5
Xomod ndoblo gak re zha kuu nyelaaz Jesús lo re men
Ndoblo kox re zha gol loʼa, sinke bteni zha taxal xuta; lo re mndyeen bni lo zha taxal lo re wetsa, lo re ngot gol tsow taxal lo xnaaʼa, lee lo re mndyeen got tsow taxal lo btana, ndoblo nambi toʼa lo re zha.
Btsow ayud re ngot byud, kuu napt cho tsow ayud. Per os lee thib ngot byud nap zhiinn o zhot, re zhaʼa ndoblo tsow ayud zha, tak lee zha nak zha liz ngota ne tak lee ngot byuda mkenap zha ner. Tak koree nak kuu wen kuu nyow leettsoo Diox. Per lee ngot kuu wlipaa myaan byud, ne myaan zha thita zha, thibka ngebet zha lee Diox tsow ayud zha, ne thibka ndediz zha lo Diox ne nzhool zha lo Diox tse ne yaal. Per os lee thib ngot byud ntsow loka kuu nlaaz, tegal naban per taxal zha nguth nak zha. Bnabee re koree lo re zha kuu nyelaaz Jesús, tsa yent kwan keki re men zha. Os nzo cho zha ndat leettsoo zha por re zha liz zha, ne re zha kuu nzo liz zha, tabaa mod nloo zha nyelaazt zha Diox, ne mas went nak zha nake thib zha kuu nyelaazt Diox.
Lo yeets ta ke lee re ngot byud,
beeta ndoblo ke le re ngot kuu nap masraa tson gal liin,
ne ndoblo gake ngot kuu mkeno thibka tsaale.
10 Ndoblo nlebee re men zha por re kuu wen kuu mtsow zha:
os wen mxeen zha re zhiinn zha,
os mndaa zha liz zha mlet re zha kuu mzin liz zha,
os mteech zha nii re zha kuu nyelaaz Jesús,
os mtsow zha ayud re zha kuu mzhakti
ne os thibka ngoo yek zha mtsow zha kuu wen.
11 Per keeta le re ngot byud kuu yeen lo yeets, tak lee kwerp zha cha tsow gan lo zha, ne laa zha Jesucrist, ne nlaaz zha tseya zha tedib welt, 12 ne taa zha falt tak mtsowt zha kuu nzhab zha lo Diox, leettsa ngwalaaz zha Jesucrist. 13 Noga nyey zha nzhak tsaab zha, ne nda zha liz thib men ne tedib men; ne nagt beeta nyaan tsaab zha, noga nzhak zha, zha ndediz diiz yizh, ne ndaab zha ndediz zha re kuu ndoblot tediz zha. 14 Kona nlazʼn lee re ngot byud kuu yeen, mas wen tseya zha, tsa gap zha zhiinn zha, ne nabee zha liz zha; ne taat zha diiz lo Maxuuy par tsow zha kuu went. 15 Tak nzo chop tson ngot byud, mlaa zha Jesucrist ne mndeke zha dits Maxuuy.
16 Ne os cho thib zha kuu nyelaaz Jesús, nap zha thib ngot byud liz zha, ndoblo tsow zha ayud zha, tsa nagt tedib net re zha kuu nyelaaz Jesús tsow ayud zha, tak lee re zha kuu nyelaaz Jesús, ndoblo tsow ayud re ngot byud kuu wlipaa ndechey.
17 Lee re zha gol kuu wlipaa wen nabee lo re zha kuu nyelaaz Jesús, re zha kuu nloo ne ndaa kwent xkiiz Diox, ndoblo gon re men diiz lo zha. 18 Tak lo xkeets Diox nzhab: “Kota yex roo ngon leettsa nyoo ngon leen ye tsa toni maa nzob xtil”. [Dt. 25:4] Noga nzhab lo xkeets Diox: “Lee zha kuu nke tsiin ndoblo gax kaa zha”. [Lc. 10:7]
19 Yelaazta kuu nkeki zha thib zha gol kuu nabee lo re zha kuu nyelaaz Jesús, os thibka zha nkeki zha. 20 Per lee re zha kuu ngetsowka kuu went, ndoblo kox zha loʼa lo re men, tsa noga tedib net zha tseb zha ne tsowt zha kuu tata. 21 Nabeen loʼa Tim ne ngenin diiz ree loʼa delant lo Diox, lo Jesucrist ne lo re mandad kuu mli Diox, thibka btsow re koree; ne yota fabor thib zha ne tedib zha, sinke lalka btsow lo reta men.
22 Wen wen btsow xgab, leettsa xooba yaaʼa yek thib zha kuu gak zha gol, kuu nabee lo re zha kuu nyelaaz Jesús, ne nayoblaazt leettsooʼa xooba yaaʼa yek zha, tsa gagta zha kuu nap falt lo falt chaan tedib zha, ne nambi bto lo Diox.
23 Ne tak nlaaz leettsooʼa kona guta beeta nit, noga gwii lut xit ub kuu myal.
24 Nzo cho zha kwathoz nambi nloo falt chaan zha, leettsa terka naab Diox kwent lo zha, per nzo zha nloot falte nal, asta bluz tsaraa loy. 25 Leeka tata kwathoz nambi nloo re kuu wen kuu ntsow re men; ne tegal nzo kuu went kuu nloot nal, tetsin wiz leey loo.