18
Bayü Judas Jesús
(Mt. 26:47‑56; Mr. 14:43‑50; Lc. 22:47‑53)
1 Chi gulox gunee Jesús zian, dxel briinë ree xbejnman, zë reeman stiblad roꞌ guiiw la Cedrón, bidxin reeman lod yuꞌ ree yag.
2 Në Judas, xin yayü laaman, nünbee yagaj, guial zien volt binëman laa reeman ni.
3 Zeel bidxinnëx tibcwaa ree suldad në ree bén rajp roꞌ yadoo, guxhaal quijb ree bixhioz laa reeman në ree bénfarisew, caꞌ reeman bajl rusni ree, në ree espad con ree lans.
4 Per ma ragbee Jesús gra ni gac, briiman gunabdiidxaman loj reeman, rëbaman:
―¿Chu raguiilidi?
5 Badxiꞌ reeman laan rëb reeman:
―Jesús bén Nazaret.
Abiꞌ rëbaman loj reeman:
―Najn.
Judas xin bayü laaman bidxinnë laa reeman.
6 Chi rëbaman loj reeman: “Najn”, dxel baguiadruxan reeman biajb reeman luyuj.
7 Gunabdiidxaman zatijb rëbaman:
―¿Chu raguiilidi?
Rëb reeman:
―Jesús bén Nazaret.
8 Zeel rëbaman:
―Ma rnin, najn. Bal naj raguiilidi, gol baslaa ree bén guie yaguiaj reeman.
9 Zian gojc cumplid ni rëb loj xDadaman: “Achut ree bén baneel lon bizëëb.”
10 Dxel gulëë Bëd espad, gutüꞌman guidiajg ladbee xin la Malco, najx xmojs quijb bixhioz zojbloj.
11 Dxel rëb Jesús loj Bëd:
―Baguꞌchaaw espad zii. Bal rën da Dadan gazaagdiajn zian, gazaꞌcanan.
Biniaaz Jesús
(Mt. 26:57‑58; Mr. 14:53‑54; Lc. 22:54)
12 Suldad guin ree con xin rniabee laa reex con ree bén rajp roꞌ yadoo gunaaz reeman Jesús, guxhii reeman laaman.
13 Dxel binë reeman laaman yaloj lidx bén la Anás, din laaman na̱j xdadsuegr Caifás quijb bixhioz zojbloj loj ijz zii.
14 Laagajcaman rëb loj gabilt, mazri zagdxe guiët tijbzi bejn por gra ree bén Israel.
Rëb Bëd ad najtaman xbejn Jesús
(Mt. 26:69‑70; Mr. 14:66‑68; Lc. 22:55‑57)
15 Tioꞌp ree xbejn Jesús binal laaman. Tijbaman la Simón, bén rniee reeman Bëd, stijbaman na̱j bén nünbee quijb bixhioz zojbloj, zeel guyunëman Jesús lënü guin,
16 guiáad Bëd bayaꞌnman luleꞌ. Zeel barii bén nünbee bén rniabee ree bixhioz, guneenëman biin rajp roꞌ port guin, persi guyu Bëd lënü.
17 Gunabdiidxim lojman rëbim:
―¿Nid lüjn na̱j tijb xbejn bén guin ya?
Badxiꞌman laan rëbaman:
―Ad najtan.
18 Per guial dád nayaag, zeel bén na̱j ree mojs con ree bén rajp roꞌ yadoo nabeꞌc reeman guij ruchaꞌ reeman. Nëgajc Bëd cuchaꞌnë reeman rudëj guin.
Gunabdiidx Anás loj Jesús
(Mt. 26:59‑66; Mr. 14:55‑64; Lc. 22:66‑71)
19 Guzuloj bén la Anás canabdiidxaman loj Jesús xcwent ree xbejnman në xcwent ni rulüüman.
20 Zeel rëb Jesús:
―Gunen loj gra ree bejn. Zianczi balün lod rucaagdiajg ree xtiidx Dios në lën dux yadooroꞌ ree, lod radoꞌp dugra ree. Achet ni gunen ralan.
21 ¿Chexc zeel rniabdiidxil lon? Gunabdiidx loj ree bén bacaagdiajg ni rën, laa reeman na xhie gunen, laa reeman ragbee.
22 Chi rëbaman zian, tijb bén rajp roꞌ yadoo guin wëëz roꞌman, rëbaman:
―¿Zian yadxiꞌl xtiidx bén rniabee guin ya?
23 Badxiꞌ Jesús laan rëbaman:
―Bal xhie ni mal rën, guna xhienin. Per bal gunen zagdxe, ¿chexc zeel rguinl naj?
24 Dxel guidib naxiiman guxhaal Anás laaman loj Caifás, bén na̱j quijb bixhioz zojbloj.
Rëb Bëd stijb ad nünbeetaman Jesús
(Mt. 26:71‑75; Mr. 14:69‑72; Lc. 22:58‑62)
25 Per Bëd sta zaꞌman cuchaꞌman rudëj guin. Abiꞌ gunabdiidx reeman lojman, rëb reeman:
―¿Nid në lüj na̱j tijb ree xbejn bén guin ya?
Badxiꞌ Bëd laan rëbaman:
―Aꞌn, ad xbejntaman naj.
26 Dxel tijb xmojs bixhioz zojbloj guin, bén na̱j lasaꞌ bén gutüꞌ Bëd guidiajg, rëbaman loj Bëd:
―¿Nid lüjn baguian ya zaꞌnël laaman guiaꞌ ree yag olivos?
27 Rëb Bëd stijb guial ad nünbeetaman Jesús, loj hor zii gajc guridxaꞌ tijb gui̱d.
Binë reeman Jesús loj Pilato
(Mt. 27:1‑2, 11‑14; Mr. 15:1‑5; Lc. 23:1‑5)
28 Chi bani luyuj, bazanë reeman Jesús lidx Caifás, zinë reeman laaman lën xpalas gobernador Pilato. Per ree bén Israel guin ad guyut reeman lën palas guin, din par laa reeman bal niu reeman, ad nayatri reeman loj Dios, abiꞌ ad nileꞌt niajw reeman xche guialraw ni raw reeman pascw.
29 Zeel brii Pilato persi guneenëman laa reeman, rëbaman:
―¿Xhie been xin guie zeel zidnëdi laax guie?
30 Badxiꞌ reeman laan rëb reeman:
―Bal najman benzaꞌc, ad ziant nudnëꞌn laaman lojl.
31 Dxel rëb Pilato:
―Gol bignëx, gol been guialguxtis ziꞌc na̱j xleydi.
Abiꞌ rëb reeman:
―Per ad nacaꞌtan guialrniabee yanabeen guiët bejn.
32 Zian gojc cumplid xtiidx Jesús chi bagojnman xhienaag guiëtaman.
33 Bayu Pilato lën palas guin, dxel gurejdxaman Jesús, gunabdiidxaman lojman rëbaman:
―¿Lüj na̱j xrey ree bén Israel ya?
34 Badxiꞌ Jesúsan rëbaman:
―¿Lüjczi rniabdiidx lon ya o yuꞌ ree ben ren na lojl zian?
35 Badxiꞌ Pilato laan, rëbaman:
―¿Wen bén Israel naj ya? Bén ladx gajc reel con ree bixhioz rniabee bidnë lüj lon. ¿Xhie beenl?
36 Badxiꞌ Jesúsan rëbaman:
―Guialrniabee ni raꞌpan ad lojt guidxliuj zan, din bal loj guidxliuj zan, niaꞌpan bén nidijl ree chitëë niniaaz ree ben Israel naj. Per yan ad lojt guidxliuj guie za da guialrniabeen.
37 Dxel rëb Pilato lojman:
―¿Zë loj diidxan ya rey najl?
Badxiꞌ Jesús laan rëbaman:
―Reyqui naj, ziꞌc nal. Par zian goolan par zian tëë zialan loj guidxliuj guie zidgaguien ni na̱j diidxli, graczi ree bén zinal ni diidxli rucaagdiajg reeman ni rnien.
38 Dxel rëb Pilato:
―¿Xhiezanin na̱j diidxli?
Gunabee reeman guiët Jesús
(Mt. 27:15‑31; Mr. 15:6‑20; Lc. 23:13‑25)
Chi gulox rëb Pilato zian, dxel briiman bigneenëman bén Israel ree stijb, rëbaman:
―Achet xguialquia xin guin radxejlan.
39 Per lëjt, xcostumbridi na̱j guial loj lanij pascw laa tijb bén yuꞌ ladxguiib. Yan, ¿rëndi ya guslaan xreydi?
40 Dxel gurixdiaj ree bén Israel guin, rëb reeman:
―¡Ad laataman guslaal! ¡Zagdxeli baslaa Barrabás!
Abiꞌza Barrabás guin béngubaanan.