15
Binë reeman Jesús loj Pilato
(Mt. 27:1‑2, 11‑14; Lc. 23:1‑5; Jn.18 :28‑38)
1 Chi bareguiaal rsildoo, badxajg lasaꞌ ree bixhioz rniabee ree bixhioz con ree guxtis Israel në ree mextr rajc ley con gra ree guxtis, abiꞌ bayaꞌn reeman diidx xhienaag güün reeman. Dxel guxhii reeman Jesús binë reeman laaman loj Pilato.
2 Abiꞌ gunabdiidx Pilato loj Jesús rëbaman:
―¿Lüjn na̱j xrey ree bén Israel ya?
Badxiꞌ Jesús laan rëbaman:
―Najcan.
3 Abiꞌ ree bixhioz rniabee ree bixhioz zien ni rudxiib reeman guijcaman,
4 zeel gunabdiidx Pilato lojman zatijb, rëbaman:
―¿Nid xhie diidx yadxiꞌl ya? Baguiaa dád zien ni rudxiib reeman guijquil.
5 Per achetczi badxiꞌ Jesús, zeel dád badxa loj Pilato
Gunabee reeman guiët Jesús
(Mt. 27:15‑31; Lc. 23:13‑25; Jn.18 :38–19:16)
6 Loj ree dxej lanij pascw, ruslaa Pilato tijb bén yuꞌ ladxguiib, bén rëb ree bén guiedx guin guslaaman.
7 Lën ree dxej zii yuꞌ bén la Barrabás ladxguiib con ree ben ren, bén bagüjt ree bejn loj tijb wadijl ni been reeman contr gobiarn.
8 Dxel chi bidoꞌp ree bejn, rëb reeman loj Pilato din güünman ziꞌc na̱j costumbr,
9 Abiꞌ rëb Pilato loj reeman:
―¿Rëndi ya guslaan xreydi?
10 Rëbaman zian guial ragbeeman bayü ree bixhioz guin laaman por guial rdëdlojzi reeman laaman.
11 Per ree bixhioz rniabee guin badxeꞌ reeman bejn ree diidx din guiëb reeman loj Pilato guslaaman Barrabás.
12 Abiꞌ gunabdiidx Pilato loj reeman rëbaman:
―¿Xhie rëndi günnëꞌn bén nadi na̱j xreydi?
13 Dxel gurixdiaj reeman rëb reeman:
―¡Bacaax loj crüjz!
14 Zianz rëb Pilato loj reeman:
―Per ¿xhieza ni mal beenx?
Guiáad laa reeman mazri rbixdiaj reeman, rëb reeman:
―¡Bacaax loj crüjz!
15 Abiꞌ guial rën Pilato yayaꞌnman zagdxe loj reeman, zeel baslaaman Barrabás, gunabeeman a Jesús, dxel bayüman laaman loj reeman din tiaman loj crüjz.
16 Abiꞌ binë ree xin suldad guin Jesús xluleꞌ palas, yagaj badxaag lasaꞌ gra reex.
17 Abiꞌ bascajcw reex laaman tijb lajd murad, dxel been reex tijb coron guiëjch badxeꞌ reex guijcaman.
18 Dxel guzuloj rbixdiaj reex rëb reex:
―¡Guibanri xrey ree bén Israel!
19 Zianz rugaz reex var guijcaman, rulaa xhiejn reex lojman, abiꞌ ruzuxib reex lojman.
20 Chi gulox bazeꞌ reex laaman, babëë reex lajd murad guin ladaman, bascajcw reex xabczaman, dxel zinë reex laaman din gucaa reex laaman loj crüjz.
Bacaa reeman Jesús loj crüjz
(Mt. 27:32‑44; Lc. 23:26‑43; Jn.19 :17‑27)
21 Chi zinë reex Jesús, badxaagloj reeman tijb bén Cirene, laman Simón, xdad Lejandr con Rufo, ziaadaman bazaman dajn. Abiꞌ been ree suldad guin naguiejn biaaman xcrüjz Jesús.
22 Abiꞌ binë reex Jesús luar la Gólgota, rën guiëban Calaver.
23 Yagaj badëëd reex vin noꞌch ni la mirra lojman din guiëꞌman laan, per ad guꞌtaman laan.
24 Chi ma bacaa reex laaman loj crüjz, dxel gudxijt reex suert guijc xabaman din guidoon xhie yayal tijbgaj reex
25 Raca gaa rsil bacaa reex laaman loj crüjz.
26 Guijc crüjz guin bacaa reex lejtr ni rëb chexc zeel bacaa reex laaman loj crüjz, rëban: “Xrey ree bén Israel.”
27 Chi bacaa reex laaman loj crüjz, në zatioꞌp ree xin gubaan bacaa reex loj crüjz, tijbix cwa xladbeeman, zatijbix cwa xladruvejsaman.
28 Zian gojc cumplid ni ca loj xtiidx Dios, lod rëb: “Nayabaman loj ree benmal.”
29 Abiꞌ ree bén ridëd yagaj ruzeꞌ reeman laaman runij guijc reeman, rëb reeman:
―Conza ni rnieel guial rëbil, yaseꞌnl yadooroꞌ Jerusalén abiꞌ loj choon dxejzi ma bayüjnlan zatijb,
30 yan baslaa lüj gajc baguiajt tëë loj crüjz zii.
31 Ziangajc ruzeꞌ ree bixhioz rniabee laaman con ree mextr rajc ley, rëb reeman:
―Gognëx ben ren ree, guiáad laax ad rajct ruslaa laagajquix.
32 Yaguiajtix loj crüjz guin, bal laax na̱j Cristo, xrey ree bén Israel, din yaguiaa ree, dxel yaliduladx ree.
Xt në ree xingubaan canëman loj crüjz guneeguijdx laaman.
Güjt Jesús
(Mt. 27:45‑56; Lc. 23:44‑49; Jn.19 :28‑30)
33 Chi gol garol dxej, bicajy guidib guidxliuj xt raca choon wadxe.
34 Dxel raca choon guin gurixdiaj Jesús rejs, rëbaman:
―Eloi, Eloi, ¿lama sabactani? ―rën guiëban: Diosan, Diosan, ¿chexc zeel gulëëladxil naj?
35 Yuꞌ ree bén zaꞌ yagaj biguiejn, abiꞌ rëb reeman:
―Gol bacaagdiajg niad. Laax cabejdx Elías bén badëë xtiidx Dios loj ree bejn.
36 Dxel ruxüün tijbaman, bicajdxaman tijb xiil loj vinagr, bacaaman laan loj tijb yag, abiꞌ bacaaman laan roꞌ Jesús din guiëꞌman laan, rëbaman:
―Gol basaꞌnx, yaguiaa ree don ziꞌt Elías yalet laax loj crüjz guin ya.
37 Per Jesús dád rejs gurixdiajman, dxel güjtaman.
38 Loj hor zii goxyaꞌ lajd nal lën yadooroꞌ Jerusalén, gojcan tioꞌp lalaꞌ, diizd guijc guin xt guiaꞌ guin goxyaꞌ.
39 Dxel suldad rniabee ree suldad guial zaꞌx niz loj Jesús. Chi baguiaax xhienaag güjtaman, rëbix:
―Walican, Xiꞌn Dios bén guin.
40 Në tioꞌp choon ree béngunaa zaꞌ zijt ruguiaa ni cayajc. Loj ree béngunaa guin noꞌch María Magdalena, në Salomé në Li xniaa Xiëb con Jacob bén na̱j benguiag loj Xiëb.
41 Béngunaa guin ree binal Jesús, been tëë reeman laaman yudar chi guzuman Galilea, në zien ree béngunaa ren binal laaman diizd Galilea xt Jerusalén.
Biguieꞌch Jesús
(Mt. 27:57‑61; Lc. 23:50‑56; Jn.19 :38‑42)
42 Chi bidxin dxej rüjn ree bén Israel gra, chi guixiezi na̱j dxej raziiladx reeman, ma cabej guiaal,
43 bidxin Xiëb bén za guiedx Arimatea. Gojcaman tijb xguxtis ree bén Israel, abiꞌ gojp ree bejn laaman respejt, në laaman rbëz xguialrniabee Dios, abiꞌ guyuman valor wejman loj Pilato, persi banabaman xcuerp Jesús.
44 Dád badxa loj Pilato guial ma güjt Jesús, dxel gurejdxaman xin suldad rniabee ree suldad persi gunabdiidxaman bal walin.
45 Abiꞌ rëb suldad guin guial walican ma güjtaman, dxel cwëjb Pilato bacaꞌ Xiëb cuerp guin.
46 Guzii Xiëb tijb lajd, abiꞌ chi baletaman xcuerp Jesús loj crüjz guin dxel batüübaman laaman lajd guin, biquieꞌchaman laaman lën tijb baa ni bidëën lën tijb guiaj, dxel basiaawaman roꞌ baa guin con tijb guiajroꞌ.
47 María Magdalena con Li xniaa Xiëb, baguiaa reeman lod baquieꞌch reeman Jesús.