4
Le'e, benne' nácale xrane bénneache, dxal-la' gácale xlátaje̱, ne li lazre' ca dxuchínele benne' ca' ná'ule. Le gusá lázrele, cá'anqueze le'e, zua Xránale xabáa.
Le'e, bi bícha'dau', le guchálajle̱queze Dios, súale ban lazre', ne xe̱le Dios: Xcalenu'. Cá'anqueze, le naba lau Dios waláz chee̱ntu', chee̱ gácale̱ Xránadxu netu' chee̱ séquentu' guchálajntu' xrtizre̱', ne guzéajni'intu' bénneache ca naca da nagache ca naca chee̱ Cristo. Lawe' da dxuna' da caní ne xu'a lizre xia nigá. Le naba lau Dios chee̱ séqueda' guzéajni'i xánneda' bénneache ca dxal-la' guna'.
Le gaca sina ca dxunle chee̱ benne' ca' quebe dxeleajlí lazre̱' Cristo, guchine xánnele zra ca' dxunna Dios le'e. Dizra' dxuchálajle dxal-la' gaca na xrlátaje, ne da xelexezaca ba lazre' bénneache, na' dxal-la' nézele ca xeché̱bele chee̱ tu tu benne' ca' gate bi dxelenábene̱' le'e.
Dxulugapa diuzre bi bíchedxu ca' ljwezre̱'
Tíquico, bi bíchedxu nazrí'i lázredxu guzenbe' le'e ca naca da dxaca chia'. Nácabe' tu bi li lazre' dxácale̱nbe' neda', ne dxunbe' zrin chee̱ Xránadxu tu zren nen neda'. Chee̱ le̱ na', dxusel-la'-be' naga zúale, chee̱ guzenbe' le'e ca dxaca chee̱ntu', ne chee̱ gutípabe' lázrele. Cá'anqueze zéajle̱ Onésimo le̱be', naque̱' bíchedxu li lazre', benne' nazrí'i lázredxu, ne naque̱' benne' walázr chee̱le. Benne' caní xuluzenne̱' le'e ca naca da dxaca nigá.
10 Aristarco, benne' xú'ule̱ne̱' neda' lizre xia, dxugape̱' le'e diuzre, ne cá'anqueze dxun Marcos, bi xrtia Bernabé. Ba bzéajni'ida' le'e ca dxun Marcos. Che waza'be' xedajnná'abe' le'e, le si' lu na'le le̱be' cháwe'dau'. 11 Cá'anqueze bénnea' le̱' Jesús dxugape̱' le'e diuzre, bénnea' lé̱queze̱' Justo. Benne' zan benne' judío dxeleajlí lazre̱' Cristo, san benne' canize ládujla benne' judío ca' dxelune̱' zrin tu zren nen neda', na' dxuzénentu' bénneache ca xelezéquene̱' xelu'e̱ naga dxenná bea Dios, na' dxuluzúe̱' neda' tu lu da ba neza zrente̱. 12 Dxugapa Epafras le'e diuzre. Naque̱' we̱n zrin chee̱ Cristo, ne benne' walázr chee̱quezle. Dxenábaqueze̱' lau Dios chee̱le le'e chee̱ se̱ cháchale, ne guzúa cuínale du lázrele chee̱ gunle da dxaca lazre' Dios. 13 Neda' dxexeche̱ba' chee̱ Epafras, dxe'e̱ gunne xue chee̱le le'e, ne chee̱ bi bíchedxu zaj zre̱'e̱ xe̱zre Laodicea, ne xe̱zre Hierápolis. 14 Dxugapa le'e diuzre Lucas, bénnea' dxexune̱' benne' we̱' ca', ne naque̱' benne' nazrí'i lazra'. Cá'anqueze dxugapa Demas le'e diuzre.
15 Le gugapa diuzre bi bíchedxu zaj zre̱'e̱ xe̱zre Laodicea. Cá'anqueze le gugapa diuzre Ninfas, ne bi bíchedxu ca' dxelezrague̱' lizre̱'. 16 Ca te gulábale le'e xiche nigá, le sel-la na chee̱ xululaba bi bíchedxu ca' zaj zre̱'e̱ Laodicea na. Cá'anqueze le gulaba le'e xiche da ze za na Laodicea. 17 Le xe̱ Arquipo da nigá: Bxue xanne' gunu' cháwe'dau' ca naca zrin chee̱ Xránadxu da bzue̱' lu na'u.
18 Neda' Pablo dxuzúaja' da nigá nen ná'aqueza'. Dxugapa' le'e diuzre. Le gusá lázrele xu'a lizre xia. Dxenaba' lau Dios gune̱' chee̱le da chawe'. ¡Ca'an gaca na!