22
Yoo ne ya chaan yalnaban
Tsa lee mandad mloo thib yoo nambi lon kuu nzo nit kuu nak chaan yalnaban. Kuu nambi na taxal bidr, ne ta ndob Diox kon Mbak zhiil tya ndrooy. Ne ndrol kay chaan yeza ndriid yoo, ne rop lad roo yoo, ndo thib ya kuu ndaa yalnaban, kuu ndaa tsiibchop klas xle ne kad mbee ndaay thibga klas xle. Ne lee la ya nlortsin par gwe reta zha kuu kwin tya. Yot raa yalde tya. Ne lee ta ndob Diox nabee Diox kon Mbak zhiil tob leen yeza, ne reta zha kuu ntsow rtsin Diox gol lo Diox tya. Ne tya wii re zha lo Diox ne ke le Diox yeklo re zha. Yot raa yaal tya; ne reta zha kuu yo tya, ya nandechet raa zha xni kandil, neeka xni wiz; tak lee Diox kuu nak Zha Nabee teni lo re zha, ne lee re zha nabee thitanax.
Ndetsin gaxa lee Jesucrist yaad
Ne lee mandad ne lon:
―Reta diiz ree wliy ne ndoblo yelaaz re mene. Ne Diox kuu nak Zha Nabee, kuu mtaal Mbi Nayon mteni re profet, lee Diox mtaal mandad loo lo re mos Diox re kuu mera gak.
Jesús ne:
―¡Mera yalʼn! ¡Wen nda re zha kuu nzhon diiz, re diiz kuu nke lo libr ree!
Na Juan, mbin na ne mwiin re koree, ne mtobxubʼn xann nii mandad kuu mloo re koree lon, par golʼn lo mandad. Per lee mandad ne lon:
―Tsowta kobaa. ¡Lo Diox btobxub! Tak lee na nakʼn mos Diox taxal lu ne taxal re wetsa, re zha kuu ngok profet ne reta zha kuu nzhon diiz lo re diiz kuu nke lo libr ree.
10 Noga ne mandad lon:
―Kaatsta re diiz kuu nke lo libr ree, tak ndetsin gaxa wiz kuu lee reta koree gak. 11 Loka zha kuu ntsow kuu went, tatsowka zha kuu went, ne lee re zha kuu ntsow kuu nambit, tsowka zha kuu nambit; ne lee re zha kuu ntsow kuu wen, tatsowka zha kuu wen, ne lee re zha kuu nali nak ne nzhon diiz lo Diox, ndoblo gonka zha diiz lo Diox.
12 Lee Jesús ne:
―¡Mera yalʼn! Ne tan lo re zha taxalta kuu mtsow zha gan, taxalta kuu ndoblo zha por re kuu mtsow zha. 13 Na nak taxal letr kuu ner ne letr bluz, na nak kuu ner ne na nak kuu bluz, na nak kuu mndelo ne na nak kuu luux.
14 ’Wen nda re zha kuu nteech xab, tsa ndoblo zha tab zha wu zha xle chaan ya yalnaban, ne par tak tab zha roo pwert yeza. 15 Per lee re zha kuu nak taxal mbak yaan lee; re zha kuu nak wez, re zha kuu nzhak rop kon ndota zha, re zha kuu nzhuth men, re zha kuu nyelaaz re diox kuu nagt Diox, ne reta zha kuu nyow leettsoo kedi.
16 ’Na Jesús mtaalʼn mandad da, par mndaa kwent re koree lo re zha da. Na nak kuu mndelo raz chaan David, ne na nak mbel gwiiy kuu nziib zhaaraa na.
17 Ne lee Mbi Nayon ne tsaal Mbak zhiil Diox mbez:
―De.
Ne loka cho gone ndoblo gab:
―De.
Ne loka cho nzheek leettsoo ne nlaaz yaad gu nit, na gap lo zha:
―De, guʼa nit kuu nak chaan yalnaban tbaata.
18 Na ni lo reta zha kuu nzhon re diiz kuu nke lo libr ree, kuu ndaa kwent re kuu gak: Os lee thib zha ntsin leettsoo ne kyaal zha thib re diiz kuu nke lo libr ree, leeka tata lee Diox taal re yalti kuu nke lo libr ree lo zhaʼa. 19 Ne os lee thib zha kib thib re kuu nke lo libr ree, kuu ndaa kwent re kuu gak, lee Diox kib kuu ndoblo zha kayaa zha lo ya kuu nak chaan yalnaban, ne taat Diox diiz tab zha yez kuu nteth libr ree.
20 Lee zha kuu mndaa kwent re koree, ne:
―¡Mer thoza yalʼn!
¡Tbaa gake! ¡De Jesús, Zha Nabee!
21 Nlazʼn lee Jesús Zha Nabee loʼaa taa yalwen chaan lo re goo.
¡Tbaa gake!
Juan