4
Ngwalaaz Maxuuy gakedi Maxuuy Jesús
(Mt. 4:1‑11; Mr. 1:12‑13)
1 Ne kwaro mnabee Mbi Nayon leettsoo Jesús, leettsa mroo Jesús roo yoo Jordán, tsa ndano Mbi Nayon Jesús ta nak yubiz.
2 Ne chop gal wiz ne chop gal yaal mndo Jesús tya, ne neeka thib kwaa ndowt Jesús, tsaraa mlann Jesús.
3 Tsa lee Maxuuy ngwalaaz gakedi Jesús, ne nzhab lo Jesús:
―Os leeʼa wlipaa Xgann Diox naka, guz lo ke ree tsa reyale pan.
4 Lee Jesús mkab ne nzhab:
―Lo xkeets Diox nzhab: “Nabant men beeta kon pan, sinke lee men naban kon reta diiz kuu ndroo roo Diox”. [Dt. 8:3]
5 Tsaraa ndano Maxuuy Jesús yek thib yii naro, ne mloo Maxuuy reta yez kuu nzi lo yezlyu lo Jesús.
6 Ne nzhab Maxuuy lo Jesús:
―Na ta dita yalnabee ne yalney chaan re yez ree loʼa, tsa nabee luy, tak chaan da nake, ne loka cho lo nlazʼn ta nay.
7 Os leeʼa tobxuba lon ne gola lon, retay gak chaana.
8 Per lee Jesús mkab, ne nzhab:
―Beche lon Maxuuy, tak lo xkeets Diox nzhab: “Beeta lo Diox kuu nabee loʼa ndoblo gola ne ndoblo tsowa tsiin lo”. [Dt. 6:13]
9 Tsa mndeno Maxuuy Jesús yez Jerusalén, ne ngwano Maxuuy Jesús yek gwodoo ta mas ya ndab, tsa nzhab Maxuuy lo Jesús:
―Os leeʼa wlipaa Xgann Diox naka, gob par yath,
10 tak lo xkeets Diox nzhab:
Diox taal mandad chaan Diox tsa kenap mandad lu,
tsa yent kwan taka,
11 ne ten mandad yaaʼa, tsa yent kwan tak niiʼa lo ke. [Sal. 91:11-12]
12 Jesús mkab, ne nzhab:
―Noga nzhab lo xkeets Diox: “Kwaanta mod par kediʼa Diox kuu nak Zha Nabee loʼa”. [Dt. 6:16]
13 Ne lee Maxuuy ngogt raa gakedi Jesús, tsa mlaa Maxuuy Jesús thib tyemp.
Jesús mndelo rtsin
(Mt. 4:12‑17; Mr. 1:14‑15)
14 Tsa mre Jesús yezlyu Galilea kon yalney chaan Mbi Nayon, ne dita yezlyuʼa mndediz re men kwent chaan Jesús.
15 Ne mloo Jesús lo re men ta nkaltaa re zha Israel nteed xkiiz Diox, ne ntsow nataak re men Jesús.
Jesús mzin yez Nazaret
(Mt. 13:53‑58; Mr. 6:1‑6)
16 Tsa ngwa Jesús yez Nazaret ta mzhen Jesús. Thib wiz sabd kuu ndroxkwan re zha Israel, mndaab Jesús ta nkaltaa re zha Israel nteed zha xkiiz Diox, taxalka nak kostumr Jesús, ne mndeli Jesús lab Jesús xkeets Diox.
17 Tsa mndaa zha yeets kuu mkee profet Isaí lo Jesús. Ne leettsa mxaal Jesús lo yeets, mzal Jesús ta tenzhee nzhab:
18 Lee Mbi Nayon chaan Zha Nabee ndo kon na,
tak mli zha na par tan kwent Diiz Chul chaan zha lo re zha prob,
ne mtaal zha na, tsa tetseyʼn leettsoo re zha kuu yent gan leettsoo,
noga mtaal zha na, tsa telaan re zha kuu nzo tsib lo Maxuuy,
par tegwen ngutlo re syeg;
ne par telaan re zha kuu ndakti lo Maxuuy;
19 ne tan kwent chaan wiz kuu leettsa lee Zha Nabee,
taa re chaane kuu wen lo re men. [Is. 61:1-2]
20 Tsaraa mthuz Jesús yeets, ne mndaa Jesús yeets lo zha kuu nkenap ta nkaltaa re zha nteed xkiiz Diox, ne mndob Jesús. Ne reta zha kuu nzi tya key mwii zha lo Jesús.
21 Tsa lee Jesús mndelo nzhab lo re zha:
―Naltseree ngok kuu nke lo xkeets Diox lo re goo.
22 Ne reta zha wen mndediz zha Jesús, ne kwathoz mzegey leettsoo zha mbin zha re diiz kuu nzhab Jesús, ne mbez re zha lo altaa zha:
―¿Chu leet zha ree nak xgann Che?
23 Tsa mkab Jesús lo re zha, ne nzhab Jesús:
―Wlipaa na nin lo goo, lee re goo ntsow goo xgab ne goo diiz ree lon: “Doctor leeka lu btegweʼa lu”. Ne noga ntsow goo xgab ne goo lon: “Lee re kuu mbin nee mtsowa yez Capernaúm, noga nzhee laza btsowe”.
24 Noga nzhab Jesús:
―Wlipaa na nin lo goo, neeka thib re profet nkayaat re tawlaz zha zha.
25 Wlipaa na nin lo goo, kwathoz tyen ngot byud ngoo lazaa yez Israel, tyemp kuu mban profet Lí, leettsa mlat yi tson liin narol, ne mla win dita lo yezlyu.
26 Per mtaalt Diox Lí lo neeka thib ngot byud zha tawlazaa zha Israel, sinke lee Diox mtaal Lí lo thib ngot byud zha yez Sarepta, kuu nzi ta nabee yez Sidón.
27 Ne noga ngoo kwathoz tawlazaa kuu mzhaak yiz kuu ndezhoz kwerp zha, tyemp kuu mban profet Eliseo, per neeka thib zha mtegwet Eliseo, sinke beeta Naamán zha yezlyu Siria mtegwe Eliseo.
28 Ne or mbin re zha Israel kuu mkaltaa ta nteed zha xkiiz Diox kona, kwathoz mkezhyan re zha.
29 Tsa ngwateli re zha ne mloo zha Jesús tya, ne ndano zha Jesús yek yii kuu nzi yeza, tsa tub zha Jesús.
30 Per lee Jesús mriid xid re zha ne nda Jesús.
Thib mbyi kuu nzo mbi fyer leettsoo
(Mr. 1:21‑28)
31 Tsa lee Jesús ngwa yez Capernaúm, kuu nzi yezlyu Galilea. Ne reta sabd wiz kuu nzhool re zha Israel lo Diox, mloo Jesús lo re men.
32 Ne kwathoz mzegey leettsoo re zha, mwii zha xa mloo Jesús lo re zha, tak kon yalnabee ni Jesús lo re men.
33 Ne ta nkaltaa re zha nteed zha xkiiz Diox, ndo thib mbyi kuu nzo mbi fyer leettsoo, mretsyath ne nzhab:
34 ―¡Blaa nee! ¿Kwan ndaka neʼa nee? ¿Chu ndyaada luuzha nee Jesús zha Nazaret? Nlebeen lu, nen leeʼa nak Zha Kuu Nayon lo Diox.
35 Tsa mkox mbi fyera lo Jesús, ne nzhab Jesús:
―¡Btow rooʼa ne broo leettsoo mbyi ree!
Tsa lee mbi fyera mlobi mbyiʼa lo yu xid re mena, ne mroo mbi fyera leettsoo mbyiʼa, ne yent kwan mzhaak mbyi.
36 Reta zha kuu nzi tya kwathoz mzegey leettsoo zha, ne mbez zha lo altaa zha:
―¿Cho nak zha ree? Nap zha yalnabee ne yalney ngoo zha re mbi fyer leettsoo re men, ne nzhon re mbi fyer diiz lo zha.
37 Ne kwathoz ney mraats diiz, re kuu mtsow Jesús dita yezlyu Galilea.
Jesús mtegwe xnaatsaap Pey ne kwathoz mbyiz
(Mt. 8:14‑15; Mr. 1:29‑31)
38 Tsa mroo Jesús ta nkaltaa re zha Israel nteed xkiiz Diox, ne nda Jesús liz Pey, tsa nzhab re zha lo Jesús lee xnaatsaap Pey ndak xlee, ne mnaab zha lo Jesús tsa tegwe Jesús xnaatsaap Pey.
39 Tsa mwii Jesús lo ngot, ne ora mkox xlee lo Jesús, ne oraaka mroo xlee ngot. Ne ngwache ngot ne mndaa ngot kuu ndow re zha.
Jesús mtegwe naroob mbyiz
(Mt. 8:16‑17; Mr. 1:32‑34)
40 Ne leettsa mera bix wiz, reta zha kuu nap mbyiz kuu ndak zhaapaa zhaapaa yiz, myaadno zha re mbyiz lo Jesús, tsa mxoob Jesús yaa Jesús yek re mbyiz ne mtegwe Jesús mbyiz.
41 Ne noga mloo Jesús mbi fyer leettsoo tyen zha, ne mbezguth re zha ne mbez zha lo Jesús:
―¡Lu nak Xgann Diox!
Per lee re mbi fyera mkox lo Jesús, ne mlaat Jesús gani re mbi fyera lo Jesús, tak neʼa re mbi fyer lee Jesús nak Crist Kuu Mtaal Diox Nabee.
Jesús mloo Diiz Chul lo re men
(Mr. 1:35‑39)
42 Leettsa ngwani yezlyu tedib wiza, mroo Jesús yeza ne nda Jesús thib ta to thita Jesús. Per lee re men mkwaan Jesús, ne or mzin re zha ta ndo Jesús. Ngwalaaz zha gatekweet zha Jesús par bit Jesús.
43 Per lee Jesús nzhab lo re zha:
―Noga ndoblo tan kwent Diiz Chul kuu ndaa kwent xomod nabee Diox lo re men tedib net re yez, tak par kona mtaal Dioxʼn.
44 Ne mroo Jesús mndaa Jesús kwent Diiz Chul chaan Diox, re yez chaan Judea, ta nkaltaa re zha Israel nteed xkiiz Diox.