3
Xomod gak re men re wiz bluz
1 Noga ndoblo neʼa koree: Lee re wiz bluz kwathoz nagan gak,
2 tak tabaa gak re men:
leeka lee zha rub zha zha,
tablaaz zha temi,
rub zha,
naro gak zha,
kode zha Diox,
gont zha diiz lo xut zha ne lo xnaa zha,
taat zha texkix lo Diox,
neeka tsow nataagt zha Diox.
3 Ket leettsoo zha taben zha,
latta leettsoo zha ne zha taben zha,
looz zha taben zha,
ne tsowka zha re kuu nlaaz kwerp zha,
kwathoz nakap gak zha,
ne yii zha ne zha reta kuu wen,
4 kedi zha re zha kuu nzaal leettsoo zha,
tsebt zha tsow zha kuu went,
legal ndrub zha,
ne kwaan zha re kuu nlaaz zha kuu nak kuu yezlyu ree,
per kwaant zha Diox.
5 Ne tsow zha taxal zha kuu nali naban lo kuu wli,
kuu nak ban men taxal nlaaz Diox,
per kon re kuu ntsow zha nloo nyelaazt zha Diox.
Beche lo re zhaʼa.
6 Tak xid re zhaʼa nzo re zha kuu ndiy thib yuu tedib yuu, ne nkedi zha re ngot kuu nagant kedi zha, re ngot kuu kwathoz ndaa falt, ne thibka ntsow zha xgab tsow re kuu went.
7 Re ngota ntsow taxal zha kuu ngeteed, per gagt yen zha kuu wli.
8 Ne leeka taxal ngok bi Janes rop Jambres lo Moisés, leeka tata nzhak bi re zhaʼa lo kuu wli. Ne nak zha mbyi kuu went xgab, ne ngwatsaa xgab re zha, tak mlaa zha ngwalaazt raa zha Jesucrist.
9 Per tsint zha tith, tak reta men ne lee zha nak zha bxen, leeka taxal mzhaak rop zha kuu ngok bi lo Moisés.
Kuu mnabee Paba lo Tim
10 Tim, per lee lu wen ndekeʼa dits re kuu mloon loʼa taxal naban na, taxal tsowʼn ne neʼa lu naa kwan nlazʼn tsowʼn. Noga neʼa lu naa xomod nyelazʼn Jesucrist, xomod nxek leettsoon nen re men, ne xomod nke leettsoon re men.
11 Noga neʼa lu xa mxekʼn mriidʼn yalti, leettsa mreke re men ditsʼn yez Antioquía, yez Iconio ne yez Listra, ne lo reta yalti kuu mriidʼn tya, lee Zha Nabee mtelaan.
12 Ne reta zha kuu nlaaz nali ban lo Jesucrist, teriid zha yalti tereke re men dits zha.
13 Per lee re zha kuu went nak, ne re zha kuu nkedi, masraa thibka ntsow zha kuu went ne nkedi zha re men ne lee re men nkediga zha.
14 Per lee lu, thibka nali bto lo re kuu mteeda, kuu wen neʼa naa xomod nak. Ne wen neʼa naa cho mlooy loʼa.
15 Ne desde lutta, neʼa lu naa kwan nak xkiiz Diox. Ne leey tak loo loʼa, ne tenoy lu lo yalnaban kuu thitanax, tak nyelaaza Jesucrist.
16 Reta diiz kuu nke lo xkeets Diox, yek Diox mbrooy ne nake taxal leeka lee Diox nzhabe lo re zha kuu mkeey, ne nlortsine:
tsa nteteede re men,
tsa nkox re men loy,
tsa nteliy re men,
tsa nteniy re men,
tsa nlooy lo re men naa xomod nali ndoblo ban re men lo Diox.
17 Tsa lee re zha kuu nak zha Diox, thitanax gak zha, zha nali lo Diox, zha ngobee ne ndoblo wen ne zha naa xomod tsow zha, reta kuu wen kuu nlaaz Diox.