4
Jesús con béngunaa Samaria
Gogbee ree bénfarisew guial mazri zien bejn ma zinal Dad Jesús mazri zien tëë bejn ruroobnijsaman guial loj Waj, majsi diidxliczi ad Jesústan ruroobnijs bejn ree, bén na̱j ree xbejnman ruroobnijs. Chi gogbeeman zian dxel briiman niz Judea zëman niz Galilea stijb.
Per chi zëman niz Galilea been naguiejn gudëdaman niz Samaria. Abiꞌ bidxinman tijb guiedx la Sicar, ni nulen Samaria, gajxh lod nagaꞌ yuj ni badëë Jacob loj xiꞌnman Xiëb. Yagaj na̱j tijb bizëduu rniee reeman laan xbizë Jacob. Abiꞌ guial ma badxag Jesús cazaman, dxel gurejman roꞌ bizë guin. Ma zidyob garol dxej. 7-8 Guiáad ree xbejnman zë reeman luguiedx guin zisii ni gaw reeman. Hor guin bidxin tijb béngunaa Samaria roꞌ bizë guin din tiaꞌman nijs, dxel rëb Jesús lojman:
―Bazaladx taꞌn xnijsil guiëꞌn.
Per guial ad rnieenët lasaꞌ ree bén Israel zagdxe con ree bén Samaria, badxiꞌ béngunaa guinan rëbaman:
―¿Chexquiza zeel rniabil nijs lon najl bén Israel awa bén Samaria naj?
(Din bén Israel ree ad rnieenët reeman bén Samaria ree zagdxe.) 10 Badxiꞌ Jesús laan rëbaman:
―Bal zian ragbeel ni rën Dios guneeman lüj, chutëë bénan canab nijs lojl, zanabil nijs lon abiꞌ naj zunen nijs runee guialnaban.
11 Dxel rëb béngunaa guin loj Jesús:
―Dad, niꞌquid caꞌtil ni cwëënël nijs, abiꞌ bizë guin dád naxhitan. ¿Ban chicaꞌl nijs runee guialnaban? 12 Dux béngulalan Jacob basaꞌnnë dunujn bizë guie, lod guꞌman nijs con ree xiꞌnman con ree xbeguiꞌxhaman. ¿Wen mazri najl guial lojman ya?
13 Badxiꞌ Jesús laan rëbaman:
―Graczi ree bén rëꞌ nijs guie reꞌc reeman nijs stijb. 14 Per bén guiëꞌ nijs gudëdan, ad yuꞌtri dxej cheꞌcaman nijs. Din nijs gudëdan gacan luxdooman ziꞌc lod ad rbëzt rajch nijs, abiꞌ nijs guin gudëë guialnaban tiblayaa.
15 Dxel rëb béngunaa guin lojman:
―Dad, banee nijs guin lon, chitëë cheꞌcran nijs ad zial tëëtran guidcaꞌn nijs guie.
16 Rëb Jesús lojman:
―Bignee lacheelil, dxel yaguiaadil guie.
17 Badxiꞌ béngunaa guinan rëbaman:
―Achut da bénguiaawan yuꞌ.
Dxel rëb Jesús:
―Waliquil achut lacheelil yuꞌ, 18 din ma gojc gaay xinguiaaw rtiaꞌ lüj, abiꞌ yan xin zojbnël ad lacheeltilan. Zeel waliqui ni nal.
19 Chi biguiejnman ni rëb Jesús, dxel rëbaman:
―Dad, ma ragbeen guial lüj na̱j bén rudëë xtiidx Dios loj ree bejn. 20 Dux béngulalan gunajchiꞌ reeman Dios ruguiaꞌ guie, per lëjt najdi bén Israel rëbidi guial Jerusalén na̱j lod guiniajchiꞌ bejn laaman.
21 Badxiꞌ Jesúsan rëbaman:
―Na, zagdxe rnin guial guidxin dxej guiniajchiꞌdi dux Dad ree Dios, ad ziꞌttridi ruguiaꞌ guie ad zej tëëtridi Jerusalén. 22 Lëjt niꞌquid ragbeetidi chunin rniajchiꞌdi, per dunujn rayagbeen chunin ranajchiꞌn, din loj ree bén Israel grii bén güün bejn ree perdon. 23 Abiꞌ ma bidxin dxej ni gra ree bén diidxli rniajchiꞌ Dios, guiniajchiꞌ reeman laaman ziꞌc rayal por xSprijtaman. Din zian rën dux Dad ree Dios güün ree bén rniajchiꞌ laaman. 24 Dios na̱j Sprijt, abiꞌ bén rniajchiꞌ ree laaman rayal guiniajchiꞌ reeman laaman con guidib luxdoo reeman por xSprijtaman.
25 Dxel rëb béngunaa guin lojman:
―Naj ragbee guiꞌt bén na̱j Mesías, bén la gajc, Cristo. Abiꞌ chi guiꞌtaman, laaman gusigniaꞌ dunuj ree gran.
26 Abiꞌ rëb Jesús:
―Najn na̱j bén zii, laaman caneenë lüj.
27 Loj hor guin badxin ree xbejn Jesús, abiꞌ dád badxaloj reeman guial cayünëman tijb béngunaa diidx. Per niꞌqui tijb reeman ad gunabdiidxt lojman xhie rënman o xhie diidxan cayü reeman. 28 Guiáad béngunaa guin basaꞌn xreman roꞌ bizë guin, dxel ziaman luguiedx guin, abiꞌ rëbaman loj ree bejn:
29 ―Gol taquiaa tijb bén ma na graczi ni ma benan. ¿Nid laaman na̱j Cristo ya?
30 Dxel brii reeman luguiedx guin zë reeman lod zaꞌ Jesús. 31 Per laꞌtgaj zia béngunaa guin luguiedx guin, rëb ree xbejn Jesús lojman:
―Mextr, gudaw.
32 Per rëbaman loj reeman:
―Laa da guialrawan yuꞌ, ni ad nünbeetidi.
33 Dxel guzuloj canabdiidx loj lasaꞌ reeman rëb reeman:
―¿Ni yuꞌ chu bidnë ni gudawaman yaꞌn?
34 Dxel rëb Jesús loj reeman:
―Da guialrawan na̱j günan ziꞌc rën Dios, bén guxhaal naj abiꞌ guloox günan ni naman. 35 Lëjt rëb: “Ryaadx zatajp bëëw din gac ni yuꞌ loj guiniaa.” Per naj rni lëjt: Gol gules lojdi, gol baguiaa loj ree guiniaa, ma na̱j reen din yadoꞌp reen. 36 Abiꞌ bén ratoꞌp loj guiniaa guin, rtiaꞌman ni rayalaman por dxiin ni rüjnman. Guiáad ni ratoꞌpaman na̱j par lod yuꞌ guialnaban tiblayaa. Dxel ziꞌc bén rxübin ziꞌc bén ratoꞌp, rabaa reeman tiblojzi. 37 Waliqui ni rëb ree bejn: “Ben ren rxübin, ben ren ratoꞌp guialnazaꞌc.” 38 Naj guxhal lëjt din chigtoꞌpidi guialnazaꞌc lod ad beentidi dxiin. Ben ren ree been dxiin, guiáad lëjt gaz bigtoꞌpidi guialnazaꞌc lod ad beentidi dxiin.
39 Zien ree bén Samaria bililadx Jesús guial be béngunaa guin diidx loj reeman rëbaman: “Ma gunaman graczi ni benan.” 40 Zeel chi bidxin reeman lod zaꞌ Jesús, guzajc reeman laaman liaadx din yayaꞌnnëman laa reeman. Dxel bayaꞌnnëman laa reeman tioꞌp dxej. 41 Abiꞌ mazri zien reeman bililadx laaman chi biguiejn reeman ni rnieeman, 42 dxel rëb reeman loj béngunaa guin:
―Bajy yan ad por ni natzil raliduladxan laaman, nëgajc dunujn ma baguiejn ni rnieeman, abiꞌ rayagbeen walican laaman na̱j Cristo, bén yabëë bénguidxliuj loj dol.
Bayüjn Jesús xiꞌn xbejn tijb rey
43 Chi goc tioꞌp dxej guin, baza Jesús niz Samaria abiꞌ zëman niz Galilea, 44 majsi laagajcaman rëb guial niꞌqui tijb bén rudëë xtiidx Dios loj ree bejn ad rajpt reeman laaman respejt ladx gajcaman. 45 Per chi badxinman niz Galilea, bén niz ni ree bacaꞌ reeman laaman zagdxe. Din në laa reeman wej lanij pascw Jerusalén, abiꞌ baguiaa reeman gra ni beenman ni. 46 Chi zaꞌman niz ni wejman Caná stijb, lod bayüjnman nijs vin. Abiꞌ luguiedx Capernaum guyu tijb xbejn rey ragxuu xiꞌnman. 47 Chi gogbee bén guin baza Jesús niz Judea badxinman niz Galilea, wejman lod zaꞌ Jesús bisajcaman laaman liaadx din cheman yayüjnman xiꞌnman guial zamer guiëtix. 48 Abiꞌ rëb Jesús lojman:
―Lëjt, bal id zuguiaadi xhie ree sen o milagr ree, ad zaliladxtidi.
49 Per rëb bén guin:
―Dad, yoꞌ yan gajc, naga gad da xiꞌnan guiët.
50 Dxel rëb Jesús lojman:
―Baguiaj lidxil, ma bayajc xiꞌnl.
Bililadx bén guin ni rëb Jesús, abiꞌ zia lidxaman. 51 Laꞌtgaj ziaman, bigchaagloj ree xmojsaman laaman, abiꞌ rëb reeman:
―Ma bayajc xiꞌnl.
52 Dxel gunabdiidxaman loj reeman, rëbaman:
―¿Xhie hor guzuloj banaa da xiꞌnan?
Abiꞌ rëb reeman lojman:
―Nieey cost raca tijb wadxe bariix xliaa.
53 Dxel basaaladx bén guin guial hor ziin rëb Jesús lojman: “Ma bayajc xiꞌnl.” Abiꞌ laaman në gra bén zojb lidxaman bililadx reeman Jesús. 54 Ni ne na̱j milagr barojp ni been Jesús niz Galilea chi bazaman niz Judea.