2
Xkiiz Diox nak kuu wli
1 Reta kuu looʼa ndoblo gake taxal nak kuu wli kuu nyelaazaa.
2 Lee re zha byi gol kuu nyelaaz Jesús, ndoblo teteeda zha:
ndoblo nali gak zha lo re kuu ntsow zha,
ndoblo gon re men diiz lo zha,
ndoblo gak zha, zha ngobee kuu nali ntsow xgab,
ndoblo gak zha, zha ney ndo nyelaaz Diox,
ndoblo gak zha, zha nkeno yalnkelaaz,
ndoblo gak zha, zha nxek leettsoo.
3 Leeka tenzhee ndoblo teteeda re ngot gol kuu nyelaaz Jesús:
ndoblo gol tsow zha lo kwent chaan Diox,
ndoblo gak zha, zha ndedizt diiz yizh,
ndoblot gak zha, zha gwiy,
ndoblo loo zha kuu wen,
4 ne ndoblo loo zha lo re ngot mndyeen,
kelaaz ngot tsaal ngot ne re zhiinn ngot,
5 tsa kobee re ngot re kuu tsow ngot,
ndoblo nambi gak ngot,
ndoblo wen kenap ngot liz ngot,
ndoblo wen gak ngot,
ndoblo gon ngot diiz lo tsaal ngot.
Tsa neeka thib men loozt xkiiz Diox.
6 Leeka tata ndoblo kox re zha mndyeen loʼa, tsa kobee zha naa kwan ntsow zha.
7 Ne lo reta kuu ntsowa ndoblo looʼa wen naka, tsa ne re zha naa xomod ndoblo ban zha. Ne leettsa ngelooʼa lo re zha, btsowe taxal ndoblo tsow luy, ne nali btsowe tsa gon re zha diiz loʼa.
8 Ne ndoblo tediza taxal ndobloy, tsa yent cho kekiʼa, ne tsa thoy re zha kuu nayii neʼaa ne yent kwan keki zha lee.
9 Bteni re zha kuu nak mos, tsa gon zha diiz lo reta kuu nabee patron zha lo zha, ndoblo gon zha diiz kon dib ndroo leettsoo zha, ne ndoblot kab roo zha lo patron zha.
10 Ndoblot lowann zha lo zha kuu nke zha tsiin, sinke ndoblo nali gak zha lo patron zha lo reta kuu ntsow zha, tsa kon kuu ntsow zha reta men ne kwathoz wen nak xkiiz Diox kuu nlooʼaa; Diox kuu mtelaaʼaa.
11 Ne nal mlooʼa Diox yalwen chaan Diox lo reta men lo yezlyu ree, tak mndaa Diox yalnaban kuu thitanax par re men.
12 Lo yalwen chaan Diox, mloo Diox loʼaa ndoblo laaʼaa re kuu went, re kuu ndablaaz kwerp yezlyu ree; ne ndoblo kobeeʼaa re kuu tsowaa lo yezlyu ree, tsa nali ne wen banaa taxal nlaaz Diox.
13 Ne ngebetaa gak kuu wen kuu ne Diox gak, leettsa yaad Jesucrist kuu mtelaa reʼaa kon kwathoz yalney chaan zha lo xni thoz chaan zha, ne lee zha nak Diox reʼaa Zha Nabee.
14 Mndaa zha leeka lee zha nguth zha kwentaa, mtelaa zha lee lo re kuu went kuu mtsowaa ne mtembi zha lee thitanax, tsa gakaa zha zha, kuu thibka kon dib ndroo leettsoo ntsow re kuu wen.
15 Koree nak kuu ndoblo looʼa, bteni re zha ne ndoblo kox re zha loʼa kon yalnabee. Ne taata diiz gont zha diiz loʼa.