8
Jesús mtegwe thib zha kuu ndeye kwerp
(Mr. 1:40‑45; Lc. 5:12‑16)
1 Leettsa mretab Jesús ngwa Jesús yek yii, kwathoz men mndeke dits Jesús.
2 Ne xid re mena mroo thib mbyi kuu ndeye kwerp, mbig lo Jesús ne mtobxub, ne nzhab zha:
―Zha Nabee, os leeʼa nlaaza, tak tegweʼa na lo yiz ree.
3 Tsa mxoob Jesús yaa Jesús dits zha, ne nzhab Jesús lo zha:
―Nlazʼn, weʼa.
Ne oraaka mgwe zha.
4 Tsa nzhab Jesús lo zha:
―Wii, yent cho lo gaba koree. Sinke gwa lo ngwleyy ne btaa gona taxal nabee ley chaan Moisés, gon kuu ndaa re zha kuu mgwe lo yiz kuu mzhaaka, tsa ne ngwleyy leeʼa mgweʼa ne gab ngwleyye lo re men.
Jesús mtegwe mos thib soldad kuu nabee lo thib gayoo soldad
(Lc. 7:1‑10)
5 Ne or mndaab Jesús yez Capernaúm, lee thib soldad kuu nabee lo thib gayoo soldad, ngwa mnaab thib yalwen lo Jesús,
6 ne nzhab:
―Zha Nabee, lee mos da kwathoz ne ndak, gagt gwin zha ne kwathoz ndakti zha.
7 Tsa nzhab Jesús lo soldad:
―Nal yan tsa tegwen zha.
8 Tsa lee soldad kuu nabee lo thib gayoo soldad nzhab:
―Zha Nabee, ndoblotʼn taba leen lizʼn, anta nabee ne lee mos da gwe.
9 Tak noga na napʼn zha kuu nabee lon, ne noga na napʼn soldad kuu nabeen lo. Os leen gapʼn lo thib zha: “Gwa”, ne nya zha; ne or gapʼn lo tedib zha “De”, ne nyaad zha; ne leettsa mbezʼn lo mos da “Tsow koree”, ntsow zhay.
10 Kwathoz mzegey leettsoo Jesús mbin Jesús kona, tsa nzhab Jesús lo re zha kuu ndeke dits Jesús:
―Wlipaa na nin lo goo, ¡neeka thib re tawlazaa zha Israel nyelaazt Diox taxal mbyi ree!
11 Wlipaa na nin lo goo, kwathoz tyen re zha kuu nagt zha Israel, kuu nzo dib naxta lo yezlyu, tob zha wu zha kon Abraham, kon Isaac ne kon Kob ta nabee Diox,
12 per lee re zha Israel kuu nak diiz tob ta nabee Diox, ndya gabil ta nakow na, ne tya gonn zha ne tub zha keley zha.
13 Tsa nzhab Jesús lo mbyi kuu nabee lo thib gayoo soldad:
―Tyee liza, tak ngwalaaza lee Diox tak tegwe, kona mgwe mosa.
Leeka ora lee mos soldad mgwe.
Jesús mtegwe kwathoz mbyiz
(Mr. 1:29‑34; Lc. 4:38‑41)
14 Tsa lee Jesús kon chop tson zha kuu ngeteed lo Jesús ngwa liz Pey, ne mwii Jesús lee xnaatsaap Pey ne ndak, nax lo luun ndak xlee.
15 Ne mzhen Jesús yaa zha, ne oraaka lee xlee mroo zha. Ne ngwache zha ne mndaa zha kuu ndow re zha.
16 Leettsa mkow yezlyu lee re men kuu nzo yezlyuʼa, myaadno kwathoz re zha lo Jesús, re zha kuu nzo mbi fyer leettsoo ne re zha kuu ndak choraa yiz, ne kon thibka lan diiz mloo Jesús re mbi fyer, ne noga mtegwe Jesús reta mbyiz.
17 Koree ngok, tsa mrolo kuu mkee profet Isaí zha ndala, leettsa nzhab profet: “Lee zha mbe reta yiz chaanaa ne re yalne chaanaa”. [Is. 53:4]
Re zha kuu nlaaz teke dits Jesús
(Lc. 9:57‑62)
18 Or mwii Jesús kwathoz men mrin dita lo Jesús, tsa mnabee Jesús lo re tsiibchop zha kuu ngeteed lo Jesús, tsa rid re zha tedib lad roo nitdoo, tsa roxkwan re zha.
19 Ne ora lee thib maestr kuu nloo xkiiz Diox mbig lo Jesús, ne nzhab:
―Maestr, nlazʼn teken ditsa loka pa ta yaʼa.
20 Ora mkab Jesús lo maestr, ne nzhab Jesús:
―Lee re mbeet nap maa kelyoo ta nyoo maa, ne lee re min nap maa lyaat maa; per lee na Kuu Mzin Ngok Men, neeka ta xoobʼn yekʼn roxkwan na naptʼn.
21 Tsa lee tedib zha kuu ngeteed lo Jesús nzhab lo Jesús:
―Zha Nabee, nlazʼn teken ditsa, per laa anta yelo kaatsʼn xutʼn.
22 Tsa nzhab Jesús lo zha:
―Bteke ditsʼn, laa kaats re zha kuu nyelaazt Diox re zha nguth.
Mbi ne nitdoo nzhon diiz lo Jesús
(Mr. 4:35‑41; Lc. 8:22‑25)
23 Tsa mke Jesús leen thib kano, ne noga re zha kuu teed lo Jesús nda kon Jesús, par rid re zha tedib lad roo nitdoo.
24 Per leettsa nda re zha lo nitdoo, tsa mroo thib mbi thoz, ne asta ndaab nit leen kano. Per lee Jesús ngoth ne mzhen mkaal Jesús.
25 Tsa lee re zha kuu ngeteed lo Jesús, mloo zha mkaal lo Jesús, ne nzhab re zha lo Jesús:
―Zha Nabee, laata luzhaa, tak ngelowgwaa leen nitdoo.
26 Jesús mkab ne nzhab:
―¿Chebee kwathoz nzeb goo? ¿Chebee lutta nyelaaz goo Diox?
Tsa ngwateli Jesús ne mkox mbi ne nitdoo lo Jesús, ne zheta ngok mbi ne nitdoo.
27 Reta zha kuu ngeteed lo Jesús kwathoz mzegey leettsoo zha, ne mbez zha lo altaa zha:
―¿Cho nak mbyi ree? ¿Chebee asta mbi ne nitdoo nzhon diiz lo zha?
Chop zha yez Gadara kuu nzo mbi fyer leettsoo
(Mr. 5:1‑20; Lc. 8:26‑39)
28 Leettsa mzin Jesús kon re zha kuu ngeteed lo Jesús tedib lad roo nitdoo, yezlyu chaan re zha Gadara, ne tya lee chop zha kuu nzo mbi fyer leettsoo, mroo leen re kelyoo ta nkaats zha re zha nguth, tya mtsow zha liz zha rop zha, ne mbig rop zha lo Jesús, ne kwathoz nakap nzhak zha, kona yent cho tak rid neta.
29 Ne mretsyath zha ne nzhab zha:
―¿Chaka ndyaad lo nee, Jesús Xgann Diox? ¿Chu ndyaada tetiʼa nee, leettsa terka tsin wiz kuu tetiʼa nee?
30 Gax tya nzi kwathoz nguch ngeyow.
31 Tsa lee re mbi fyer mnaab lo Jesús, ne nzhab:
―Os leeʼa kooʼa nee, taa diiz tab nee leettsoo re nguch baa.
32 Tsa nzhab Jesús:
―¡Gwa goo!
Ne lee re mbi fyer mroo leettsoo rop zhaʼa ne mndaab leettsoo re nguch. Ne oraaka mrozhonn re nguch ne mbix maa yek kedoo ngob maa leen nitdoo, ngwaap re maa nit ne thitanax nguth maa.
33 Oraaka lee re zha kuu nkenap re nguch mzhonn ndya, ne or mzin re zha yez, mndelo zha mndaa zha kwent re kuu ngok, kon rop zha kuu ngoo mbi fyer leettsoo.
34 Tsa reta zha yez mroo ngwa ta ndo Jesús. Ne or mwii re zha Jesús; mnaab zha lo Jesús, tsa roo Jesús yezlyu zha.