22
1 Balüü tëë anjl guin lon tijb guiiw naya ni razaladx guialnaban, naynidxuj ziꞌc tijb guiaawajn. Ririi nijs guin lod zaꞌ xyagxhil Dios con bén na̱j ziꞌc xi xiilaman,
2 abiꞌ zën galay loj nejz naroob ni naa galay ciuda guin. Galay nejz guin naa guiiw guin, abiꞌ grop lad guiiw guin zojb yag ni runee guialnaban ni rtia chiptioꞌp loj ninejxh, gazobëëw ridxaa ninejxh ni rtia lojn. Abiꞌ ree xbalag yag guin rüjn reen sirv par gac bejn nadaan.
3 Achetri ni mal chuꞌ ni, abiꞌ Dios con bén na̱j ziꞌc xi xiilaman cwe loj xi yagxhil reeman guiáad ree xbejn reeman gap daꞌt laa reeman respejt.
4 Abiꞌ ni guguiaaloj reeman Dios, bén ni ca ree lajman lucwaj.
5 Achetri guiaal chuꞌ ni, ad ryaadxt bajl niꞌqui gubijdx din dux Dad ree Dios gusni ni, abiꞌ ma nabee reeman tiblayaa con laaman.
Ma zidyob guiꞌt Jesucrist
6 Dxel na anjl guin lon:
―Diidx guie ree na̱j ni diidxli ni rayal chililadx ree bejn. Abiꞌ Dios bén razaladx diidx loj ree bén rudëëd xtiidxaman loj ree bejn, laaman guxhaal xi anjl din gulüüman bejn ree ni ma zidyob gac.
7 Dad Jesucrist rëb guial nayob guiꞌtaman.
¡Xiquilbaa ree bén ridxgaꞌ ni ca loj libr guie ni rugojn ni gac!
8 Naj Waj, baguian biguiejn tëën ni guin ree. Abiꞌ chi gulox baguian biguiejn tëën ni guin ree, dxel bazuxiban par gaꞌp daꞌtan respejt anjl ni balüü ree ni guin lon.
9 Per naman lon:
―Ad güünl zian. Din naj ziꞌcgajc lüj, xmandadzi Dios cayguieen, ziꞌcgajc ree xcompniaril bén rudëëd ree xtiidx Dios, në ree bén ridxgaꞌ ree ni ca loj libr guie. Zeel Dios gojp daꞌt respejt.
10 Na tëëman lon:
―Ad guquieꞌchil diidx ni zëëd ree loj libr guie, diidx ni rugojn ree ni gac, din ma zidyob gac reen.
11 Gol basaꞌn ree ben mal con xni mal reeman, abiꞌ ree bén naban nadxuudx zu naban reeman nadxuudx bal zian ruladx reeman. Per bén rüjn ree ziꞌc rayal gusnuu güün reeman ziꞌc rayal abiꞌ ree bén naban ziꞌc rën Dios gusnuu guiban reeman ziꞌc rën Dios.
12 Rëb Jesucrist:
―Gol badxeꞌguijc guial nayob guialan, abiꞌ guidneꞌn ni rayal tijbgaj bejn bal gonin been tijbgajman.
13 Naj na̱j ziꞌc lejtr A con lejtr Z, lejtr ni rzulojnë ni rlioxnë tëë alfabeto, din tijbzi naj rniabee diizd guiaꞌxchej në par tiblayaa.
14 Xiquilbaa ree bén ni na̱j ziꞌc ree bén ma gudiib xab guial ridxgaꞌ reeman xtiidx Dios, din gac chuꞌ reeman niz roꞌ xport ciuda guin din gap tëë reeman derejch gaw reeman ni nejxh ni rtia loj yag runee guialnaban.
15 Abiꞌ xijch ciuda guin yayaꞌn ree benguijdx, bén rüjn ree guialbidxaa, bén rüjn ree ni dxuudx con ree bén ad najt lacheel reeman, bén rugüjt ree bejn, bén ni rajp ree respejt ni naladx reeman na̱j dios, në ree bén ruladx cwëëguijc ni rusquiee rniee tëë reeman diidx rusquiee ree.
16 ―Naj Jesús ma guxhal da anjlan din gugojnman lëjt gra ree ni guie din guiëbidi laan loj gra ree bén rliladx naj. Naj na̱j quijb xdiaa rey Davi, loj xdiaaman zialan. Naj na̱j ziꞌc bajl nayni ni rliejn rsildoo.
17 XSprijt Dios con biinxdüb ni gac lacheel bén na̱j ziꞌc xi xiil Dios rëb reeman:
―Guda.
Abiꞌ bén riguiejn rniee reeman zian, rëb gajcaman:
―Guda.
Chutëëz bén reꞌc nijs, gol guda, abiꞌ bén rën zajc guiëꞌman nijs runee guialnaban lagajzi.
18 Gra ree bén riguiejn ree diidx ni zëëd loj libr guie ni gac, naj rni lojdi bal chu bén gucaa guijc ni zëëd loj libr guie, ziangajc zusroꞌ Dios guialzi ni zëëd loj libr guie par laaman.
19 Ziangajc bal chu chiquied xhie diidx guijc ree diidx ni zëëd loj libr guie ni gac ziangajc chiquied Dios guijc ni rayalaman loj yag runee guialnaban ni ruzaꞌt libr guie ad zayu tëëtaman loj xciuda Dios ni ruzaꞌt libr guie.
20 Bén ragbee guial diidxli na̱j gra ree ni guie, rëbaman:
―Walin, nayob guialan.
Zian gacan Dad Jesús, ¡Guda!
21 Dad Jesús güünleꞌ gradi. Amén.