Islaeli, kwavija kuifida na Mulungu hamoja na wanhu, na kuhuma.”
29 Yakobo kamulongela, “Nongela twaga jako.”
Ila heyo kamuuza, “Habali uniuza twaga jangu?” Abaho kammoteza.
30 Avo Yakobo kahakema hanhu haja Penueli, kalonga, “Kwavija nimona Mulungu kihanga kwa kihanga, na ning'hali mgima.”
31 Zua vidisongile kulawa, Yakobo kasegela Penueli kuno yodendegulila sama ya pengene jake.
32 Avo mbaka lelo, Waislaeli hawaja nyama ya pengene, kwavija pengene da Yakobo dikwasigwa behi na kigudi chake.