6
Jesús mndaa kuu ndow gaay mil men
(Mt. 14:13‑21; Mr. 6:30‑34; Lc. 9:10‑17)
1 Ne leettsa ngwalo mriid re koree, tsa ngwa Jesús tedib lad roo nitdoo Galilea, kuu le Tiberias.
2 Ne naroob men mndeke dits Jesús, tak mwii zha re milagr thoz kuu mtsow Jesús lo re men kuu ne ndak.
3 Tsa lee Jesús kon re zha kuu ngeteed lo Jesús, mkendab re zha yek thib yii ne tya mndob re zha.
4 Ne ndetsin gaxa ani Paskw chaan re zha Israel.
5 Or mtsere lo Jesús mwii Jesús lo re men kuu ndeke dits Jesús, tsa nzhab Jesús lo Lip:
―¿Pa yatiʼaa kuu wu re men ree?
6 Tenzhec mnaabdiz Jesús, tsa naa kwan gab Lip, tak neʼa Jesús naa kwan tsow Jesús.
7 Tsa lee Lip mkab lo Jesús ne nzhab:
―Neeka chop gayoo denario pan, gaate par wu re men lutgay.
8 Tsa lee Ndres thib re zha kuu ngeteed lo Jesús kuu nak wets Simún Pey, nzhab:
9 ―Nzhee ndo thib nde lut kuu nap gaay pan cebad ne chop mbel; per pa ga koree wu naroob men.
10 Tsa nzhab Jesús:
―Guz goo lo re men tsa tob men.
Ne kwaro ndab yizhwan tya, tsa mndob re men ne beeta re mbyi nak teeka gaay mil zha.
11 Tsa mzhen Jesús re pan, ne mndaa Jesús texkix lo Diox, ne mdid re zhay lo re men. Ne tataka mtsow Jesús kon rop mbel, ne mdow re zha asta plotha mze leettsoo zha.
12 Or ngwalo ndow re zha, tsa nzhab Jesús lo re zha kuu ngeteed lo Jesús:
―Bthop goo re kuu mrozhoob, tsa yetsaate.
13 Tsa mthop re zhay, ne mtse zha tsiibchop chekwit ngoo re kuu byu kuu mrozhoob lo re gaay pan.
14 Or mwii re men re milagr kuu mtsow Jesús, tsa nzhab re zha:
―Wlipaa lee zha ree nak profet kuu ne Diox yaad lo yezlyu.
15 Per myeen Jesús lee re men ngwalaaz to Jesús, tsa gak Jesús rey lo re zha, kona tee mbeche Jesús lo re zha, ne ngwa thita Jesús yek yii tedib welt, tak nlaaz Jesús to thita Jesús.
Jesús mnde lo nitdoo
(Mt. 14:22‑27; Mr. 6:45‑52)
16 Or ngoo yaal, lee re zha kuu ngeteed lo Jesús ndala roo nitdoo,
17 ne mke re zha leen thib kano par rid zha tedib lad nitdoo, par tsin zha yez Capernaúm. Ne ngooʼa yaal lee Jesús terka tsin lo re zha.
18 Ne lee thib mbi thoz mroo mndelo mkwin nitdoo.
19 Ne or ndaʼa re zha teeka thib gaay mil o xoop mil metr lo nitdoo, tsa mwii re zha lee Jesús ndetsin lo re zha ndyaad nde lo nitdoo, tsa kwathoz mzeb re zha.
20 Ora nzhab Jesús lo re zha:
―¡Tsebt goo nay!
21 Ne mlaa re zha mke Jesús leen kano, per oraaka mzin re zha yezlyu ta nda zha.
Lee re men nkwaan Jesús
22 Ne tedib wiza, lee re men kuu myaan tedib lad roo nitdoo, myeen re men lee re zha kuu ngeteed lo Jesús ndya leen thibka kano kuu mndob tya, ne myeen re men ndat Jesús kon re zha.
23 Tsa lee tedib net kano mzin gax ta ndow re zha pan, ta mndaa Jesús texkix lo Diox, re kanoʼa nak kano chaan re zha yez Tiberias.
24 Or mwii re men neeka Jesús ne neeka re zha kuu ngeteed lo Jesús yenta tya, tsa mke re zha leen kano ne ndya zha par Capernaúm nda kwaan zha Jesús.
Jesús nak pan kuu ndaa yalnaban
25 Or mzin re men tedib lad roo nitdoo, ne tya mzal Jesús lo re zha, tsa mnaabdiz zha lo Jesús nzhab zha:
―Maestr, ¿pol mzina nzhee?
26 Tsa nzhab Jesús lo re zha:
―Wlipaa na nin lo goo, ngekwaant goo na tak myen goo re kuu thoz kuu mtsowʼn, sinke nkwaan goo na, tak ndow goo asta plo mze leettsoo goo.
27 Ket goo tsiin par kwaan goo kuu wu goo kuu nlux, sinke bkwaan goo kuu ndaa yalnaban kuu thitanax, ne na Kuu Mzin Ngok Men, ta yalnaban kuu thitanax lo goo, tak lee Diox kuu nak Xutʼn mtob seny chaane na, tsa ne re men lee na nak Xgann Diox.
28 Tsa mnaabdiz re zha lo Jesús, nzhab zha:
―¿Kwan ndoblo tsow nee, tsa tak tsow nee reta kuu nabee Diox tsow nee?
29 Ora mkab Jesús ne nzhab Jesús:
―Kuu nlaaz Diox nak, yelaaz goo zha kuu mtaal Diox.
30 Tsa mnaabdiz re zha lo Jesús ne nzhab zha:
―¿Cho thib re milagr tak looʼa lo nee, tsa yelaaz nee lu? ¿Kwan kuu tak tsowa?
31 Lee re teyaa zha ndala ndow zha pan kuu le maná yubiz, taxal nzhab lo xkiiz Diox: “Pan yibaa mndaa Diox ndow re zha”. [Sal. 78:24]
32 Tsa mkab Jesús ne nzhab Jesús:
―Wlipaa na nin, nagt Moisés kuu mndaa pan kuu mroo yibaa ndow goo, sinke Xutʼn nak kuu ndaa pan kuu wlipaa mroo yibaa lo re goo.
33 Tak lee pan kuu wlipaa ndaa Diox, nak zha kuu mroo yibaa, ne ndaa yalnaban lo re men yezlyu ree.
34 Tsa lee re zha mnaab lo Jesús ne nzhab zha:
―Zha Nabee, thibka btaa pana wu nee.
35 Jesús mkab ne nzhab lo re zha:
―Na nak pan kuu ndaa yalnaban. Ne lee zha kuu yaad lon thitanax laant raa zha, ne lee zha kuu yelaaz na thitanax naa tob xyeekt raa leettsoo zha.
36 Per niʼa na lo goo, nyelaazt goo na tegal ngwii goo na.
37 Reta zha kuu mndaa Xutʼn lon, ndyaad zha lon, ne reta zha kuu ndyaad lon, tezhonntʼn zha.
38 Yibaa mroon ne ndyaltʼn par tsowʼn kuu nlazʼn, sinke ndyalʼn tsowʼn kuu nlaaz Xutʼn kuu mtaalʼn.
39 Ne lee kuu nlaaz Xutʼn kuu mtaalʼn nak, lee reta zha kuu mndaa Xutʼn lon, latʼn lux neeka thib re zha, sinke teroban na zha wiz bluz.
40 Tak kuu nlaaz Xutʼn nak, lee reta zha kuu yelaaz xgann Xutʼn, keno zha yalnaban kuu thitanax ne lee na teroban zha wiz bluz.
41 Tsa mndelo re zha Israel mbyodiz, tak lee Jesús nzhab: “Na nak taxal pan kuu mroo yibaa”.
42 Ne lee re men nzhab:
―¿Chu leet zha ree nak Jesús xgann Che? Nlebeeʼaa xut zha ne xnaa zha. Ne ¿chebee mbez zha yibaa mroo zha?
43 Tsa lee Jesús mkab ne nzhab lo re zha:
―Tow roo goo yodizt raa goo.
44 Neeka thib zha yaadt lon, os lee Xutʼn kuu mtaalʼn yaadnot zha lon, tsa lee na teroban zha wiz bluz.
45 Ne lo yeets kuu mkee re profet mbez: “Diox teteed reta men”. Kona lee reta zha kuu nzhon diiz lo Xutʼn ne nteed lo Xutʼn, ndyaad zha lon.
46 ’Ne yent neeka thib zha kuu mwii lo Xutʼn Diox, sinke beeta zha kuu mroo lo Diox mwii lo Diox.
47 Wlipaa na nin, lee zha kuu nyelaaz na napa zhaʼa yalnaban kuu thitanax.
48 Na nak taxal pan kuu ndaa yalnabana.
49 Lee re teyaa zha ndala ndow zha maná yubiz, ne nguth re zha.
50 Per lee na ngetan kwent chaan pan kuu mroo yibaa lo goo, ne loka zha kuu wuy taban zha thitanax.
51 Na nak pan kuu naban kuu mroo yibaa, ne loka zha kuu wu pan ree taban zha thitanax. Lee pan kuu tan nak kwerp da, ne ta nay por reta men yezlyu ree.
52 Tsa lee re zha Israel mndelo mbyodiz, ne nzhab:
―¿Xomod taa mbyi ree leeka beel mbyi ree wu men?
53 Tsa nzhab Jesús lo re zha:
―Na Kuu Mzin Ngok Men. Wlipaa na nin lo goo, os lee goo wut goo beel da, ne gut goo ren da kenot goo yalnaban kuu thitanax.
54 Loka zha kuu wu beel da ne gu ren da, tekeno zha yalnaban kuu thitanax, ne lee na teroban zha wiz bluz.
55 Tak lee beel da wlipaa nak loww zha, ne lee ren da wlipaa nak kuu nzhuu zha.
56 Ne lee zha kuu nzhow beel da ne nzhuu ren da, thibka nak nee rop nee zhaʼa ne thibka ndon kon lee zha.
57 Lee Xutʼn kuu mtaalʼn nkeno yalnaban, ne lee na naban na por Xutʼn; ne tataka lee zha kuu wu beel da taban zha por na.
58 Kwent chaan pan kuu mroo yibaa ngetan. Lee pan ree nagt taxal maná kuu ndow re teyaa zha ndala, tegal ndow zhay per nguth zha, per lee zha kuu wu pan kuu tan taban zha thitanax.
59 Re koree nzhab Jesús lo re men yez Capernaúm, or mloo Jesús xkiiz Diox lo re men ta nkaltaa zha nteed zha xkiiz Diox.
Diiz kuu ndaa yalnaban
60 Or mbin re men re kuu mloo Jesús, tyen re zha kuu ngeteed lo Jesús nzhab:
―Kwathoz nagan yenaa kuu ni zha; ¿cho tak gon diiz xkiiz zha?
61 Ne myeen Jesús kwan ngetediz re zha, tsa nzhab Jesús:
―Cho koree ntsow went nzo leettsoo goo.
62 ¿Kwan tsow goo xgab, os wii goo lee na, Kuu Mzin Ngok Men, ndyan yibaa leeka ta mroon?
63 Lee Mbi Nayon nak kuu ndaa yalnaban, per lee lo kwerp yent pa lortsine. Ne lee re kuu nin lo goo nak chaan Mbi Nayon ne leey nak kuu ndaa yalnaban.
64 Per bee nzo thib chop goo kuu nyelaazt na.
Tak desde ner neʼa Jesús, naa cho nak re zha kuu nyelaazt Jesús, ne cho taa Jesús lo re zha kuu kuth Jesús.
65 Tsa nzhab Jesús:
―Kona nin lo goo, neeka thib zha gagt yaad lon, os lee Xutʼn yaadnot zha lon.
66 Kona tyen zha kuu ngeteed lo Jesús, mlaa zha Jesús ne ndya zha, ne mndiyt raa zha kon Jesús.
67 Tsa nzhab Jesús lo re tsiibchop zha kuu ngeteed lo Jesús:
―¿Chu noga goo nlaaz goo bi goo?
68 Tsa nzhab Simún Pey lo Jesús:
―Zha Nabee, ¿cho lo ya nee? Si xkiiza nak kuu ndaa yalnaban kuu thitanax.
69 Re nee ne leeʼa nak Zha Nali kuu mroo lo Diox, ne nyelaaz nee lu.
70 Jesús mkab ne nzhab:
―Tsiibchop goo nak zha kuu mlin, per thib goo nak kuu nzhon diiz lo Maxuuy.
71 Or nzhab Jesús kona ngeteth Jesús Judas Iscariote, xgann Simún Iscariote, tak Judas nak kuu taa Jesús lo re zha kuu kuth Jesús, tegal lee Judas nak thib zha lo re tsiibchop zha kuu ngeteed lo Jesús.