3
Jesús mtegwe thib mbyi kuu mbiz yaa
(Mt. 12:9‑14; Lc. 6:6‑11)
Tedib welt mndaab Jesús ta nkaltaa re zha nteed zha xkiiz Diox, ne tya ndo thib mbyi kuu mbiz thib yaa. Noga nzi thiban zha kuu ngewii, naa chu tetegwe Jesús mbyiʼa wiz kuu nzhool re zha Israel lo Diox, tsa tak keki zha Jesús. Tsa lee Jesús nzhab lo mbyi kuu mbiz yaaʼa:
―Gwateli, ne bto ndrol.
Tsa mnaabdiz Jesús lo re zha, ne nzhab Jesús:
―¿Kwan mas wen tsowaa wiz kuu nzhoolaa lo Diox? ¿Chu ndoblo tsowaa kuu wen o kuu went? ¿Chu wen tegwe men thib zha, o chu wen kuth men thib zha?
Per lee re zha neeka thib kuu mkabt zha. Tsa nayii mwii Jesús lo re zha kuu nzi lo Jesús: Ne nabil ngoo leettsoo Jesús, tak kwathoz nad leettsoo re zhaʼa, tsa nzhab Jesús lo mbyiʼa:
―Bteli yaaʼa.
Tsa mteli zha yaa zha, ne oraaka mgwe yaa zha taxal tedib yaa zha. Tsa mkaltaa re fariseo kon re zha rey Herodes, tsa myaan zha diiz, naa xomod tsow zha par kuth zha Jesús.
Kwaro men mkaltaa roo nitdoo
Leettsa mroo Jesús tya ne nda Jesús roo nitdoo kon re zha kuu ngeteed lo Jesús, kwaro re zha yezlyu Galilea kon re zha yezlyu Judéa, mndeke dits Jesús. Ne noga re zha Jerusalén yez naro, kon zha yezlyu Idumea ngwa lo Jesús; noga ngwa re zha kuu nzo tedib lad roo yoo Jordán, re zha yez Tiro ne zha yez Sidón. Ngwa zha tak mbin zha re kuu thoz kuu ntsow Jesús. Tsa nzhab Jesús lo re zha kuu ngeteed lo Jesús:
―Btolist goo thib kano par keen, tak naroob men ndeke ditsʼn ne kwaro nzhoo re men na.
10 Tak kwaro men mtegwe Jesús, ne lee re mbyiz nzhoo Jesús, tak nlaaz zha diinn zha cho Jesús. 11 Ne or ngwii re mbi fyer kuu nzo leettsoo re zha lo Jesús, tsa ntsow mbi fyer ntobxub re zha lo Jesús, ne mbetsyath zha mbez zha:
―Lu nak Xgann Diox.
12 Kwathoz mkox re mbi fyer lo Jesús, ne nzhab Jesús:
―Yent cho lo gab goo naa cho nakʼn.
Jesús mli tsiibchop zha
(Mt. 10:1‑4; Lc. 6:12‑16)
13 Tsa mkendab Jesús yek thib yii, ne mrez Jesús re zha kuu nlaaz Jesús, ne ngwa re zha lo Jesús. 14 Tsa mli Jesús tsiibchop zha par kwin kon Jesús, ne par taal Jesús zha yataa zha kwent xkiiz Diox. 15 Ne mndaa Jesús yalnabee lo re zha, tsa koo zha re mbi fyer kuu nzo leettsoo re men. 16 Tsiibchop re zha ree nak re zha kuu mli Jesús:
Simún (kuu mtob le Jesús Pey),
17 Santiag ne Juan (rop zha ree nak xgann Zebedeo, kuu mtob le Jesús Boanerges, diiz ree nak: “Zhiinn bel bti”);
18 Ndres,
Lip,
Bartolomé,
Mateo,
Mach,
Santiag (zhiinn Alfeo),
Tadeo,
Simún (kuu ngoo xid partid Cananita),
19 ne Judas Iscariote (kuu mndaa Jesús lo yalguth).
Zha kuu ngode lo Mbi Nayon chaan Diox
(Mt. 12:22‑32; Lc. 11:14‑23; 12:10)
20 Ne mndaab Jesús kon re zha kuu ngeteed lo Jesús leen thib yuu, ne tedib welt kwathoz men mkaltaa lo Jesús, ne neeka myobt gawu re zha. 21 Ne mbin re zha liz Jesús kona, tsa ngwa zha gaxii zha Jesús, tak nzhab zha:
―Mbix yek Jesús.
22 Ne lee re maestr chaan ley kuu mroo Jerusalén nzhab:
―Wlipaa yalnabee chaan Beelzebú nap Jesús, ne kon yalnabee chaan Beelzebú ngoo Jesús re mbi fyer.
23 Tsa mrez Jesús re zha ne mni Jesús lo re zha kon diiz nanzee, ne nzhab Jesús:
―¿Xomod koo Maxuuy leeka lee Maxuuy Maxuuy? 24 Os lee thib yez nzhak chop tant ne ngyo leeka re zha, xegt yeza naroob. 25 Ne noga os leen thib yuu nzhak chop zha, ne ngyo leeka re zha, reta zha kuu nzo leen yuuʼa xegt zha naroob tyemp. 26 Kona os lee Maxuuy yo kon leeka lee Maxuuy, xegt yalnabee chaan Maxuuy naroob tyemp, gaxta ndo luzhe.
27 ’Ne leeka tata gagt tab thib zha leen liz thib zha ney, os ter liib zha zha, tsa tak lowann zha re chaan zha.
28 ’Wlipaa na nin, tekib Diox relota falt kuu ntsow men, asta kuu ngode men Diox. 29 Per lee re zha kuu ngode lo Mbi Nayon chaan Diox, thitanax tuyyt Diox falta neeka mas.
30 Tata nzhab Jesús lo re zha, tak lee re zha nzhab mbi fyer nzo leettsoo Jesús.
Xnaa Jesús ne re wets Jesús
(Mt. 12:46‑50; Lc. 8:19‑21)
31 Tya mzin xnaa Jesús kon re wets Jesús, ne mlet re zha roo yuu, tsa mtaal zha thib zha ngwachez Jesús. 32 Ne lee re zha kuu nzi re ladta lo Jesús nzhab lo Jesús:
―Lee xnaaʼa ne re wetsa nzi lee ndiy nkwaana.
33 Lee Jesús mkab ne nzhab:
―¿Cho nak xnaan ne re wetsʼn?
34 Tsa mwii Jesús lo re zha kuu nzi re ladta lo Jesús, ne nzhab Jesús:
―Re zha ree ndakʼn taxal xnaan ne re wetsʼn. 35 Tak reta zha kuu ntsow kuu nlaaz Diox, zhaʼa nak wetsʼn, btan na ne xnaan.