13
Gol bayüjn xgab por xtolidi
1 Lën gajc ree dxejzii wej tioꞌp choon ree bejn biguie reeman diidx loj Jesús guial bagüjt Pilato tioꞌp choon ree bén Galilea, abiꞌ bagoꞌchaman xrejn reeman con xrejn ree be bagüjt reeman par gudëëd reeman loj Dios ziꞌc gon.
2 Dxel rëb Jesús:
―Ad bal naladxidi guzajc ree bén Galilea guin zian guial na̱j reeman mazri béndol guial loj gra ree bén Galilea.
3 Din naj rni lëjt guial ad ziantan. Abiꞌ bal id zayüjndi xgab por xtolidi ziangajc saquidi.
4 Ad bal naladxidi bén chiinbichoon güt ree chi guxaꞌt torre ni la Siloé laa reeman, na̱j reeman mazri béndol guial loj gra ree bén zojb Jerusalén.
5 Naj rni lëjt guial ad ziantan. Abiꞌ bal id zayüjndi xgab por xtolidi ziangajc saquidi.
Xcwent yag higo ni ad rtiat
6 Dxel be Jesús tijb cwent loj reeman, rëbaman:
―Tijb bejn gojpaman yag higo lod naguꞌman uv, abiꞌ biquiaaman bal ca higo lojn, per achetczi bidxaaglojman.
7 Dxel rëbaman loj bén rajp guidxliuj guin: “Baguiaa, ma gojc choon ijz rialan rguilan higo loj yag guin, abiꞌ achetczi rdxaaglojn. Batüügan din nawëëgzi rüjnan loj guidxliuj guie.”
8 Per rëb bén rajp guidxliuj guin: “Dad, basaꞌnsiin zatib ijz, yabeclaan yuj xanan gaguꞌ tëënan abon.
9 Rupent zian tian, per bal id zacan dxel tügan.”
Bayüjn Jesús tijb béngunaa ca bëw xijch
10 Tijb dxej raziiladx ree bejn, culüü Jesús bejn ree lën tijb yadoo,
11 yagaj zaꞌ tijb béngunaa ma gojc chiinbichoon ijz ragxuuman, tijb xindxab basaꞌn laaman con tijb bëw xijchaman, ad rileꞌtczi yaliman.
12 Chi baguiaa Jesús laaman, gurejdxaman laaman, rëbaman:
―Na, ma bayajquil guialguijdx ni goquil.
13 Dxel badxiib yaaman guijcaman; abiꞌ loj hor guin gajc baliman, zianz guzuloj cuzaꞌtaman Dios zagdxe.
14 Per bén rniabee lën yadoo guin dád bidxeꞌchaman guial bayüjn Jesús bén guin dxej raziiladx ree bejn, dxel rëbaman loj ree bejn:
―Xhoꞌp dxej yuꞌ guial güün bejn dxiin, loj ree dxej guin gol guida din yayajquidi, per ad dxej raziiladxt bejn.
15 Badxiꞌ Dad Jesús laan rëbaman:
―Bén rusquiee, ¿nid rxhiec xgoꞌndi o xburidi dxej raziiladx ree bejn ya par chiquiëꞌdi laa reeb nijs?
16 Béngunaa guie zëëdaman loj xdiaa Abraham, ma gojc chiinbichoon ijz naxhii xindxab laaman con guialguijdx guie. ¿Wen id zajc yayajcaman dxej raziiladx ree bejn ya?
17 Chi rëb Jesús zian, gra ree bén rdxeꞌch laaman bayaꞌn xtu; per graczi ree bejn rabaa guial ruguiaa reeman gra ree ni zagdxe ni rüjnman.
Xcwent xhaj moxtajs
(Mt. 13:31‑32; Mr. 4:30‑32)
18 Rëb tëë Jesús:
―¿Xhienaag ganin na̱j xguialrniabee Dios o xhie gulün lojdi din chigniaꞌdi xhienaag na̱j xguialrniabeeman?
19 Laan na̱j ziꞌc xhaj moxtajs ni rxübin bejn loj xguiniaaman, rniꞌsan xt rajcan yag naroob. Abiꞌ guial naroob daꞌt rajcan xt rüjn xguixbitiaꞌs ree biguijn xidxan.
Xcwent levadur
(Mt. 13:33)
20 Rëb Jesús zatijb:
―¿Xhienaag ganin na̱j xguialrniabee Dios?
21 Laan na̱j ziꞌc levadur ni rugoꞌch tijb béngunaa choon midid harin persi rusaaguijn gra cob guin.
Port nadëë
(Mt. 7:13‑14, 21‑23)
22 Chi zë Jesús Jerusalén, rulüüman bejn ree luguiedx naroob ree në ree luguiedx dobëz niz lod rdëdaman.
23 Abiꞌ tijb bejn gunabdiidx lojman rëbaman:
―Dad, ¿taꞌnz ree bén gac perdon ya?
Badxiꞌ Jesús laan rëbaman:
24 ―Gol been naguiejn din chuꞌdi niz roꞌ port nadëë, din naj rni lëjt, zien ree bén rën chuꞌ, per ad zileꞌt chuꞌ reeman.
25 Din chi chisu bén na̱j lidxan gusiaawaman roꞌ port guin, lëjt guial yayaꞌndi xchu, gucaadi roꞌ port guin guiëbidi: “Dad, guxhal.” Per yadxiꞌman xtiidxidi naman: “Ad ragbeetan ban zadi.”
26 Dxel suloj guiëbidi: “Tijbzi badaaw ree, tijbzi badüꞌ ree, niz la̱d dux nejzan balüül dunujn.”
27 Per naman lojdi: “Ma rnin, ad ragbeetan ban guzadi. Gol biquied lon béndol.”
28 Ni goondi gaw tëë layidi chi guguiaadi Abraham, Isaac, Jacob, në gra ree bén badëë xtiidx Dios loj ree bejn, zaꞌ reeman lod rniabee Dios, guiáad lëjt yariicadi.
29 Din guiꞌt ree bén sa gra lad guidiblagaa guidxliuj din cwe reeman gaw reeman lod rniabee Dios.
30 Abiꞌ zien ree bén bigra yan, laa reeman gac bén yaloj nadxel. Guiáad ree bén na̱j bén yaloj yan, laa reeman gac bén bigra.
Roon Jesús por Jerusalén
(Mt. 23:37‑39)
31 Hor guin gajc bidxin tioꞌp choon ree bénfarisew, abiꞌ rëb reeman loj Jesús:
―Baguiaj, baza niz guie, din rën rey Herodes gugüjtaman lüj.
32 Badxiꞌ Jesús laan rëbaman:
―Gol chej gol chiguiedx loj bén rusquiee zii: “Yan, në guixie yabën xindxab yayün tëën bénragxuu ree, abiꞌ widx gulooxan.”
33 Per naj rayal gusnuu da nejzan yan në guixie në widx, din ad najt guial guiët tijb bén rudëë xtiidx Dios loj ree bejn luguiedx ren bal id najn Jerusalén.
34 ’¡Bén Jerusalén, bén Jerusalén, rugüjtidi bén rudëë ree xtiidx Dios loj ree bejn rucaaguiaj tëëdi gra ree bén rxhiaal Dios lojdi! ¡Bëlczi volt guyënan nuchagan lasaꞌdi ziꞌc rüjn tijb guid ruchajg lasaꞌ ree xiꞌnb lën xhiilib, per ad cwëjbtidi!
35 Zianan zeel yayaꞌn ladxidi ziꞌc tijb guiedx lod achut zojb. Abiꞌ rnin lëjt, diizd yan ad zuguiaatridi naj xt chi guidxin dxej guiëbidi: “¡Nüjnleꞌ Dios bén zëëd por laaman!”