19
Jesús ne Zaqueo
1 Tsa mndaab Jesús yez Jericó ne mriid Jesús leen yeza.
2 Ne tya nzo thib mbyi rik kuu le Zaqueo, ne lee zha nak zha kuu nabee lo re zha kuu ntsow kobral temi chaan yezlyu kuu nzhax lo zha Roma.
3 Ne nlaaz zha wii zha Jesús, per gagt wii zha Jesús, tak kwathoz men nzi, ne tak kwathoz lut Zaqueo.
4 Tsa lijer mndener zha ne mkendab zha lo thib ya kuu le sicómoro, par wii zha Jesús leettsa rid Jesús tya.
5 Leettsa mzin Jesús tya, ne mwii Jesús lo ya, tsa nzhab Jesús lo zha:
―Zaqueo, lijer bla, tak liza betʼn naltseree.
6 Tsa lijer mla zha ne kwathoz naley ngoo leettsoo zha, mbin zha lee Jesús kwet liz zha.
7 Ne or mbin re men kona, mndelo zha mbez zha lo re altaa zha, ne nzhab zha; lee Jesús nda kwet liz thib zha kuu kwathoz ndab falt.
8 Tsa lee Zaqueo mndeli ne nzhab lo Jesús:
―Zha Nabee, wii, garol re kuu napʼn tan lo re zha prob; ne os leen mlowann na chaan thib zha, thap lal kuu mkibʼn lo zha tseren lo zha.
9 Tsa nzhab Jesús lo Zaqueo:
―Naltseree lee re zha kuu nzo yuu ree mkayaa yalnaban kuu thitanax, tak no zha ree nak zha raz Abraham.
10 Tak lee na, Kuu Mzin Ngok Men, ndyaad kwaan re zha kuu mndab, tsa tan yalnaban lo re zha.
Kwent nanzee chaan tsii temi
(Mt. 25:14‑30)
11 Ne leettsa ngeyon re zha re kuu ngeni Jesús, tsa nzhab Jesús tedib kwent nanzee lo re zha, tak gaxa Jerusalén nzi re zha kon Jesús, ne mtsow re zha xgab, mera nabee Diox lo re men.
12 Tsa lee Jesús nzhab lo re zha:
―Ngoo thib zha rik kuu kwathoz nataak, ne mroo zha nda zha thib ta kwathoz tith, ne tya gak zha rey kuu nabee, ne tsaraa bretab zha.
13 Ne leettsa ter roo zha, tsa mrez zha tsii mos zha, ne mndaa zha thibga temi kuu mas nataak lo kadta thib mos, ne nzhab zha lo re mos: “Bke goo tsiin kon temi ree, asta leettsa bretabʼn”.
14 Per lee re tawlaz zha nayii ne zha, tsa mtaal re tawlaz zha thib net zha ngwalo diiz lo rey ne nzhab: “Nlaazt nee gak zha ree rey lo nee”.
15 ’Per leettsa naka zha rey, tsa mre zha laz zha. Tsa mrez zha re mos zha kuu mndaa zha temi lo, tak nlaaz zha ne zha naa xa mke re mos tsiin kon temiʼa.
16 Tsa mzin mos kuu ner ne nzhab mos: “Zha Nabee, lee temi kuu mndaaʼa lon, mtsowe gan tedib tsiiy”.
17 Tsa lee rey nzhab lo mos: “Mos da, kwathoz wen mkeʼa tsiin. Wen mtsowa lo lut kwaa mndan loʼa, kona lee nal tan tsii yez loʼa, tsa nabee luy.”
18 Tsa mzin tedib mos ne nzhab lo rey: “Zha Nabee, lee temiʼa kuu mndaaʼa lon mtsowe gan tedib gaaye”.
19 Tsa lee rey nzhab: “Nal tan thib gaay yez loʼa tsa nabee luy”.
20 Tsa mzin myon mos ne nzhab: “Zha Nabee, lee temiʼa kuu mndaaʼa lon nzhee. Mkee nay lo thib panyit ne mkaats nay,
21 tak nzebʼn nen lu, tak nen lee lu nak thib zha kuu kwathoz nakap, ndena kuu mtaanta ne nthopa yalgonn ta ngonnta.”
22 Tsa lee rey nzhab lo mos: “Kon leeka re diiz kuu mroo rooʼa, naabʼn kwent loʼa; lu nak thib zha nakap. Neʼa lee na nden na kuu mtaantʼn ne nthopʼn yalgonn ta mlootʼn bin.
23 ¿Chebee mlota temi da bank? Tsa leettsa gabren, gataaʼa temi da kuu mndan loʼa, ne gataaʼa zhiinne kuu mtsowe gan lon.”
24 Tsa nzhab rey lo re zha kuu nzi lo rey: “Bkib goo temi lo mos ree, ne btaa gooy lo mos kuu nap tsiiy”.
25 Tsa lee re zha nzhab lo rey: “Zha Nabee napa zha baa tsii temi”.
26 Per lee rey mkab ne nzhab: “Lee na ni lo goo: Lee zha kuu nap naroobe tekayaa zha masraay, per lee zha kuu yent kwan nap, asta lut kuu nap zha yiib lo zha.
27 Ne noga nzhab rey: Deno goo re zha kuu nlaazt gakʼn rey lo nzhee, ne beth goo zha nzhee lon.”
Lee Jesús mndaab yez Jerusalén
(Mt. 21:1‑11; Mr. 11:1‑11; Jn.12 :12‑19)
28 Leettsa ngwalo nzhab Jesús kona, ndaka Jesús yez Jerusalén.
29 Leettsa ndetsin gaxa Jesús yez Betfagé ne yez Betania, gaxta yii kuu le Olib, tsa mtaal Jesús chop zha kuu ngeteed lo Jesús,
30 ne nzhab Jesús lo rop zha:
―Gwa goo yez kuu nzi gaxta nzhee, tya yetsal goo thib burr kuu ndekedoo, thib maa kuu terka yo xab. Xak goo maa ne yaadno goo maa nzhee.
31 Ne os cho zha naabdiz lo goo ne: “¿Chebee ngexak goo burr?” Gab goo lo zha: “Lee Zha Nabee ndeche maa”.
32 Tsa lee rop zha kuu mtaal Jesús nda, ne mzal burr lo zha taxal nzhab Jesús lo rop zha.
33 Ne leettsa ngexak zha burr, lee bzhaan burr, mnaabdiz lo rop zha ne nzhab:
―¿Chebee ngexak goo burr da?
34 Tsa lee zha mkab ne nzhab:
―Lee Zha Nabee ndeche maa.
35 Tsa ngwano zha maa lo Jesús. Ne mxoob zha xab zha dits maa ne mke Jesús dits maa.
36 Ne taxal nderid Jesús lee re men ngix xab net.
37 Ne or ndyaadla re zha ndetsin zha gax yii kuu le Olib, tsa lee reta men kuu ndeke dits Jesús mndelo zha mbil zha dibgan zha ne mndaa zha texkix lo Diox, por re kuu thoz kuu mwii zha mtsow Jesús.
38 Ne mbez re zha:
―¡Kwathoz wen nak zha kuu ndyaad kon le Zha Nabee! ¡Wen kwin re zha yibaa ne golaa lo Diox kuu ndob yibaa!
39 Tsa lee chop tson re fariseo kuu nzi xid re mena, nzhab lo Jesús:
―Maestr, gok nayii lo re zha kuu ndeke ditsa.
40 Per lee Jesús nzhab lo re zha:
―Wlipaa na nin lo goo, os lee re zha ree tow roo, lee re ke kwez guth.
41 Leettsa ndetsin gax Jesús yez Jerusalén, or mwii Jesús yez, ora mbinn Jesús,
42 ne nzhab Jesús:
―¡Os lee re goo zha yez Jerusalén gane goo, lee wiz naltseree tak wen kwin goo, per tak nzogaats koree lo goo, kona nloote lo goo!
43 Tak too wiz kuu lee re zha kuu nayii ne goo telo yo kon goo, ne tow zha re ladta lo goo, taxal thib btsin ke.
44 Wlipaa teluux zha re zhiinnta goo, ne neeka thib ke yaant dits tedib ke yez ree, tak mlebeet goo Diox wiz kuu myaadtwii Diox lo goo.
Jesús mtezhonn re zha kuu nzi ntho lee roo gwodoo naro
(Mt. 21:12‑17; Mr. 11:15‑19; Jn.2 :13‑22)
45 Tsa mndaab Jesús lee roo gwodoo naro, ne mndelo Jesús mtezhonn re zha kuu ntho ne ndi tya.
46 Tsa nzhab Jesús lo re zha:
―Nkeʼa lo xkeets Diox ta mbez: “Lee lizʼn nak yuu ta ndediz re men lon” [Is. 56:7; Jer. 7:11]; ne lee re goo ntsowe taxal liz wann.
47 Gandata wiz nloo Jesús lo re men lee roo gwodoo, per lee re ngwleyy kuu nabee lo re ngwleyy, ne re maestr kuu nloo xkiiz Diox lo re men, ne re zha kuu nabee yez, nkwaan zha naa xomod kuth zha Jesús.
48 Per mzalt zha mod gatsow zhay, tak kwathoz men nzi nzhon re kuu nloo Jesús.