8
Jesús náquiëʼ Bixúz Lo queë́ruʼ
1 Naʼa, ca rnna lë naʼ siʼ gunníaʼ, naca caní: Zoa queë́ruʼ tu Bixúz Lo caní. Guröʼë cuita lëʼë ibëla Dios, ateʼ röʼë, rinná bëʼë yehuaʼ yubá niʼ.
2 Lëʼ runëʼ dxin ca Bixúz Lo lu lataj nácatërö láʼayi, le naca yudoʼ le naca idútë, lë naʼ buchisëʼ Xanruʼ, en calëga bönachi.
3 Dios rucuʼë yúguʼtë bixúz lo para ilaʼguʼë yuguʼ le tuʼnödzaj bönachi, encaʼ xichö́ngacabaʼ böaʼ bëdxi lahuëʼ Dios. Que lë ni naʼ ben bayudxi soa bi guluʼë Cristo lahuëʼ Dios.
4 Laʼtuʼ zoëʼ luyú ni, bitiʼ caʼ gáquiëʼ bixúz, tuʼ nacuáʼticaʼsëʼ bixúz ni, nupa taʼgúʼu yuguʼ le tuʼnödzaj bönachi lahuëʼ Dios ca rinná bëʼ xibá queëʼ Moisés.
5 Yuguʼ bixúz ni tunëʼ dxin que tu le ruluíʼisö, en le naca ca tu bixín que lë naʼ röʼö yehuaʼ yubá. Caní naca, tuʼ gúdxidëʼë Dios Moisés cateʼ siʼ uchisëʼ yúʼudoʼ naʼ néquini guídi, gunnë́ʼ: “Buyútsöcaʼ, ben yúguʼtë idú ca naca lë naʼ buluíʼidaʼ liʼ lu guíʼa niʼ.”
6 Naʼa, Bixúz Lo queë́ruʼ ni runëʼ dxin que le nácatërö lesacaʼ, ateʼ niʼa que le benëʼ Lëʼ zoa tu didzaʼ rucáʼana tsahuiʼ queë́ruʼ le nácatërö lesacaʼ, en le ruíʼi didzaʼ que le nácatërö lesacaʼ guzxíʼ lu nëʼë Dios gataʼ queë́ruʼ.
7 Laʼtuʼ gudapa didzaʼ naʼ rucáʼana tsahuiʼ le guzóa zíʼalö idútë yöl-laʼ huáca, bitiʼ ben bayudxi soa didzaʼ buropi ni rucáʼana tsahuiʼ.
8 Naʼa, Dios ruluʼë bitiʼ gulaca bönachi niʼ idú dxiʼa cateʼ bëʼë didzaʼ ca naʼ nazúaj lu guichi láʼayi, gunnë́ʼ:
Buliʼyútsöcaʼ, gunnë́ʼ Xanruʼ: Záʼgaca dza
cateʼ uzóaʼ tu didzaʼ cubi ucáʼana tsahuiʼ,
le gúnlenaʼ bönachi Israel, en bönachi Judá.
9 Bitiʼ gaca ca guca didzaʼ rucáʼana tsahuiʼ naʼ,
lë naʼ bénlenaʼ xuz xtóʼogaquiëʼ,
dza niʼ gudélaʼa náʼagaquiëʼ,
en bubéajaʼ légaquiëʼ luyú Egipto.
Tuʼ buluʼcáʼanëʼ didzaʼ quiaʼ rucáʼana tsahuiʼ,
nedaʼ bucáʼanaʼ légaquiëʼ, rnnëʼ Xanruʼ.
10 Que lë ni naʼ, caní gaca didzaʼ ucáʼana tsahuiʼ
gúnlenaʼ bönachi Israel
tödi yuguʼ dza niʼ, rnnëʼ Xanruʼ.
Uchíziaʼ icja ládxiʼdoʼgaquiëʼ xibá quiaʼ
en uzúajaʼ le lu icja ládxiʼdoʼgaquiëʼ.
Níʼirö gacaʼ Dios quégaquiëʼ
ateʼ légaquiëʼ iláquiëʼ bönachi quiaʼ.
11 Bitiʼ gun bayudxi nu usedi luzë́ʼe, inná:
Bénbëʼë Xanruʼ, tuʼ ilúnbëʼë yúguʼtëʼ nedaʼ,
ga isí lo nu naca cáʼasö, ga idxintë nu naca lo.
12 Huéchiʼ ládxaʼa légaquiëʼ,
en uniti lahuaʼ le cabí naca tsahuiʼ gulunëʼ,
en bítiʼrö tsöjnedaʼ dul-laʼ nabágaʼgaquiëʼ.
13 Cateʼ niʼ ruʼë Dios didzaʼ que tu didzaʼ cubi rucáʼana tsahuiʼ, naca tuʼ chibigula lë naʼ guzóa zíʼalö, ateʼ chizóa idúa lë naʼ nagula, en chinaca gulasi.