8
Guigajdx se
1 Chi biquied bén na̱j ziꞌc xi xiil Dios se ni goc gajdx guin, bayajcdxe xanyabaa cost garol hor.
2 Dxel baguian gajdx ree anjl zaꞌ reeman delant loj Dios, cwaꞌ reeman gajdx trompejt.
3 Dxel biꞌt stijb anjl con tijb chaabacwi ni or, guzuliman delant lo altar guin abiꞌ yuꞌ bén badëëd zien yaal din cuꞌman goxyaal guin loj altar or ni zaꞌ delant loj yagxhil zagdxe ni na̱j ziꞌc xyagxhil tijb rey, din tijbzi chëꞌpnë goxyaal guin xtiidx gra ree xbejn Dios, diidx ni rniee reeman chi rbejdx rniab reeman laaman.
4 Dxel diizd ladxaa anjl guin brii goxyaal guin con ree xtiidx ree xbejn Dios, diidx ni rniee reeman chi cabejdx canab reeman laaman, abiꞌ wëꞌp reen niz loj Dios.
5 Dxel bacha anjl guin chaabacwi guin guij ni yuꞌ loj altar guin abiꞌ bazurlojman laan loj guidxliuj. Abiꞌ dád rejs guridxaꞌ guziaaw, gojc naquieꞌ, wëꞌp nijs, abiꞌ biꞌt xudoxh.
Trompejt ree
6 Dxel guigajdx ree anjl ni caꞌ ree trompejt guin, guzujchaaw reeman par gucwejdx reeman laan.
7 Chi bacwejdx anjl yaloj guin trompejt ni caꞌman, biajb guiajyabaa loj guidxliuj noꞌchan bajl në rejn. Dxel cost gurol guidxliuj weꞌc con ree yag në ree guiꞌxh nagaꞌ yuꞌ lojn.
8 Chi bacwejdx anjl barojp guin trompejt ni caꞌman, dxel ziꞌc na̱j guiaꞌroꞌ ni cacaguij na̱j ni biajb loj nijsdoo, abiꞌ cost garol nijsdoo bayajcan rejn loj hor guin.
9 Abiꞌ cost garol ree be ni naban loj nijsdoo güjt reeb abiꞌ cost garol ree barcw ni yuꞌ loj nijsdoo gunidloj.
10 Chi bacwejdx anjl bayon guin trompejt ni caꞌman, dxel biajb bajl xanyabaa ni naroob ni cacaguij ziꞌc chi rtiaguij guied, loj cost garol guiiw ni yuꞌ në cost garol ree lod rajch nijs biajban.
11 Bajl xanyabaa ni biajb lan Ajenjo, abiꞌ cost garol nijs guin ree gojc nala abiꞌ dád zien ree bejn güjt guial bayajc ree nijs guin nala.
12 Chi bacwejdx anjl badajp guin trompejt ni caꞌman, abiꞌ cost garol gubijdx bicajy, cost garol bëëw në cost garol ree bajl xanyabaa bicajy. Abiꞌ guial bicajy reen, dxel cost garol dxej në guiaal ad basnit.
13 Laꞌtgaj cuguian ni guin ree, biguiejnan ziꞌc chi rzuj tijb bisia xanyabaa. Dxel biguiejnan chaꞌ tijb anjl rbixdiajman rëbaman:
―¡Prob, per prob, per probza ree bén ni yuꞌ loj guidxliuj por zachoon trompejt ni ryaadx gucwejdx za choon ree anjl!