10
Men ne rapkwent mëkzhiil
1 ’Nligue yna noo lo de yra de ne men ne rdeedet nes ruxloo mëkzhiil, sinke wren nes ledne rdee men, ngbaan men,
2 per le men ne rdee nes ruloo, men guin nak ne rapkwent mëkzhiil.
3 Men ne zunap ruxloo maa, laa men rxalo chen tee men ne rapkwent maa, no chene rbëz men ma por la maa, rnebeey ma xrëz men, lex rboo men maa.
4 No chene che wboo men ma yra maa, rzaner men lo maa, lex ranal ma men porke rnebeey ma xrëz men.
5 Per ranaldet ma mén ne rnebeeydet maa xrëz, lel rzhoon ma lo men porke rnebeeydet ma xrëz men.
6 Wzëët Jesus neree zegnak te kwent lo men ne nak farisew, per wdeedet men kwent gan pe rna we.
Jesus nak zegnak men ne wen rapkwent mëkzhiil
7 Lex wnii Jesus lo men ste, re Ne:
―Nligue yna noo: Noo nak zegnak ruxloo mëkzhiil.
8 Yrandxee mén ne wdxiid kwlodee ke lo noo, ngbaan men; yra men ne nak xpén noo wondet men xdiiz mén guin.
9 Noo nak zegnak ruxloo mëkzhiil; men ne tee ruloo guin ne nak noo, sláá men lo dol. No gak men zegnak mëkzhiil ne rruu rdeetee ruloo chen tsël ne gu maa.
10 ’Ngbaan, noze por ne kwan men zëëd men no por ne yket men no por ne yluzh men. Per le noo zëëd noo por ne gap de gyelembán ne nunk luzhdet.
11 Noo nak zegnak men ne wen rapkwent mëkzhiil; men ne wen rapkwent mëkzhiil, rboleedx men xgyelembán men por laa maa.
12 Per le men ne rapkwent mëkzhiil noze por ne rdeben men med, chene rwii men ne le lob za, rzhoon men, rsantegue men mëkzhiil, porke nakdeto xdxiin men no let xpëkzhiildet men maa. Lex rdxiin lob rnëëz lob ma rket lob ma, le stebëd ma noze rrëëts.
13 Rzhoon men porke noze por ne rdeben men med rapkwent men maa, zadet ma lextoo men.
14 ’Noo nak zegnak men ne wen rapkwent mëkzhiil; zegne rnebeey noo xpëkzhiil noo no rnebeey ke ma noo,
15 zenga ke rnebeey Xuz noo noo no rnebeey ke noo Xuz noo. No axtegue rboleedx noo xgyelembán noo por xpëkzhiil noo.
16 Rap ke noo stebëd mëkzhiil ne nuudet lenlooree; rap noo degne tsaxii no maa, zon ma xdiiz noo, saktes ma yra maa no tebegue men ne gapkwent maa.
17 ’Ryaan Xuz noo noo porke sdee noo si yket mén noo chen yban ke noo.
18 Rut rgyitxeedet xgyelembán noo, sinke xkwent zhal noo ydee noo si yket mén noo. Rap noo poder ne ydee noo si yket mén noo no ne yban ke noo, porke zenga wnebééy Xuz noo lo noo.
19 Chene won men-Israel yra diizree, wzelo men noze wren wren ne rnii men ste.
20 Ndal men re:
―¿Penak rukas de men, si menzab nuu lextoo men, nzël men?
21 Per nuu ke zeg men re:
―Ni te mén ne nuu menzab lextoo rundet gan ynii zegwa. ¿Peguin zun menzab gan ylaa ne gyenii bzalo menngwlëë?
Tebegue nak Jesus yrup Ne Dëdyuzh
22 Tyemp ne rak nal chene kalaa men-Israel xelni xeydoo Dëdyuzh Jerusalén,
23 wa Jesus lenydoo. Ne wdee Ne nes ledne la xKordor Salomón,
24 wbig yra men-Israel noze kbii Ne, lex re men lo Ne:
―¿Pa axtegue or kwë́z gutxup de lextoo noo? Guninli belne laa de nak Crist.
25 Wke Jesus, re Ne:
―Che na noo we, per rlaleedxdet de noo. Yra ne rlaa noo por xpoder Xuz noo, laa we rbonyoo gan txu nak noo.
26 Per laa de rlaleedxdet do porke nakdet de xpén noo.
27 Yra men ne nak xpén noo rnebeey men xrëz noo no rnebeey noo men no rdxidnal men noo.
28 Noo rdee gyelembán ne nunk luzhdet lo men, no ydxiindet dxe ne luzh men, ni rut gundet gan ygyitxee men lo noo.
29 Laa Xuz noo wniiz men lo noo, kesentyent rap me poder, no rut gundet gan ygyitxee men lo me.
30 Noo tebegue nak noo yrup noo Xuz noo.
31 Lex wgoob men-Israel gye ste ngugye men Jesus.
32 Orguin re Jesus:
―Ndal ne wen wlaa noo nes lo de yra de por xpoder Xuz noo. ¿Gonezhe wyandet de byen ne gugye de noo?
33 Wke men-Israel, re men:
―Gugyedet noo de por ne wen ne wlaa de, sinke por ne rnii de diznyaan por Dëdyuzh. Porke noze mén nak de, no le de rsak de Dëdyuzh.
34 Lex re Jesus:
―¿Pe let redet lo ley ledne re Dëdyuzh: “Noo re ne dëdyuzh nak de yra de”?
35 Nan be ne nuudet ykedxnruu be logne re lo xgyiich Dëdyuzh, no laa Ne nak ne re ne dëdyuzh la yra mén ne wseleedx Ne xdiiz Ne lo.
36 No belne Dëdyuzh Xuz noo wzu noo no laa Ne wxaal noo gyëzlyu, ¿penak na de ne noo rnii diznyaan por laa Ne, por ne na noo XPee Dëdyuzh nak noo?
37 Belne let xdxiindet Xuz noo kalaa noo, ylaleedxdet de noo.
38 Per belne laa we kalaa noo, nyaalzhe ylaleedxdet de noo, per gulaleedx ne rlaa noo, chen gaknan de no le ylaleedx de ne Xuz noo raknonen noo no ne noo raknonen Xuz noo.
39 Orguin wlaan men nnëëz men Jesus ste chen nzano men Ne, per wundet men gan.
40 Lex za Ne stebkoo gyow-Jordán ste ledne wkatxobnis Xwa mén primerendxee, nga wkaa Ne.
41 Ndal mén wa lo Ne, lex rulsaa men diiz, re men:
―Nli ne ni te gyelmilaguer wlaadet Xwa, per yrandxee ne wzëët Xwa por ménree, nli we.
42 Nga wlaleedx ndal mén Ne.