3
Xomod ndoblo gak re zha gol lo re zha kuu yelaaz Jesús
1 Wlipaa na koree, os lee thib zha nlaaz gak zha gol kuu nabee lo re zha kuu nyelaaz Jesús, kwathoz wen kuu ntsow zha xgab tsow zha.
2 Kona lee re zha kuu nak zha gol kuu nabee lo re zha kuu nyelaaz Jesús, ndoblo gak zha:
zha nali, tsa neeka thib men gabt lee zha ntsow kuu went,
ndoblo gak zha, zha mkaa thibka ngot,
ndoblo gak zha, zha nali lo reta kuu ntsow zha,
ndoblo gak zha, thib zha kuu ngobee, kuu nali ntsow xgab taxal ndobloy,
ndoblo gak zha, zha nzhon men diiz lo,
ndoblo gak zha, zha taa liz kwet re men,
ndoblo gak zha, thib zha kuu tak taa kwent xkiiz Diox lo re men.
3 Ndoblot gak zha, zha gwiy,
ndoblot gak zha, zha nkwaan zhoo,
ndoblot gak zha, zha ndablaaz temi,
sinke ndoblo gak zha, zha wen,
ndoblo gak zha, zha kwaan kwin wen re men.
4 Ndoblo gak zha thib zha kuu nzhaak nabee lize,
ne tsow zha gon re zhiinn zha diiz lo zha,
noga zhiinn zha ndoblo wen gak lo re men.
5 Tak os lee zha gagt zha nabee zha liz zha, ¿xomod nabee zha lo re zha kuu nyelaaz Jesús?
6 Kona lee zha kuu nabee lo re zha kuu nyelaaz Jesús, ndoblot gak zha thib zha kuu penta ngwalaaz Jesús, tak cha tsow yalrub gan lo zha, ne la zha lo kuu went ta mla Maxuuy, ne naab Diox kwent lo zha, taxal mtsow Diox lo Maxuuy.
7 Noga ndoblo gak zha thib zha kuu ndediz wen re zha kuu nyelaazt Jesús, tsa thoyt zha lo re men, ne lat zha lo kwa chaan Maxuuy.
Xomod ndoblo gak re zha kuu ntsow ayud re zha kuu nyelaaz Jesús
8 Leeka tata, ndoblo gak re zha kuu ntsow ayud re zha kuu nyelaaz Jesús:
ndoblo gak zha, zha wen lo re men,
ndoblo tsow zha kuu ni zha,
ndoblot gak zha, zha gwiy,
neeka gagt zha, zha ndablaaz temi.
9 Ndoblo yelaaz zha Jesucrist taxal mloo Diox lo reʼaa,
ne thibka nambi keno zha xgab zha lo re kuu tsow zha.
10 Ner ner ndoblo tsow zha thib tsiin, os lee zha wen tsow zhay, os neeka thib men gabt lee zha went mtsowe, tsaraa ndoblo gak zha thib zha kuu tsow ayud re zha kuu nyelaaz Jesús.
11 Ne leeka tata ndoblo gak re ngot:
ndoblo gak zha, zha wen,
gagt zha, zha ndediz diiz yizh,
ndoblo gol gak zha,
ndoblo nali gak zha lo re kuu tsow zha.
12 Ne reta zha kuu ntsow ayud re zha kuu nyelaaz Jesús ndoblo tenzhee gak zha:
ndoblo gak zha, zha mkaa thibka ngot,
ne ndoblo wen nabee zha lo re zhiinn zha ne lo re zha kuu nzo liz zha.
13 Tak lee re zha kuu ntsow ayud re zha kuu nyelaaz Jesús kuu wen ntsow rtsin, ntsow zha gan wen ndediz re men zha, ne tabaa tak taa zha kwent chaan Jesucrist kon dib ndroo leettsoo zha lo re men, tsa yelaaz re men Jesucrist.
Kuu wli kuu nyelaazaa
14 Ngekeen re koree loʼa; tegal ndakʼn mera yatwiin loʼa,
15 tsa os leen tsan na, ndoblo neʼa naa xomod tsowa lo re zha kuu nyelaaz Jesús, re zha kuu nak zhiinn Diox kuu naban. Lee re zha Jesús nak taxal thib yato kuu nden yuu tsa ney nay, ne ntsow re zha tsa tseet re men kuu wli chaan Jesús.
16 ¡Kona kwathoz naro nak kuu ngogaats, kuu mloo Diox lo reʼaa zha kuu nyelaaz Jesucrist! Kona tenzhee niʼaa:
Jesucrist myaad ngok men lo yezlyu ree,
ne lee Mbi Nayon chaan Diox mloo nali nak zha,
ne lee re mandad Diox mwii zha,
ne lee reta men kuu nzi dib naxta lo yezlyu mbin kwent chaan zha,
ne naroob men kuu nzi dib naxta lo yezlyu ngwalaaz zha,
ne mkayaa Diox zha yibaa ta kwathoz nke xni.