7
Ni rüjn persi rüjn bejn dol
(Mt. 15:1‑20)
1 Tijb dxej, tioꞌp choon ree bénfarisew con ree mextr rajc ley, bén guza ree Jerusalén, bibig reeman loj Jesús.
2 Abiꞌ chi baguiaa reeman guial yuꞌ ree xbejn Jesús cayaw, ad banaat reeman ziꞌc na̱j costumbr. Dxel caneeguijdx reeman laa reeman.
3 (Din bénfarisew në gra ree bén Israel zinaldxiꞌch reeman xcostumbr xbéngulal reeman guial ad zajct gaw reeman bal id reeman gunaa ziꞌc na̱j costumbr guin.
4 Në chi raza reeman luguiaꞌ, ad rawt reeman bal id zunaa reeman ziꞌc na̱j costumbr guin. Dád zien ni zinal reeman güün reeman ziꞌc xhienaag quiib reeman re, con vajs, con ree trast guiib, në xloon reeman riguiib reeman.)
5 Zeel bénfarisew ree con ree mextr guin, gunabdiidx reeman loj Jesús, rëb reeman:
―¿Chexc zeel ad runaat ree xbejnl ziꞌc na̱j xcostumbr dux béngulal ree? ¿Chexc zeel raw reeman zianzi?
6 Dxel rëb Jesús loj reeman:
―¡Bén rusquiee!, waliqui ni gunee Isaías por lëjt, bén badëë xtiidx Dios loj ree bejn, chi bacaaman:
Bén guie ree, rëbzi reeman guial rën daꞌt reeman naj,
per ad rënt reeman naj con guidib luxdoo reeman.
7 Xliaꞌczi rën daꞌt reeman naj,
abiꞌ rulüü reeman bejn ree ganaxzi ni rbëëguijc ree bénguidxliuj.
8 Yan, rusaꞌndi xtiidx Dios tiblad persi zinalidi xcostumbr ree bénguidxliuj.
9 Rëb tëë Jesús loj reeman:
―Par chitëë nit xcostumbridi zeel rusaꞌndi xtiidx Dios tiblad.
10 Rëb Moisejs: “Gojp respejt xdadil con xniaal”, abiꞌ “Bén guzaal diidxmal guijc xdad o xniaa, rayal guiëtaman.”
11 Per lëjt rëbidi guial zileꞌ guiëb bejn loj xDadaman o xniaaman: “Ad zajct günan lüj yudar, din gra ni raꞌpan na̱j Corbán” (Corbán rën guiëb gran na̱j par Dios).
12 Rëbidi, bén guiëb zian, ad zileꞌtri güün xdad xniaaman yudar.
13 Abiꞌ rbëëladxidi xtiidx Dios persi zinal xcostumbridi ni rulüü lasaꞌdi, në zien ree ni ren rüjndi lasaꞌ ree ni guin.
14 Dxel gurejdx Jesús bén zien guin ree, rëbaman:
―Gol bacaagdiajg gradi gol bigniaꞌ tëë ni ganin:
15 Ad ni rawt bejn rüjn persi rüjnman dol. Ni ririi roꞌman në ni rüjnman, laan rüjn persi rüjnman dol.
16 ¡Bén rën gucaagdiajg, gol bacaagdiajg!
17 Chi baza Jesús lod zaꞌ ree bén guin bayuman lënü, dxel gunabdiidx ree xbejnman xhie rën guiëb ni rëbaman.
18 Dxel rëbaman loj reeman:
―¿Në lëjt ad rigniaꞌt ni canin ya? ¿Nid ragbeedi ya guial ad ni rawt bejn rüjn persi rüjnman dol,
19 din ni raw bejn ad rejtan luxdooman, rejn lënman, abiꞌ rariin?
Zian basigniaꞌman guial ad rüjnt bejn dol por ni rawzaman.
20 Rëbaman:
―Ni ririi roꞌ bejn në ni rüjnman, laan rüjn persi rüjnman dol.
21 Din guijc bejn zëëd graloj xgab mal, guial rüjn ni dxuudx, guialgubaan, guialrugüjt lasaꞌ,
22 guial rzunë béngunaa ren o xinguiaaw ren, guialrzëëbladx xieen ben ren, guial rüjn ni mal, guialrusquiee, guialrajp vijs, guialnadëdloj, guialrbëë xtiidx bejn, guialrüjn benroꞌ, në guial rüjn ni ad rayalt.
23 Graczi ree ni guin zëëd guijc bejn, abiꞌ laan rüjn persi rüjnman dol.
Rayajc xiꞌn tijb bén Sirofenicia
(Mt. 15:21‑28)
24 Chi baza Jesús niz yagaj, zëman niz Tiro në Sidón. Dxel guyuman tijb lënü guial ad guyëntaman niagbee ree bejn, per ad gojct nuquieꞌch lojman.
25 Din gogbee gajc xniaa tijb bindoo yuꞌ xindxab luxdoo. Abiꞌ wej xniaam lod zaꞌ Jesús zianz bazuxibaman lojman.
26 Ad najtaman bén Israel, najman bén Sirofenicia. Dxel guzajcaman liaadx loj Jesús din yabëëman xindxab guin luxdoo bindoo guin.
27 Per rëb Jesús lojman:
―Badëëdxgaj mod gaw yaloj ree xindoo, din ad rayalt chiquied bejn guiadxtil loj xiꞌnman din gudëëman laan gaw ree bëꞌcw.
28 Badxiꞌ bén guinan rëbaman:
―Waliquil, Dad, per në ree bëꞌcw raw xguiadxtil laay reem ni ryajb xan mex.
29 Dxel rëb Jesús:
―Laaqui guneel. Ma zajc yaguiajl, ma barii xindxab guin luxdoo xiꞌnl.
30 Chi badxin lidx bén guin, baguiaaman laa bindo guin nagaꞌ loj loon, ma barii xindxab guin luxdoom.
Bayajc tijb bén nacwaꞌt ad rniee tëëtaman zagdxe
31 Baza Jesús niz Tiro, gudëdaman niz Sidón, në loj ree guiedx rigaꞌ Decápolis abiꞌ bidxinman roꞌnijsdoo Galilea.
32 Ni bidxinnë reeman tijb xinguiaaw nacwaꞌtix ad rajc tëët rnieex zagdxe. Abiꞌ rëb reeman loj Jesús din gudxiib yaaman guijquix.
33 Zianz binë Jesús laax tiblad, badxeꞌ xbacwënman lën guidiajguix, abiꞌ con xhiejnman bagaalaman lüdxix.
34 Dxel gules lojman xanyabaa, banajladxaman, rëbaman:
―¡Efata! ―rën guiëban: ¡Baxal!
35 Loj hor zii gajc baxal ree guidiajg xin guin, baban lüdxix dxel guzuloj caneex zagdxe.
36 Dxel gunabee Jesús laa reeman chitëë chu loj guiëb reeman ni goc. Per guial rëbaman zian, mazri rü reeman laan loj ree bejn.
37 Dád badxa loj reeman rëb reeman:
―Xi zagdxe na̱j gra ree ni rüjnman, xt rüjnman persi riguiejn ree bén nacwaꞌt, abiꞌ ree bengop rniee reeman.