7
Rlaleedxdet yra bech Jesus Jesus
1 Wluzh wak yra neguin, wa Jesus wkaa Ne lo lyu ne la Galilea; wlaandet Ne nya Ne nkaa Ne lo lyu ne la Judea porke kaye men-Judea gan pezee yket men Ne.
2 Per kom che wyob lni ne rlaa men-Israel ne ruu men lenguezh,
3 lex re yra bech Ne lo Ne:
―Guruu nee, gutsa Judea chen no ke yra xpén de ne nuu Judea kwii yra gyelmilaguer ne rlaa de.
4 Porke belne rlaan me ne gaknan mén ne rlaa me, ylaadet mo ngueedx. Laague ne rlaa de gyelmilaguer, gulaa we nes lo yrandxee mén.
5 Re yra bech Jesus zenga, porke ni laa men rlaleedxdet men Ne.
6 Orguin re Ne lo men:
―Gardet ydxiin xor noo, per por laa de yra de kwaskyertee or wen rzak de.
7 Laa de yra de yët gan pe kwentzhe kwinyaan mengyëzlyu de, per noo por ne rzëët noo lo men ne ngyidet ne rlaa men, por neguin rwinyaan men noo.
8 Gutsa lni yra de; noo tsadetgue noo, porke gardet ydxiin xor noo.
9 Wluzh re Jesus zenga, wyan ke Ne lo lyu ne la Galilea.
Wa ke Jesus lni
10 Per chene che zase yra bech Jesus, no ke Ne za lni guin, mase rut waknandeto, sinke legue ngueedx za Ne.
11 Zad wkaye yra men-Israel Ne lo lni guin, re men:
―¿Gozh mén guin, bes?
12 Ndal mén ne wa lni guin noze wren wren ne rnii men por laa Ne. Gwrol men re: “Menwen men.” Gwrol zeg men re: “Nakdet men menwen, noze rkade men mén.”
13 Per ngueedxendxee ruu men xdiiz Ne por ne rdxe men men ne rnebééy lo men-Israel.
14 Che wrool ne kayak lni, wdee Ne lenxeydoo Dëdyuzh, wzelo Ne wneluu Ne men-Israel.
15 Ne won men yra ne kaneluu Ne men, kesentyent wzee wzak men, re men:
―¿Pezee wlaaleg ménree ne kesentyent ndal ne nan men, no ni wseedet men?
16 Wke Ne re Ne:
―Ne kaneluu noo nakdeto xdiiz noo, sinke le we nak xdiiz Dëdyuzh, laa Ne wxaal noo zëëd noo.
17 Mén ne rlaan ylaa ne rlaan Dëdyuzh, zaknan men belne xdiiz Dëdyuzh rneluu noo o noze xkwent noo rlaa noo we.
18 Mén ne rnii noze xkwent men, rlaa meno chen saknon mén men; per le men ne rye gan pezee saknon mén Dëdyuzh ne wxaal men zëëd men, men guin rnii teblose diznli, nunk rkadedet men.
19 ’¿Pe let wniizdet Moises ley lo de, no ni te de rlaadet zegne zëëd lo we? ¿Pezee ne rlaan de yket de noo?
20 Wke yra mén, re men:
―Menzab nuu lextoo de. ¿Txuzh rlaan yket de?
21 Lex wke Jesus, re Ne:
―Por te gyelmilaguer ne wlaa noo rzee rzak de yra de.
22 Per le laa de mase dxe ne rne be, rguu de mëdbee beey zegne wkyeen Moises (mase let Moisesdet wneselo we, sinke che axtegue xpenkwlal be rlaa we).
23 Belne por ne gun de kumplir ne zëëd lo ley ne wdee Dëdyuzh lo Moises nak ne rguu de mëdbee beey mase dxe ne rne be, orrenaa bes, ¿penak rlaa de lo noo ne wneseyaken noo te mén dxe ne rne be?
24 Yleedxdet de mén noze zegne rnaa men, sinke primer gugaknanwen gan pezee nak men.
Wzëët Jesus gan pazh wruu Jesus
25 Lex wzelo tebëd men-Jerusalén rnabdizlsaa men, re men:
―¿Pe let laadet ménree nga kaye mén chen yket mén men?
26 No le men zu nee rnii men nes lo yra mén, no ni te mén bet redet lo men. ¿Peguin che wlaleedx xtis ne laa ménree nak Crist?
27 Per laa be nanwen be gan txu ménzhe nak ménree. Per le chene chiid Crist, rut gaknandet gan txu ménzhe gak Ne.
28 Por neguin or ne kaneluu Jesus lenxeydoo Dëdyuzh, ndípse re Ne:
―¡Re de ne rnebeey de noo no nan de gan txu ménzhe nak noo! Per noo zëëdet noo noze xkwent zhal noo, sinke laa Dëdyuzh ne axtegue rkadedet wxaal noo zëëd noo, no rnebeeydet de Ne.
29 Noo rnebeey noo Ne, porke lo Ne wruu noo no laa Ne wxaal noo zëëd noo.
30 Orguin wlaan men nnëëz men Jesus chen nzano men Ne, per ni te mén wbigdet nnëëz Ne porke gardet ydxiin xor Ne ne yzuun Ne.
31 Per ndal mén ne ndxin nga wlaleedx Ne, lex re men lo men ne wlaleedxdet Ne:
―¿Pe nuu lextoo de ne chene chiid Crist, ndaldee gyelmilaguer ylaa Ne ke ne rlaa ménree?
Rye yra men ne nak farisew gan pezee yzuun Jesus lo men
32 Ne won yra men ne nak farisew ne re yra mén guin zenga, lex waken men yra men fxuz ne rnebééy lo yra fxuz wxaal men men ne rapkwent xeydoo Dëdyuzh chen ynëëz men Jesus.
33 Orguin re Jesus:
―Xchedetre ykaa noo lad de yra de, che wyob ke yberee noo lo Dëdyuzh ne wxaal noo zëëd noo.
34 Skaye de noo, per tsëldet noo lo de, porke gakdet tsa de ledne gya noo.
35 Lex wzelo yra men-Israel rnabdizlsaa men, re men:
―¿Pazh gya ménree ne gundet be gan tsël men lo be? ¿Peguin sya men lo yra men-Israel ne nunrëëts lad yra mén ne nakdet men-Israel chen yneluu men mén ne nakdet men-Israel?
36 ¿Pagox rna neree ne na men: “Skaye de noo, per tsëldet noo lo de, porke gakdet tsa de ledne gya noo”?
Nis ne rguu gyelembán
37 Ne lultim dxe lni nak dxe ne mazre nondee. Dxe guin wzuli Jesus, ndípse re Ne:
―Belne nuu mén rlaan goo nis, chiid men lo noo, noo ydee nis goo men.
38 Zegne re lo xgyiich Dëdyuzh, lextoo men ne rlaleedx noo ylen nis ne rguu gyelembán.
39 Neree ne re Jesus, rna we ne yra mén ne ylaleedx Ne zaknonen Espíritu Sant men; porke cheguin gardet chiid Espíritu Sant por ne gardet sob Jesus ledne rnebééy Jesus.
Noze wren wren ne wnii mén por Jesus
40 Chene won yra menroo menduxtee guin ne re Jesus zenga, gwrol men re:
―Nli ne profet ne gyed chiid nak ménree.
41 Le stebëd men re:
―Laa Crist nee.
Per le stebëd zeg men re:
―¿Pezee gak men Crist si men-Galilea nak men?
42 ¿Pe let redet lo xgyiich Dëdyuzh ne xnëz rrey-David chiid Crist no ne Belén gal Ne, laz ke rrey-David?
43 Por neguin noze wren wren ne wnii mén por Jesus.
44 Gwrol men guin wlaan nsee men Jesus chegyiib, per ni te men wyezhdet nbig nnëëz Ne.
Rlaleedxdet xtis Jesus
45 Chene wberee yra men ne rapkwent xeydoo Dëdyuzh ledne ndxin men ne nak farisew yra men fxuz ne rnebééy lo yra fxuz, re men lo men ne rapkwent ydoo:
―¿Penak zëdnodet de men?
46 Wke men re men:
―¡Rutlel gardet gon noo ynii zegne rnii men!
47 Lex re men ne nak farisew:
―¿Pe no de che wgoots men xtoo?
48 ¿Peguin nuu men ne nak xextis be u nuuzeg be ne nak be farisew che wlaleedx men?
49 Yra mén ne nandet pezee zëëd lo ley ne wdee Dëdyuzh lo Moises, cheguel sakzi Dëdyuzh men.
50 Lex wke te ke men ne nak farisew ne la Nicodemo ne wa wuu diiz yrup Jesus te gyëël, re men:
51 ―¿Pe let zëëdet lo ley ne nuudet yzakzi be te mén belne gardet gon be xdiizpee men por ne gaknan be gan pe wlaa men?
52 Wke men re men lo Nicodemo:
―¿Pe no de nak men-Galilea? Guseed lo xgyiich Dëdyuzh wen wenendxee gante chen gaknan de ne ni te profet gardet yruu Galilea.
53 Wluzh nga sya men ruxyuu men te te men.