3
Xhienaag guiban ree bén rniabee
1 Gol badxeꞌguijc da diidxan: Bal chu bén rën gap guialrniabee loj gra ree bén rliladx Jesucrist par gulüüman laa reeman xnejz Dios, zagdxequi na̱j ni rënman güünman.
2 Per bén rajp guialrniabee guin rayal güünman ziꞌc rayal chitëë chu guinieeguijdx laaman. Rayal chuꞌ tijbzi lacheelaman, guibanman zagdxe chuꞌ tëë xquiarguiejnman din gap ree bejn laaman respejt. Gacaman benzaꞌc con ree bén rdxin lidxaman, gac tëëman tijb bén rigniaꞌ par gulüüman bejn ree.
3 Ad rayalt gacaman benguꞌ, niꞌqui bén rguiil wadijl ad rayal tëët yaguiilaman mod par tiaꞌman xmilia ree bejn, rayal gacaman benzaꞌc con chutëëz, gac tëëman bén naxanladx ad zazëëbladx tëëtaman milia.
4 Rayal nabee lidxaman ziꞌc rayal din gulüü ree xiꞌnman xhienaag gap reex respejt guzoob tëë reex diidx.
5 Din bal id rajc rniabee lidxaman, ¿xhieza naag nabeeman bén rliladx ree Jesucrist?
6 Zeel tijb bén qui guzulojri rliladx Jesucrist, ad rayalt nabeeman loj ree bén ma rliladx chitëë guilies xvalor gajcaman abiꞌ yayalaman lasaꞌ casti ni bayal xindxab.
7 Bén rajp guialrniabee guin xt ree bén ad rliladxt Jesucrist rayal güünbee laaman guial najcaman benzaꞌc chitëë yayaꞌnxtuman abiꞌ güün xindxab laaman gan.
Ni güün ree bén rüjn yudar bén rniabee ree
8 Yan ziangajc ree bén ma cwabee par güün reeman yudar bén rniabee ree, rayal güün reeman ziꞌc rayal din gap ree bejn laa reeman respejt, güün cumplid xtiidx reeman, ad guiëꞌ tëë reeman, ad yaguiil tëë reeman mod par tiaꞌ reeman xmilia ree bejn.
9 Con xgabzaꞌc chinal reeman ni ma balüü Dios dunuj ree.
10 Zeel yalojxgaj rayal gac reeman prueb abiꞌ bal id xhie xfalt reeman, dxel ma zileꞌ guzuj bejn laa reeman din güün reeman yudar bén rniabee ree.
11 Ziangajc ree béngunaa ni ma cwabee par güün reeman yudar, rayal güün reeman ziꞌc rayal din gap bejn laa reeman respejt ad zaneeguijdxt reeman bejn, rayal guiban reeman zagdxe abiꞌ güün cumplid xtiidx reeman.
12 Abiꞌ ree xinguiaaw cwabee guin par güün reex yudar bén rniabee loj ree xbejn Cristo, tijbzi lacheel reex rayal chuꞌ, nabee tëë lidx reex con xiꞌn reex ziꞌc rayal.
13 Din bén rüjn ree sirv ziꞌc rayal ad respejtzi rajp bejn laa reeman, sin guialrdxeb ma zileꞌ guiëb reeman xhienaag rliladx reeman Jesucrist.
Naroob na̱j bén raliduladx ree
14 Gagnë Dios chileꞌ guialan guidganan lüj. Per cucan guiꞌch guie,
15 din bal gaglaan ma ragbeel xhienaag guiban bejn delant loj los demasri ree xbejn Dios, bén ma na̱j ree xbejn Dios naban, abiꞌ zaꞌdxiꞌch reeman rulüü tëë reeman xtiidxliman.
16 Dunuj ree rayagbee guial dád bén naroob najman, bén raliduladx ree:
Biꞌtaman loj guidxliuj ziꞌc tijb bénguidxliuj,
rëb xSprijt Dios guial laaman na̱j bén naya
abiꞌ baguiaa ree anjl laaman biꞌtaman loj guidxliuj.
Breꞌch xtiidxaman loj ree bén ad najt bén Israel,
guidibczi bililadx bejn laaman abiꞌ
bacaꞌ Dios laaman xanyabaa.