18
Xcwent tijb béngunaa bizëjb në tijb juejs
1 Be Jesús tijb cwent loj ree xbejnman, persi balüüman laa reeman guial zianczi rayal cwedx guiniab reeman Dios ad zadxagtczi reeman.
2 Abiꞌ rëbaman loj reeman:
―Guyu tijb guiedx lod guyu tijb juejs, ad rdxebtaman Dios ad ridxgaꞌ tëëtaman bejn ree.
3 Luguiedx ziigajc zojb tijb béngunaa bizëjb, rniabaman loj juejs guin din güünman guialguxtis gagnëman laaman loj bén rdxeꞌch laaman.
4 Xchej ad bidxgaꞌt juejs guin béngunaa bizëjb guin, per zianz laagajcaman been xgab naladxaman: “Majsi ad rdxebtan Dios ad ridxgaꞌ tëëtan bejn ree,
5 per béngunaa guie ad rucwëëzt ruslenman naj. Zagdxeli na̱j günan laaman yudar chitëë riꞌtraman naga gad da pacensan chigra.”
6 Dxel rëb Jesús loj reeman:
―Zian gunee juejs mal guin.
7 Diidxgui Dios, ¿nid zagnëman bén guleman ya bén rbejdx rniab ree laaman dxej guiaal? ¿Wen zaglaa gagnëman laa reeman ya?
8 Naj rni lëjt guial ad zaglaat gagnëman laa reeman. Per chi guiꞌt Bén guxhaal Dios, ¿chuj ni zadxaaglojraman bén rliladx Dios loj guidxliuj ya?
Xcwent bénfarisew con bén ruquijx impuest
9 Be Jesús zatijb cwent par ree bén naladx tijbzi laa reeman na̱j benzaꞌc guial loj ree ben ren, rëbaman:
10 ―Tioꞌp ree xinguiaaw wej lën yadooroꞌ Jerusalén persi gurejdx gunab reex Dios, tijbix na̱j xinfarisew, zatijbix na̱j xin ruquijx impuest.
11 Xin farisew guin, zaꞌlix cabejdx canabix Dios, rëbix: “Quixtëë runen lojl, Dad, guial ad najtan ziꞌc ree ben ren, na̱j reeman béngubaan, benmal, bén zaꞌnë béngunaa ren, niꞌqui ziꞌc na̱j bén ruquijx impuest guin.
12 Rbaꞌnan tioꞌp volt lën xuman, abiꞌ gra ni rünan gan rünanan chii lalaꞌ persi runen tijban lojl.”
13 Per xin ruquijx impuest guin, zijt zaꞌx abiꞌ niꞌquid rayaxtix guilies lojx, rgaꞌp luxdoox rëbgajx: “¡Dios, baya naj najn tijb xindol!”
14 Naj rni lëjt guial xin ruquijx impuest guin ma been Dios laax perdon chi bayejc lidxix, per xin farisew guin ad beentaman laax perdon. Din bén rlies xvalor gajc achet lasajcaman loj Dios, guiáad bén rüjn naya laaman mazri lasajc loj Dios.
Rüjnleꞌ Jesús xindoo ree
(Mt. 19:13‑15; Mr. 10:13‑16)
15 Binë ree bejn xindoo ree lod zaꞌ Jesús din gudxiib yaaman guijc reex, per chi baguiaa ree xbejnman guzuloj cadilë reeman bén zinë ree laa reex.
16 Per gurejdx Jesús laa reeman, rëbaman loj reeman:
―Gol badëë mod guiꞌt reex lon, ad bal rudxoondi, din lod rniabee Dios na̱j par ree bén na̱j ziꞌc laa reex.
17 Din naj rni lëjt, bén ad rliladxt xguialrniabee Dios ziꞌc tijb xindoo, ad zileꞌt chuꞌman loj xguialrniabee Dios.
Xcwent tijb xin rijcw
(Mt. 19:16‑30; Mr. 10:17‑31)
18 Tijb xin rniabee, gunabdiidx loj Jesús rëbix:
―Mextrzaꞌc, ¿xhie rayal günan din gaꞌpan guialnaban tiblayaa con Dios?
19 Badxiꞌ Jesús laan, rëbaman:
―¿Chexc zeel nal lon benzaꞌc? Achut na̱j benzaꞌc, tijbzi Dios.
20 Lüj rajc ree mandamient: “Ad sunël béngunaa ren, ad gugüjtil bejn, ad cwanl, ad cwëël xtiidx bejn, gojp respejt xdad xniaal.”
21 Dxel rëbix loj Jesús:
―Gra ree ni guin cayünan diizd xindoon.
22 Chi biguiejn Jesús zian, rëbaman:
―Yuꞌ zatijb ni ryaadx güünl: bigtoꞌ gra ni rajpil dxel gudëël milia guin loj ree bénprob. Zian gapil guialnazaꞌc xanyabaa, dxel guiꞌtil guidnalil naj.
23 Chi biguiejn xin guin zian, dád guyunayax guial dád xinrijcwan.
24 Chi baguiaa Jesús guial dád yuꞌnayax, rëbaman:
―¡Dád nawëëg na̱j chuꞌ benrijcw loj xguialrniabee Dios!
25 Adli nawëëgt tëd tijb camell xan gagux, guial chuꞌ tijb bén rijcw loj xguialrniabee Dios.
26 Abiꞌ ree bén biguiejn ni rëb Jesús, rëb reeman:
―¿Chu za zajc laa loj xcasti Dios?
27 Dxel rëbaman loj reeman:
―Yuꞌ ni ad zajct güün bénguidxliuj, per Dios graczan zajc güünman.
28 Dxel rëb Bëd lojman:
―Dad, ma basaꞌnan graczi ni rayaꞌpan persi zudnaalan lüj.
29 Zianz rëb Jesús:
―Diidxliczi rnin lojdi, chutëëz bén rusaꞌn lidx, lacheel, bijch, o xdad, o xniaa, o xiꞌn guial rüjnman ziꞌc rniabee Dios,
30 mazri zien ni tiaꞌman loj guidxliuj guie. Abiꞌ zajpaman guialnaban tiblayaa con Dios.
Rugojn Jesús zatijb guial guiëtaman
(Mt. 20:17‑19; Mr. 10:32‑34)
31 Gurejdx Jesús guidxiptioꞌp ree xbejnman tiblad, abiꞌ rëbaman loj reeman:
―Yan, ziyoꞌ ree Jerusalén lod gac ziꞌc bacaa ree bén badëë xtiidx Dios loj ree bejn xcwent Bén guxhaal Dios.
32 Yayü reeman laaman loj ree benzit, guzeꞌ reeman laaman, guiniee reeman laaman ni rëntzi reeman, abiꞌ gucojp xhiejn reeman lojman.
33 Quin reeman laaman dxel gugüjt reeman laaman, per ni yayon dxej yabanman.
34 Per laa reeman ad bigniaꞌtczi reeman ni rëbaman, ad ragbee tëët reeman chexc zeel rëbaman zian din ad bileꞌt nigniaꞌ reeman xhie rën guiëb ni guneeman.
Rayajc guiaaloj tijb bénlutiaꞌp
(Mt. 20:29‑34; Mr. 10:46‑52)
35 Chi ma cadxin Jesús gajxh guiedx Jericó, tijb bénlutiaꞌp, zojbaman cwëꞌ nejz rniabaman carda.
36 Chi gogbeeman cadëd zien ree bejn, gunabdiidxaman xhie cayajc.
37 Abiꞌ rëb reeman lojman guial Jesús bén Nazaret cadëd niz yagaj.
38 Dxel gurixdiajman rëbaman:
―¡Jesús, xdiaa Davi, baya naj!
39 Bén ned ree rdilë reeman laaman din gucwëëz roꞌman, per mazri rbixdiajman, rëbaman:
―¡Xdiaa Davi, baya naj!
40 Dxel guzudxe Jesús abiꞌ gunabeeman bicaꞌ reeman laaman. Chi bidxinman gajxh lojman, gunabdiidxaman lojman, rëbaman:
41 ―¿Xhie rënl günan por lüj?
Badxiꞌman laan rëbaman:
―Dad, rënan yani lon.
42 Dxel rëb Jesús lojman:
―¡Ma zileꞌ guguiaal! Ma bayajquil guial bililadxil naj.
43 Hor guin gajc bani loj bén guin, abiꞌ binalaman Jesús rudëëman quixtëë loj Dios. Në gra ree bén baguiaa ni goc rudëë quixtëë loj Dios.