5
Tijb guiꞌch ni nadüüb con bén na̱j ziꞌc xi xiil Dios
1 Dxel baguian guial bén zojb loj yagxhil zagdxe ni na̱j ziꞌc xyagxhil tijb rey, caꞌman tijb guiꞌch yaaman ladbee. Guiꞌch guin ziꞌc lojn ziꞌc xijchan ca lejtr abiꞌ nadüüban, abiꞌ naguiidan con gajdx se chitëë chu guixhial laan.
2 Loj hor guin baguian tijb anjl bén gojl daꞌt, rbidxaꞌman rejs rëbaman:
―¿Chu rayal chiquied ree se guie abiꞌ guixhial loj guiꞌch guie?
3 Per niꞌqui xanyabaa, niꞌqui loj guidxliuj, niꞌqui lën liuj ad bidxejlt bén ni rayal guixhial guiꞌch guin, niꞌqui par guguiaaman ni ca loj guiꞌch guin.
4 Abiꞌ naj dád binan chi baguian guial achut rdxejl guixhial loj guiꞌch guin në par guguiaaman ni ca loj guiꞌch guin.
5 Dxel na tijb ree bengol guin lon:
―Ad roonl, baguiaa nial ma yuꞌ tijb bén ni rayal guixhial loj guiꞌch guin abiꞌ chiquiedaman guigajdx se guin din ma beenman gan loj gra, laaman bén na̱j ziꞌc tijb beedx loj xdiaa Judá por guialrniabee ni rajpaman, laaman za loj xdiaa rey Davi.
6 Abiꞌ chi baguian, dxel baguian guial galay lod zaꞌ yagxhil zagdxe ni na̱j ziꞌc xyagxhil tijb rey, lod zaꞌ guidap ree be guin galay ree bengol ni rigaꞌ yagaj, zaꞌ tijb bén na̱j ziꞌc xi xiil Dios rguien xsen lod bidxeelguijdxaman chi gütaman. Abiꞌ yuꞌ gajdx xcajchaman con gajdx guiaalojman, guigajdx guiaalojman na̱j guigajdx xSprijt Dios bén rxhiaalaman guidib guidxliuj.
7 Bibig bén na̱j ziꞌc xiil guin cwaꞌman guiꞌch guin ladxaa bén zojb loj yagxhil guin.
8 Chi cwaꞌman guiꞌch guin, guidap ree be zaꞌ gajxh cwëꞌ yagxhil guin në gra guigajlbitap ree bengol guin bazuxib reeman lojman. Tijb gaj ree bengol guin caꞌ reeman tijb gaj arp caꞌ tëë reeman cojp or ni guidxa goxyaal, goꞌxh guin na̱j xtiidx ree xbejn Cristo chi rbejdx rniab reeman Dios.
9 Bengol guin ree rool reeman tijb cant cüb ni rëb:
Lüj rayal tiaꞌ guiꞌch guin
abiꞌ guixhialil se ni naguiidnën.
Din lüj güjtil
abiꞌ con xrejnl ni guxhieꞌl gudijxil
por graloj bejn din gac reeman xbejn Dios,
achet güünan xhietëëz diidx rniee reeman,
o xhie loj diaa, o xhie guiedx o xhie nacion zëëd reeman.
10 Beenl laa reeman rey
been tëël laa reeman bixhioz par dux Dad ree Dios,
abiꞌ laa reeman nabee loj guidxliuj.
11 Baguia tëën biguiejn tëën chaꞌ zien ree anjl gadëd roꞌ yagxhil zagdxe guin con guidap ree be guin në ree bengol guin. Abiꞌ bénguixiujczi na̱j reeman por mil na̱j reeman.
12 Abiꞌ dád rejs rniee reeman rëb reeman:
Bén na̱j ziꞌc xi xiil Dios, bén güt,
laaman rayal tiaꞌ guialrniabee,
laaman rayal gap guialnazaꞌc,
quiarguiejn, në gojl,
respejt, guzaꞌt reeman laaman zagdxe,
guilies tëë reeman xvaloraman.
13 Dxel biguiejnan chaꞌ gra ree ni been Dios, ziꞌc ni yuꞌ ree xanyabaa, loj guidxliuj në ni yuꞌ ree lën liuj në ree ni yuꞌ loj nijsdoo, rëb reen:
Bén zojb loj xyagxhil guialrniabee në bén na̱j ziꞌc xi xiilaman,
par laa reeman na̱j
respejt, diidxzaꞌc, guialrniabee,
abiꞌ guilies reeman xvalor reeman
zianczi në par tiblayaa.
14 Chi gulox rëb reen zian, dxel guidap ree be zaꞌ yagaj rëb reeb:
―Amén.
Abiꞌ guigajlbitap ree bengol zaꞌ yagaj bazuxib par gap reeman laaman respejt, bén ni naban zianczi në par tiblayaa.