☰ 1 Petero 5
5
Okuriibha abhaatu bha Taatabhugya
1 Bhoono niragaamba neemwe abhakaruka bhe ekanisa. Enye ni mukaruka omurikyeenyu, niruuzi kwa meeso gaane kyeego Krisito yanyaakiibhwe. Kweeki, ndiigwaatania mubhuguungo bhuno bhuraarorekane. Kweego nirabhiisasaama emwe, 2 mubhe abhariisya abhazomu bhe ekanisa yino mukahaabhwa na Taatabhugya. Kweeki muyiriibhe kwe ekoro nzomu, nawe etari kwo okuhatikwa. Mutakora emirimo gyeenyu kwe enaamba ye eziimbirya, nawe kwe ekoro yo omukya. 3 Mutabha abhariisya abhabhaandirirya kubhano muheerwe okubhakaangata, nawe obhwiikari bhweenyu bhubhe ekireengyo kizomu kweebho. 4 Yeesu Krisito niwe Omuriisya Omukuru we ekanisa, hano araarorekane kubhweero, murasaambirwa esaambo yo obhuguungo bhuno bhutana obhuteero.
5 Egoego neemwe abhamura, mubhasuuke abhakaruka. Neemwe mwoosi mureenderwa kubha abhanyoohu na bho okusakirania na abharikyeenyu. Mukore ego, kwo okubha Amakaamo Amahoreeru garabhuga,
“Taatabhugya ahaabhaanga bhano bhakwiigega,
nawe, ahaabhaha abhanyoohu orubhaango.”*
6 Ambe, mubhe muriiyiikya iyaasi wo obhunagya bhwa Taatabhugya, neewe arabhatiirya eriibhaga ryaaye hano riraahike. 7 Mumutigire Taatabhugya eziinyaako zyeenyu zyoosi, kwo okubha ewe arabhatuga.
Okumwaanga Seetaani kwo okumwiikirirya Taatabhugya
8 Muteengeeze, na mubhe meeso eriibhaga ryoosi, kwo okubha omubhisa weenyu, Seetaani,† arageendageenda kyeego endwi yino ekuruma, erageendageenda ekomye omuutu, emurye. 9 Ambe, mumwaange Seetaani, mwiimeerere tiri kwo okumwiikirirya Taatabhugya. Mumenye kubha, abhiikirirya abharikyeenyu mukyaaro hoosi, bharanyaakibhwa kyeego emwe.
10 Taatabhugya arabhaha orubhaango rwoosi! Akabhabhirikira emwe, okubha mugwaatane neewe mubhuguungo bhwaaye bhwa kirakeego, hamwe na Krisito. Hano mukunyaaka kwiibhaga iguhi, nawe ewe omweene arabhagumirya, arabhaha eziinguru no okubhamenyeekererya. 11 Taatabhugya abhaahe kirakeego! Gabhe ego.
Amangʼana go okuraga
12 Nibhakaamiiri enyaarubha enguhi yino, kwo obhusakirya bhwa Sirwano.‡ Enye nimumenyiri bhuzomu, kubha ni muheene. Amiiseego gaane ni kubhatoongera ekoro no okubheerekya, amangʼana gano ni rubhaango rwe eheene rwa Taatabhugya. Kutuukana no orubhaango ruyo, mwiimeerere tiri! 13 Abhiikirirya bhe ekanisa yino eri Babeeri,§ abhasorwa abharikyeenyu, bharabhakeerya. Na Mariko woosi, omwaana waane mubhwiikirirya, arabhakeerya. 14 Mubhakeerye abhiikirirya bhoosi kwo obhuseegi bhwa Krisito.*
Abhiikirirya bha Krisito, omureembe gubhe hamwe neemwe.
* 5:5 Rora Eziimetari 3:34. † 5:8 Seetaani. Rora engʼana yino mu Bhugaruri bhwa Amangʼana Amakongʼu. ‡ 5:12 Sirwano arabhirikirwa Siira mukitabhu kya Amahokya ga Abheega. § 5:13 Babeeri ni riina rino abhaatu abhaandi bhaari bhararihokeerya okutiga okutogora omugye gwa Rooma. * 5:14 Mubhakeerye abhiikirirya bhoosi kwo obhuseegi bhwa Krisito ku Kiyunaani ni Mukeerenie kwo okwiihuumbata kwo obhuseegi. Okwiihuumbata kwo obhuseegi, ni tuubho yo obhukeerya ye Ekiyahudi.
☰