17
Mzee mod na Jesús
(Mr. 9:2‑13; Lc. 9:28‑36)
Xoop wiz bluz lee Jesús zhaata mndeno Pey, Santiag ne Juan wets Santiag, ne ngwa re zha yek thib yii naro. Ne tya mzee mod na Jesús lo re yon zha. Ne lee lo Jesús mla xni taxal xni wiz, ne dita xab Jesús naguz na taxal xni wiz. Ne tya mloo Moisés ne Lí ngetediz kon Jesús. Tsa nzhab Pey lo Jesús:
―Zha Nabee, ¡wen thoz nzi nee nzhee nal! Os leeʼa nlaaza, taa nee tson ramad, thibe gak chaana, tedibe gak chaan Moisés ne lee tedibe gak chaan Lí.
Or lee Pey bee ngenika, lee thib xkow kuu anta xni na mtow re zha, ne xid xkowa mroo thib bos kuu mbin re zha, kuu nzhab:
―Zha ree nak xgann na kuu kwathoz nke leettsoon, ne kwathoz wen nzo leettsoon nen zha. Bin goo diiz lo zha.
Or mbin re zha kuu ngeteed lo Jesús kona, reta zha mkiits zha yek zha lo yu, ne kwathoz mzeb zha. Tsa mbig Jesús lo re yon zha, ne mdiinn Jesús zha, ne nzhab Jesús lo re zha:
―Gwateli goo; tsebt goo.
Ne leettsa mwii re zha yenta cho nak, sinke beeta Jesús ndo tya.
Or ndyaadla re zha yek yiiʼa, lee Jesús mnabee lo re zha ne nzhab:
―Neeka thib lo zha gabt goo kuu mwii goo, asta leettsa lee na Kuu Mzin Ngok Men, roban xid re zha nguth.
10 Tsa lee re zha kuu ngeteed lo Jesús mnaabdiz lo Jesús, ne nzhab:
―Os leey tata nake, ¿chebee lee re maestr kuu nloo xkiiz Diox nzhab, ner Lí yaad?
11 Tsa lee Jesús mkab ne nzhab:
―Wli ner Lí yaad, tsa texnet Lí reta kwaa. 12 Per leen ni lo goo, myaada Lí per mkayaat re men Lí, sinke mtsowno re men Lí kuu nlaaz men. Ne leeka tata lee na Kuu Mzin Ngok Men, kwathoz ridʼn yalti lo re mena.
13 Tsa lee re yon zha kuu ngeteed lo Jesús, myeen lee Jesús ngetaa kwent chaan Juan kuu mtsowleyy re men.
Jesús mtegwe thib zha mndyeen kuu mzhaak yizguthye
(Mr. 9:14‑29; Lc. 9:37‑43)
14 Leettsa lee Jesús kon re yon zha kuu ngeteed lo Jesús mretab ngwa yek yii, tsa mzin re zha ta nzi re men. Tsa mbig thib zha ne mtobxub zha lo Jesús, ne nzhab zha:
15 ―Zha Nabee, blat leettsooʼa neʼa xgann na, tak ndak nyo yizguthye. Ne kwathoz ndakti nyo lo yiz; ne kwathoz tyen welt nzhab nyo lo ki ne leen nit. 16 Myaadnon nyo lo re zha kuu ngeteed loʼa, per mtsowt zha gan gategwe zha nyo.
17 Jesús mkab ne nzhab lo re zha kuu nzi tya:
―Zha went, kuu nyelaazt Diox nak goo. ¿Asta pol ton lo goo? ¿Asta pol xek leettsoon nen goo? Deno xganna nzhee.
18 Tsa lee mbi fyer mkox lo Jesús ne mroo leettsoo nyo, ne oraaka lee nyo mgwe.
19 Tsa lee re zha kuu ngeteed lo Jesús, ngwa mnaabdiz lo Jesús zhaata ne nzhab re zha lo Jesús:
―¿Xomod lee nee, ngogt gagoo nee mbi fyer baa?
20 Tsa lee Jesús nzhab:
―Ngogt gagoo goo mbi fyer baa, tak lutta nyelaaz goo Diox. Wlipaa na nin lo goo, os lee goo nyelaaz goo Diox mase lut taxal na thib mbiz mostaz, kuu thib ndezhen, neeka thib kuu gagt nagan lo goo. Tak gab goo lo yii ree: “Beche nzhee ne tyee tedib lad”, ne teyiib yii. 21 Reta mbi kuu tenzhee nak, tak rooy os lee men naab mene lo Diox ne tsow men ayun.
Jesús mndaa kwent tedib welt naa xomod gath Jesús
(Mr. 9:30‑32; Lc. 9:43‑45)
22 Thib wiz leettsa nzi re zha yezlyu Galilea, tsa lee Jesús nzhab lo re zha kuu ngeteed lo Jesús:
―Lee na Kuu Mzin Ngok Men, taa zha na lo re men, 23 ne kuth zha na, per leettsa tsaal tson wiz lee na roban.
Leettsa mbin re zha koree, kwathoz nabil ngoo leettsoo re zha.
Temi kuu nzhax lo gwodoo
24 Leettsa mzin Jesús kon re zha kuu ngeteed lo Jesús yez Capernaúm, tsa lee re zha kuu ntsow kobral temi chaan gwodoo, ngwa mnaabdiz lo Pey ne nzhab:
―¿At ngixt maestr goo temi kuu nzhax lo gwodoo?
25 Lee Pey mkab ne nzhab:
―Ngix zhay.
Ne leettsa lee Pey mndaab leen yuu, lee Jesús mni lo Pey ne nzhab:
―¿Simún, kwan ntsowa xgab? ¿Cho lo ntsow re zha kuu nabee lo yezlyu ree kobral temi chaan yezlyu? ¿Chu lo re tawlaz zhay o chu lo re zha tedib yeze?
26 Pey mkab ne nzhab:
―Lo zha tedib yeze.
Tsa lee Jesús nzhab:
―Kona lee re tawlaz zha ndoblot kix neeka thib rehal. 27 Per ndoblot tsowaa, tak leettsoo neeka thib zha. Kona nin loʼa, gwa roo nitdoo, ne blebi answel kuu niita mbel. Ne roo mbel kuu ner niita yetsala thib temi kuu tegaa kizha chaanaa. Bzhene ne gwathix lo re zha.