11
Yalguth chaan Las
1 Ngoo thib mbyi kuu le Las kuu mzhak ne, ne btan Las nak Mari ne Mart, zha yez Betania nak re zha.
2 Ne Mariʼa, nak zha mxo perfum kuu chul ndetsi nii Jesús Zha Nabee, ne mtekwiiz Mariy kon yitsek Mari.
3 Tsa mtaal rop bel ngot thib zha ngwa ngwane lo Jesús ne nzhab:
―Zha Nabee, lee amiga Las kuu kwathoz nke leettsooʼa ne ndak.
4 Or mbin Jesús kona, tsa nzhab Jesús:
―Lee yiza nagt kona par gath Las, sinke leey nak par loo yalnabee chaan Diox, ne noga looy yalnabee chaan Xgann Diox.
5 Ne kwathoz nke leettsoo Jesús Mart, bel Mart ne btan Mart Las,
6 or mbin Jesús lee Las ne ndak, mletka Jesús ta ndo Jesús techop wiz.
7 Tsaraa nzhab Jesús lo re zha kuu ngeteed lo Jesús:
―Nda goo reʼaa tedib welt yezlyu Judea.
8 Tsa nzhab re zha lo Jesús:
―Lo nal lee re zha Israel kuu nzo yezlyuʼa, ngwalaaz gagutha kon ke, ne nal nlaaza lu yaʼa tya tedib welt.
9 Tsa nzhab Jesús:
―¿Chu nagt tsiibchop or nak thib wiz? Os lee thib zha tiy zha tse, yent kwan ral nii zha, tak nteni xni wiz lo zha,
10 per os lee zha tiy zha yaal, teral kuu nii zha, tak yent xni kuu teni lo zha.
11 Ngwalo nzhab Jesús kona, noga nzhab Jesús:
―Lee amigaa Las naxat, per nal yan yalitchen Las.
12 Tsa lee re zha kuu ngeteed lo Jesús nzhab:
―Zha Nabee, os lee zha naxat zha, tegwe zha.
13 Lee Jesús ngwalaaz gagab lee Las nguth, per lee re zha kuu ngeteed lo Jesús mtsow xgab naxat Las.
14 Tsaraa nambi nzhab Jesús lo re zha kuu ngeteed lo Jesús:
―Ngutha Las.
15 Ne kwathoz lazʼn tak mndotaa tya, tak tabaa mas wen par goo, tsa yelaaz gooy. Nda goo reʼaa lo Las.
16 Tsa lee Mach kuu ni zha “kwach”, nzhab lo tedib net re zha kuu ngeteed lo Jesús:
―Nda goo reʼaa, tsa noga lee gathaa kon lee zha.
Jesús nak yalndroban ne yalnaban
17 Ne leettsa mzin Jesús yez Betania, mne Jesús lee Las ndaʼa thap wiz mgaats.
18 Ne gax yez Jerusalén nzi yez Betania, teeka tson kilometro.
19 Ne kwathoz re zha Israel kuu nzo Jerusalén nzi tya, ngwa ngwatetsey leettsoo Mart ne Mari, tak nguth Las btan rop zha.
20 Or mbin Mart lee Jesús ndetsin tya, tsa mroo Mart mkayaa Mart Jesús, per lee Mari myaanka yuu.
21 Tsa nzhab Mart lo Jesús:
―Zha Nabee, os leeʼa gatoʼa nzhee gagatht btan na.
22 Per tegal nalraa ndoʼa nzhee, nen tetsow Diox kuu naaba lo Diox.
23 Lee Jesús nzhab lo Mart:
―Lee btana teroban.
24 Tsa lee Mart nzhab:
―Wliy, neʼa na lee btan na roban wiz kuu roban re zha nguth, leettsa gak wiz bluz.
25 Tsa nzhab Jesús lo Mart:
―Na nak yalndroban ne yalnaban. Loka zha kuu yelaaz na, tegal gath zha taban zha,
26 ne reta zha kuu naban ne nyelaaz na, thitanax gatht zha. ¿Chu nyelaaza koree Mart?
27 Lee Mart mkab ne nzhab:
―Nyelaz nay Zha Nabee. Ne, nen lee Lu Nak Crist, Xgann Diox Kuu Mtaal Diox Nabee, kuu naka diiz yaad lo yezlyu ree.
Jesús mbinn roo baa Las
28 Ngwalo nzhab Mart kona, tsa ngwachez Mart bel Mart Mari, ne xlaanta nzhab Mart lo Mari:
―Lee maestr ndo nzhee ne ngebez maestr lu.
29 Or mbin Mari kona, oraaka ngwateli Mari nda Mari lo Jesús.
30 Ne lee Jesús neeka ter tab leen yez, bee ndoka Jesús ta mwii Mart Jesús.
31 Ne or mwii re zha Israel kuu ngetetsey leettsoo Mari, lee Mari ngwateli nda, tsa mndeke re zha dits Mari, tak mtsow re zha xgab lee Mari nda roo baa Las ndayonn.
32 Ne or mzin Mari ta ndo Jesús, tsa mtobxub Mari xann nii Jesús, ne nzhab Mari:
―Zha Nabee, os leeʼa gatoʼa nzhee, gagatht btan na.
33 Ne or mwii Jesús nzhonn Mari ne noga re zha Israel kuu ndeke dits Mari nzhonn, kwathoz nalatt ne nabil ngoo leettsoo Jesús,
34 tsa mnaabdiz Jesús ne nzhab Jesús:
―¿Pa mkaats goo Las?
Lee re zha nzhab:
―Zha Nabee, de tsa wiiʼa.
35 Tsa mbinn Jesús.
36 Ne lee re zha Israel nzhab:
―¡Wii goo xa kwathoz mke leettsoo zha Las!
37 Per lee chop tson zha mbez:
―Zha ree kuu mtegwe ngutlo syega; ne ¿chu ngogt gatsow zha tsa na gagatht Las?
Jesús mteroban Las
38 Ne tedib welt kwathoz nalatt ngoo leettsoo Jesús, tsa mbig Jesús roo baa. Lee baaʼa nak leen thib kelyoo, ne now thib ke rooy.
39 Tsa nzhab Jesús:
―Kib goo ke.
Tsa lee Mart, btan Las nzhab:
―Zha Nabee, ser ndetsiʼa Las, tak ndaʼa thap wiz nguth Las.
40 Jesús mkab ne nzhab:
―¿Chu nitʼn loʼa, os leeʼa nyelaaza na, tewiiʼa re kuu thoz kuu tsow Diox?
41 Tsa mkib zha ke. Ne lee Jesús mwii lobee ne nzhab:
―Xutʼn, ndan texkix loʼa tak mbina kuu nin loʼa.
42 Na ne, lee lu thibka nzhona xkizʼn, per ni nay tsa ne re men kuu nzi nzhee lee lu mtaalʼn.
43 Or ngwalo mni Jesús koree, tsa dib gan Jesús nzhab Jesús:
―¡Las broo baa!
44 Ne lee mbyi kuu ngutha mroo nabix lar, ne noga lo zha nabix lar, tsa nzhab Jesús:
―Bkib goo lar kuu nabix Las ne laa goo bi Las.
Ngwalaaz re men gago Jesús tsib
(Mt. 26:1‑5; Mr. 14:1‑2; Lc. 22:1‑2)
45 Ta mod kwaro re zha Israel kuu ngwatetsey leettsoo Mari ngwalaaz Jesús, tak mwii zha kuu mtsow Jesús.
46 Per lee chop tson zha ngwa lo re fariseo, ne nzhab zha kuu mtsow Jesús.
47 Tsa lee re fariseo ne re ngwleyy kuu nataak, mkaltaa re zha lo thib junt ne nzhab zha:
―¿Kwan tsowaa? Tak lee mbyiʼa ngetsow re milagr thoz.
48 Os laaʼaa zha, reta men yelaaz zha, tsa lee re zha yez Roma yaad zha ne luux zha lazaa ne gwodooʼaa.
49 Per lee thib zha kuu nzo xid re zhaʼa kuu le Caifás, thib zha kuu nak ngwleyy kuu nabee lo reta ngwleyy liina, nzhab lo re zha:
―¡Yent kwan nane goo!
50 Ne neeka nyent goo re kwaa, mas wen gath thibka mbyi por reta men yez, nake reta men yez lux.
51 Per nzhabt Caifás kona por leeka lee Caifás, sinke lee Caifás nak ngwleyy liina, kona mtsow Diox, par mroo roo Caifás lee Jesús gath por reta zha Israel,
52 ne nagte beeta por re zha Israel, sinke noga par kaltaa Diox re zhiinn Diox kuu nzo dib naxta lo yezlyu, tsa gak re zha thibka yez.
53 Ne desde wiza lee re zha kuu nataak myaan re zha diiz kuth zha Jesús.
54 Kona mndiyt raa Jesús legal xid re zha Israel, sinke mroo Jesús yezlyu Judea, ne ngwa Jesús thib yez kuu nzi gax yubiz kuu le Efraín, ne tya myaan Jesús kon re zha kuu ngeteed lo Jesús.
55 Ne leettsa mera tsin ani Paskw chaan re Israel, tsa kwathoz men kuu nzo tedib net re yez ngwa Jerusalén, par tsow zha taxal nak kostumr zha kuu nak, ntsow nambi zha zha lo Diox ley lo zha.
56 Tsa ndiy re zha nkwaan zha Jesús lee roo gwodoo, ne naabdiz re zha lo altaa zha, mbez zha:
―¿Kwan ndak goo? ¿Chu tyaad mbyiʼa lo ani o yaadt mbyi?
57 Tsa lee re fariseo ne re ngwleyy kuu nabee lo re ngwleyy mnabee re zha, tsa loka zha kuu wii Jesús, ko zha diize, tsa ten zha Jesús.