18
Mlux yez Babilonia
1 Leettsa ngwalo mriid re koree, tsa mwiin lee tedib mandad chaan Diox kuu nla xni ndyaadla lobee, kon kwathoz yalnabee, ne dita lo yezlyu mla xni chaan mandada.
2 Ne dib gan mandad mrez mandad ne nzhab mandad:
―¡Mluzha, mluzha Babilonia, kuu nak yez naro! ¡Ne myaane liz re mbi fyer, ne kelyoo ta nkaslo re mbi kuu nambit, ne lyaat chaan re min kuu nambit, kuu nkap leettsoo men ne men!
3 Tak reta zha kuu nzo re yez kuu nzi lo yezlyu, mnduz zha kon re kuu went kuu mtsow ngot, kuu ngok rop ngot kon re zha. Noga re rey kuu nzi lo yezlyu ngok rop kon ngot, ne re zha kuu ntho re kwaa lo yezlyu ree, ngok rik zha kon re kuu mndablaaz ngot.
4 Tsaraa mbin na tedib bos kuu mroo yibaa, kuu ne:
―Broo goo yez baa, re goo kuu nak zha yez da, tsa tsowt goo re kuu went kuu ntsow ngot baa, tsa diinnt goo re yalti kuu diinn ngot;
5 tak lee re falt chaan ngot ngwateyii ne ngwazhoob asta lobee, ne lee Diox mtelaaz re kuu went kuu mtsow ngot.
6 Bdix goo lo ngot taxal mtsow ngot lo goo; ne chop lal kuu mtsow ngot lo goo bdix goo lo ngot. Bchuuxnit goo chop lal kuu mndaa ngot ngwii tedib net men, ne btaa gooy lo ngot.
7 Ne leeka taxal mtsow nataak ngot leeka lee ngot, ne mtsow ngot reta kuu nlaaz ngot, leeka tata bteti goo ngot ne btegonn goo ngot; tak ntsow ngot xgab ne nzhab ngot: “Lee na ndobʼn taxal thib zha kuu nabee, ne nagtʼn byud ne neeka gonntʼn”.
8 Kona thibka wiz tsin reta yalti ree lo ngot, yalguth, yalne, win ne yeek ngot lo bel; tak lee Diox nap yalnabee naab kwent lo ngot.
9 Ne lee re rey yezlyu ree kuu ngok rop kon ngot, mnduz re zha kon re kuu went kuu mtsow ngot, gonn re zha ne kotse re zha, leettsa wii zha laann kuu ngeyeek ngota.
10 Ne tith to zha wii zha, tak tseb zha lo yalti kuu ngeriid ngota, ne gab re zha:
―¡Aka! ¡Kwathoz nalatt ngok yez Babilonia, yez kuu kwathoz ney! Per gatilta mzin yalti loʼa.
11 Ne noga re zha kuu ntho lo yezlyu gonn zha ne kotse zha por yeza, tak yent raa cho tii re kuu ntho zha;
12 kuu nak:
or,
plat,
relota ke kuu kwathoz chul na,
re ke kuu le perla,
re lar kuu wen,
re lar nzhuyy kuu nayi morad,
re lar nzhuyy kuu nayi nane,
reta ya kuu chul ndetsi,
reta kuu natexkwaa kon keley dant,
reta kuu natexkwaa kon re ya chul,
reta kuu natexkwaa kon brons,
reta kuu natexkwaa kon yiiben,
reta kuu natexkwaa kon ke kuu le mármol,
13 ne kanel,
relota yizh kuu chul ndetsi,
straak,
aseyt chaan ya kuu le mirra,
ne aseyt chaan ya olib,
xit ub,
aseyt,
arin,
nzob xtil,
way kuu nzhee yoo,
mbak zhiil,
kabay,
karret ne asta re mos kuu nak men.
14 Ne gab zha lo yeza:
―Lee re xle kuu kwathoz mndablaaza napt raa luy, ne lee re kuu nix ne re kuu nataak napt raa luy, ne neeka mas tsalt raa luy.
15 Lee re zha kuu ntho re koree, kuu ngok rik por yeza, tith to zha, tak nzeb zha lo yalti kuu mriid yeza, gonn zha ne kotse zha,
16 ne gab zha:
―¡Aka! ¡Kwathoz nalatt mzhaka yez Babilonia kuu kwathoz naro! Kuu mdok xab kon re lar nzhuyy kuu morad ne nane na, kuu mkeno re or ne re ke kuu kwathoz chul na.
17 ¡Ne gatilta mlux naroob yalrik!
Ne reta zha kuu ntetee bark, reta zha kuu nyoo bark, reta zha kuu nke tsiin leen bark ne reta zha kuu ntsanaa temi lo nitdoo, reta zha tith to zha;
18 leettsa mwii re zha laann kuu nguk yeza, ora mrezguth zha ne nzhab zha:
―¡Yent raa tedib yez taxal yez naro baa!
19 Ne mchoon zha di yek zha, nzhonn zha, mbetse zha ne nzhab zha:
―¡Aka! ¡Kwathoz nalatt nzhak yez naro baa! Kon yalrik chaan yez baa, ngok rik reta zha kuu mkeno bark. ¡Ne gatilta mlux yez baa!
20 Naley bloo goo leettsoo goo, reta goo kuu nzo yibaa por yez baa, ne naley bloo goo leettsoo goo, re goo kuu nak apóstl, re goo kuu nak profet ne reta goo kuu nak zha Diox; tak lee Diox mnaaba kwent lo yez baa, tak mteti yez baa goo.
21 Tsa lee thib mandad chaan Diox kuu kwathoz ney mzhen thib ke, taxal thib ke molin, ne mlobi zhay lo nitdoo, ne nzhab zha:
―Leeka tabaa lux yez Babilonia kuu naro, ne thitanax wiit raa zhay.
22 Neeka mas gont raa men gol zha arp leen yez baa, neeka flaut, ne neeka trompet; neeka tedib zha kuu nke tsiin yot raa yez baa, neeka bi chaan molin ket raa leen yez baa.
23 Ne neeka yot raa xni kuu teni yez baa, neeka yot raa yaltseya yez baa, tak lee re zha kuu mtho leen yez baa, re zhaʼa ngok zha ney ne zha ro lo yezlyu, ne kon yalwez chaan yez baa, mkedi yez reta yez kuu nzi lo yezlyu.
24 Ne leen yez baa mzal ren chaan re profet, ren chaan re zha kuu nak zha yez chaan Diox, ne ren reta zha kuu nguth dita lo yezlyu.