11
Tioꞌp ree testiw
1 Abiꞌ baneeman tijb var ni rtiaꞌbeenë bejn, naman lon:
―Bisu bicaꞌbee xyadoo Dios në altar, dxel gulabil bén cayajp ree Dios respejt lën yadoo guin.
2 Per ad tiaꞌbeel luleꞌ yadoo guin din luleꞌ guin ma badëë Diosan loj ree bén ad najt ree bén Israel, laa reeman na̱j bén gusagdiaj ree bén Jerusalén loj choon ijz garol.
3 Abiꞌ naj gaxhalan tioꞌp ree da bejnan din guzaꞌt reeman naj. Grop reeman gacw lajd yaꞌs, abiꞌ laa reeman guiniee da diidxan choon ijz garol.
4 Grop ree bén guin na̱j grop ree yag olivo në grop ree candeler ni zaꞌ loj dux Dad ree Dios bén rniabee loj guidxliuj.
5 Bal chu bén rën güünnë laa reeman xhienin, roꞌ reeman grii bajl din gugüjt reeman bén rdxeꞌch ree laa reeman. Zian guiët ree bén rën güün laa reeman xhienin.
6 Grop ree bén guin rajp reeman guialrniabee par gusiaaw reeman xanyabaa chitëë gal guia loj choon ijz garol guin chi guiniee reeman da diidxan. Rajp tëë reeman guialrniabee par guchaa reeman nijs gacan rejn, abiꞌ zajc guiniab reeman din guiꞌt graloj guialzi loj guidxliuj bëltëëz volt rën reeman.
7 Per chi ma bayaaloj tiamp ni guiniee reeman da diidxan, dxel tijb monstruo, tijb be doxh grii lën bizë ni ad rlioxt, be guin caꞌpnë laa reeman abiꞌ güünb laa reeman gan abiꞌ gugüjtib laa reeman.
8 Dxel gaa xcuerp reeman lunejz luguiedx Jerusalén lod güt xdad reeman Jesucrist loj crüjz, luguiedx ni na̱j yan ziꞌcgajc Sodoma në Egipto.
9 Dxel graloj ree bejn bén rniee ree gadxagayaa diidx, bén gralad ree, bén za graloj ree nacion zuguiaa reeman gaa xcuerp ree bén guin lunejz choon dxej garol, per ad zatiëjbt reeman guiguieꞌch ree bén guin.
10 Abiꞌ ree bén naban loj guidxliuj dád yabaa reeman guial ma güjt ree bén guin, abiꞌ guial tant yabaa reeman xt yazaladx reeman xhie renin loj lasaꞌ reeman, din par laa reeman dád basagdiaj ree bén guin laa reeman.
11 Per chi ma bayaaloj choon dxej garol guin, yasban Dios bén guin ree dxel chixche reeman abiꞌ gra ree bén guguiaa dád guidxeb reeman.
12 Dxel dád rejs biguien chaꞌ tijb bén ni gunee xanyabaa, rëbaman loj grop ree bén guin:
―Gol wëꞌp guie.
Abiꞌ wëꞌp reeman xanyabaa lën tijb za̱j delant loj gra ree bén rdxeꞌch laa reeman.
13 Hor ni bayëꞌp reeman xanyabaa biꞌt tijb xudoxh abiꞌ zien ree ni bizeꞌn luguiedx guin abiꞌ gajdx mil bejn güjt. Guiáad gra ree bén ad güjtt dád bidxeb reeman abiꞌ gules reeman xvalor Dios bén yuꞌ xanyabaa.
14 Zian rliox guialzi rarojp, dxel laa zëëd gajc guialzi ni rayon.
Trompejt ni goc gajdx
15 Chi bacwejdx anjl ni goc gajdx guin trompejt ni caꞌman, dxel rejs daꞌt biguien chaꞌ ree bejn xanyabaa rëb reeman:
Ma bidxin dxej yayaꞌn gra xguialrniabee
guidxliuj loj dux Dad ree Dios
në loj Jesucrist abiꞌ nabee reeman zianczi në tiblayaa.
16 Guigajlbitap ree bengol zojb loj xyagxhil reeman delant loj Dios, bazuxib reeman xt basajb loj reeman liuj gojp reeman laaman respejt,
17 rëb reeman:
Dux Dadan Dios, lüj rajp gra guialrniabee
abiꞌ najl Dios yan në diizd gocli abiꞌ guiꞌtil.
Quixtëë lüj guial ma culüü xguialrniabee naroobil ni rajpil
abiꞌ ma guzulojl canabeel.
18 Bénguidxliuj ree bidxeꞌch reeman,
per ma bidxin dxej gulüü xguialrdxeꞌchil.
Ma bidxin dxej güün xguialguxtisil con ree bengüt
par gudëël ni rayal tiaꞌ ree xbejnl
bén badëëd ree xtiidxil, në ree bén bililadx lüj.
Në ree bén rajp lüj respejt.
Ma bidxin dxej ziꞌc ree benzojbloj në ree bén ad zojblojt tiaꞌ reeman ni rayal reeman,
dxel gunidlojl bén ruxhiin ree loj guidxliuj.
19 Chi gulox rëb reeman zian, bixal xyadoo Dios xanyabaa dxel biguien xcaj promejs ni been Dios diizd gocli. Dxel guzuloj rëꞌp nijs, rajc naquieꞌ, rëëz guziaaw, biꞌt xudoꞌxh abiꞌ dád zroꞌ biajb guiajyabaa.