8
Jesús na̱j dux bixhioz zojbloj ree
1 Loj gra diidx ni caydü ree ni mazri lasajc na̱j guial Jesucrist na̱j dux bixhioz zojbloj ree, bén ni ma zojb xanyabaa xladbee Dios bén rniabee.
2 Ni ma rüjnman sirv guialbixhioz, lën yadoo ni bazoob Dios, ad bénguidxliujt.
3 Gra ree bixhioz zojbloj loj guidxliuj guie xchiin reeman na̱j guial rinë reeman gon rugüjt tëë reeman be ree ziꞌc gon par Dios. Ziangajc Jesucrist bén na̱j dux bixhioz zojbloj ree yuꞌ ni badëëman loj Dios.
4 Abiꞌ bal sta zaꞌ Jesucrist loj guidxliuj guie ad niajctaman bixhioz, guial ma yuꞌ ree bixhioz ni rinë ree gon loj Dios ziꞌc rniabee ley ni basaꞌnnë Dios Moisejs.
5 Per gra ni rüjn ree bixhioz loj guidxliuj guie, najzi reen ziꞌc tijb bala, ziꞌc tijb sen xhienaag na̱j ree ni yuꞌ xanyabaa. Dunuj ree rayagbee guial najzi reen ziꞌc tijb sen din chi ma cadxin gajxh güün Moisejs yadoo, dxel rëb Dios lojman: “Baguiaa zagdxe din güünl ziꞌcgajczi balün lüj ruguiaꞌ Sinaí.”
6 Per mazri zagdxe na̱j ni rüjn Jesucrist, bén bayal na̱j dux bixhioz zojbloj ree, din mazri zagdxe na̱j nejz cüb ni guxhalaman din chileꞌ yadxin ree loj Dios. Abiꞌ por nejz cüb guin mazri zagdxe na̱j ree xpromejs Dios par bejn.
7 Bal por ley nileꞌ nibajn bejn zagdxe delant loj Dios, dxel ad rüjnt naguiejn niu nejz cüb.
8 Per baguiaa Dios guial ad cayüjnt ree bejn ziꞌc rayal zeel rëbaman:
Naj rni guial guidxin dxej gaxhalan nejz cüb
par ree bén Israel në ree bén Judá.
9 Per nejz cüb guin ad najtan ziꞌc ley ni basaꞌnan
loj xbéngulalidi chi babën laa reeman Egipto.
Abiꞌ guial ad bazoobt reeman da diidxan
zeel gulëladxan laa reeman, zian rëb Dios.
10 Rëb tëëman:
Zian ma bayaꞌn diidx gac con ree bejn chi guidxin dxej
guijc reeman yasaꞌnan da leyan
abiꞌ lën luxdoo reeman gucanan.
Dxel naj gac xDios reeman, abiꞌ laa reeman gac da bejnan.
11 Dxejzii ree ad rüjntri naguiejn gusiid ree bejn lasaꞌ reeman.
Niꞌqui bijch reeman par güünbee reeman naj,
din gra reeman güünbee naj,
diizd xindobëz xt bengol.
12 Abiꞌ naj gün perdon gra ree ni mal ni ma been reeman,
abiꞌ ad yuꞌt dxej gusaaladxan xtol reeman.
13 Chi rëb Dios guial guixal nejz cüb guin rën guiëban guial achetri sirv rüjn nejz gulal guin ni gop ree bejn par guidxin reeman lojman, abiꞌ ni ad rüjntri sirv nayob nitan.