12
Bi ca' dxuse̱de Jesús dxelequé̱'e̱ dau zrua' xtila gate naca zra dxulupá'ana judío
(Mr. 2.23-28; Lc. 6.1-5)
Ca lu zra na' xu'u Jesús neza zéaje̱' ládujla naga de̱ xel-la' zrua' xtila, ne naca zra dxulupá'ana benne' judío. Dxeledún benne' ca' dxuse̱de Jesús, na' gulezú lawe̱' dxelálaje̱' dau naga zria zrua' xtila, ne dxelawe̱' na. Gate belelé'e benne' xudau' fariseo ca' da caní, na' gulé̱'e̱ Jesús:
―Guná' xque ca dxelún benne' ca' dxusé̱denu', dxelune̱' zrin da quebe naca chee̱' xelune̱' lu zra dxupá'anadxu.
Jesús guzre̱' benne' ca':
―¿Quebe ne gulábale le'e ca be̱n David gate na' le̱', ne benne' ljwezre̱' ca' guledune̱'? Guxú'e̱ lu xu'u chee̱ Dios, ne gulawe̱' xeta xtila lá'azxa, da quebe zaj naca chee̱' xelawe̱', le̱', ne benne' ljwezre̱' ca', san tuze bxruze ca' zaj naca chee̱' xelawe̱' na. ¿Quebe ne gulábale da naxúaj na lu da bdxixruj be'e Moisés ca dxelún bxruze ca' lu xudau', dxelune̱' zrin chee̱ xudau' lu zra dxupá'anadxu, ne quebe zaj nabague̱' zria? Neda' dxapa' le'e, de̱ tu da naca blaudxa ca xudau' nigá. ¿Quebe ne chéajni'ile ca zéaje̱ da naxúaj na lu xiche chee̱ Dios? Dxenná na: Neda' dxaca lazra' xexache lázrele le sa' ljwézrele, ne quegá gútele be̱ xíxre'du ca' lu cugu chia'. La ba guxéajni'ile da nigá, quebe ne guzría xile bénneache quebe zaj nabague̱' dul-la. Chee̱ le̱ na', neda', Benne' Gulje̱' Bénneache, napa' xel-la' dxenná bea dxuna' zrin chia' lu zra dxupá'anadxu.
Dxexún Jesús tu benne' zua zri ne̱'e̱
(Mr. 3.1-6; Lc. 6.6-11)
Nadxa Jesús bezé̱'e̱ na', na' guxú'e̱ tu lu xu'u naga dxelúe lá'ane̱' Dios. 10 Zua tu benne' zua zri ne̱'e̱ ga na'. Benne' judío ca' gulaca lazre̱' xelezrelne̱' ájala xelune̱' chee̱ gaca xelagu zrie̱' chee̱ Jesús. Chee̱ le̱ na' gulenábene̱' Le̱':
―¿Dxunna Dios lataj xexundxu benne' we̱' lu zra dxupá'anadxu?
11 Jesús guzre̱' benne' ca':
―Nútete̱ze benne' zue̱' ládujla le'e, che zua tu zrila' chee̱', ne che bíxreba' tu xe̱dxu situj lu zra dxupá'anadxu, ¿quebe chéaje̱' cheajxeléaje̱'-ba' xca'? 12 Da zrendxa zaca tu benne' quez ca tu zrila'. Ca'an naca dxunna Dios lataj gundxu tu da xrlátaje lu zra dxupá'anadxu.
13 Nadxa Jesús guzre̱' benne' we̱' na':
―Bli na'u.
Ca blí ne̱'e̱, na' bexaca na ca ne̱'e̱ xetú. 14 Nadxa beledxúaj benne' xudau' fariseo ca', ne gulezú lawe̱' dxelílaje̱' ájala xelune̱' xelútie̱' Jesús.
Da gunná tu benne' bchálaje̱' waláz chee̱ Dios ca dxal-la' gaca chee̱ Jesús
15 Gate gúquebe'e Jesús da nigá, na' bezé̱'e̱ na', na' benne' zante̱ zjácale̱ne̱' Le̱'. Bexún Jesús xúgute̱ benne' we̱' zaj zre̱'e̱ ládujla benne' ca'. 16 Jesús gunné̱ xúene̱' benne' ca' quebe nu xululé'ene̱' nu naca Le̱'. 17 Caní guca ca da gunná Isaías, benne' bchálaje̱' waláz chee̱ Dios, gunné̱':
18 Benne' nigá naque̱' we̱n zrin chia', benne' ba gucá'a.
Benne' nigá nazrí'ida', ne dxezaca ba lázrele̱na' Le̱'.
Guzúaqueza' xichaj lázrdawe̱' Be' Lá'azxa chia'.
Guzenne̱' bénneache xúgute̱ xe̱zr la xu ca dxuchi'a da dxaca.
19 Quebe tíl-lale̱queze̱' bénneache, ne quebe cuézrexe̱'e̱.
Netú benne' quebe xenne̱' chi'e̱ la neza.
20 Quebe quichje̱' tu xia da ba nachaj,
ne quebe xusul-le̱' xi' da ba dxaca wexul-la na,
ca zrindxa zra xuzúe̱' xel-la' dxenná bea chawe' chee̱'.
21 Bénneache xúgute̱ xe̱zr la xu xuluxrén lázrequeze̱' Le̱'.
Dxelenné̱' napa Jesús xel-la' dxenná bea chee̱ da xriwe̱'
(Mr. 3.19-30; Lc. 11.14-23; 12.10)
22 Nadxa guleché̱'e̱ lau Jesús tu benne' la chul-la, benne' quebe dxaca nnie̱', lawe' da xu'e̱ be' xriwe̱'. Jesús bexune̱' benne' nigá, na' belé'ene̱', ne benníe̱'. 23 Xúgute̱ benne' ca' belexebánene̱', gulenné̱':
―¿Naca benne' nigá Zri'ine David zra?
24 Gate belén benne' xudau' fariseo da nigá, na' gulenné̱':
―Benne' nigá dxebéaje̱' be' xriwe̱', dxuchínene̱' xel-la' dxenná bea chee̱ Beelzebú, xrane be' xriwe̱' ca'.
25 Dxeque be'e Jesús ca da dxelenné̱', dxelé̱'e̱ ljwezre̱', na' guzre̱' le̱':
―Lu xu'u lawe' chee̱ gátete̱ze xe̱zre, che xelaca chupa la'a benne' xu'u lawe' ca', ne bal-le̱' xeledíl-lale̱ne̱' xezícadxe̱', na' wexul-la wenite xel-la' dxenná bea chee̱ benne' ca'. Cá'anqueze che tu xe̱zre benne', u tu cue' xrtía ljwezre xelaque̱' chupa la'a, ne xeledíl-lale̱ne̱' le sa' ljwezre̱', wenítequeze xe̱zre na', u xrtía ljwezre ca'. 26 Cá'anqueze, che Satanás, da xriwe̱', dxebéaje na ljwezre da xriwe̱', le̱ze na dxexún na chupa la'a cuina na. ¿Ájazra gácaqueze nna bea na? 27 Le'e dxennale chia' dxebéaja' be' xriwe̱' ca', dxuchíneda' xel-la' dxenná bea chee̱ Beelzebú da xriwe̱'. Che naca na ca', ¿Nuzra dxúnnaqueze xel-la' dxenná bea chee̱ benne' ca' zaj naca le'e tuze chee̱ xelebéaje̱' be' xriwe̱' ca'? Chee̱ le̱ na' lé̱queze̱' dxululé'ete̱ne̱' nanéguele le'e. 28 Che neda' dxebéaja' be' xriwe̱' ca' dxuchíneda' xel-la' waca chee̱ Be' Lá'azxa chee̱ Dios, da nigá dxunna bea na ba bla' xel-la' dxenná bea chee̱ Dios ládujla le'e.
29 ’¿Ájazra gun tu benne' chu'e̱ lizre tu benne' wal-la chee̱ que̱'e̱ da de̱ chee̱' che nédxula quebe guchéaje̱' ni'a na' bénnea'? Che gune̱' caní, na' wazéquene̱' que̱'e̱ da de̱ chee̱ bénnea'.
30 ’Nu benne' quebe dxácale̱ne̱' neda', dxedábague̱' neda', na' benne' quebe dxexezígale̱ne̱' neda', dxexúsie̱' na.
31 ’Chee̱ le̱ na' dxapa' le'e, gunite lau Dios chee̱ bénneache xúgute̱ dul-la zaj nabague̱', ne xúgute̱ da cale̱la da dxelenné̱', san che xelenné̱' schanni' chee̱ Be' Lá'azxa, cabata' gunite lau Dios chee̱'. 32 Nútete̱ze benne', che bi nnie̱' schanní' chia' neda', Benne' Gulje̱' Bénneache, Dios gunite lawe̱' chee̱', san che tu benne' nnie̱' schanni' chee̱ Be' Lá'azxa, québequeze gunite lau Dios chee̱' lu xe̱zr la xu nigá ne cá'anqueze lu xe̱zr la xu da za za'.
Da dxun tu benne' dxule'e na ca naque̱'
(Lc. 6.43-45)
33 Na' gunná Jesús:
―Che naca chawe' tu xaga, dxebía na da zixre chawe', na' che naca tu xaga bize, dxebía na da zixre bize. Ca'an naca, tu xaga naca bea na ne̱ chee̱ da zixre da dxebía na. 34 Le'e, be̱ snia ca'. ¿Ájazra gunle le'e nne̱le da xrlátaje che le'e nácaquezle benne' we̱n da cale̱la xca'? Ca da dxedxuaj dxú'adxu naca na ca da zua na lu xichaj lázrdaudxu. 35 Benne' xrlátaje dxenné̱' da naca xrlátaje lawe' da zua da xrlátaje lu xichaj lázrdawe̱', na' benne' we̱n da cale̱la dxenné̱' da cale̱la lawe' da zua da cale̱la lu xichaj lázrdawe̱'. 36 Neda' dxapa' le'e, lu zra guchi'a Dios, xúgute̱ bénneache xuludée̱' ca da gulenné̱', tu tu dizra' xala da gulenné̱'. 37 Ca naca dizra' da ba gunníu', Dios guchi'e̱ chiu', na' Le̱' nnáqueze̱' che xedxúaju' xrlátaje, u che webagu' zria.
Bénneache we̱n da cale̱la ca' dxelenábene̱' Jesús gune̱' tu xel-la' waca chee̱ xabáa
(Mr. 8.12; Lc. 11.29-32)
38 Nadxa bal-la benne' xudau' fariseo, ne benne' dxuluxuzájle̱'e̱ da nadxixruj bea Dios gulé̱'e̱ Jesús:
―Benne' Wese̱de, dxaca lázrentu' le'entu' chiu' gunu' tu xel-la' waca da za xabáa.
39 Na' guzre Jesús benne' ca':
―Bénneache we̱n da cale̱la, benne' zaj naque̱' chupa lazre', dxelenábene̱' neda' guna' tu xel-la' waca da za xabáa. Quebe xelelé'equezne̱' tu xel-la' waca, san tuze ca da dxunna bea na ca da guca chee̱ Jonás, benne' bchálaje̱' waláz chee̱ Dios. 40 Ca guca chee̱ Jonás, guxú'e̱ lu le̱'e̱ bela zren chunna zra chunna xe̱la, cá'anqueze gaca chia' neda', Benne' Gulje̱' Bénneache, waxú'uqueza' lu xe̱dxu ba chunna zra chunna xe̱la. 41 Benne' gulezré̱'e̱ xe̱zre Nínive welexásaqueze̱' lu zra guchi'a Dios gate guchi'e̱ chee̱ bénneache zaj zre̱'e̱ na'a, na' benne' Nínive ca' xululé'ene̱' zaj nabaga zria benne' caní lawe' da belexebí'i lazre' benne' Nínive gate na' bchalaj Jonás dizra' chee̱ Dios lau benne' ca', na' blaudxa ca Jonás na' naca Benne' zue̱' nigá. 42 Cá'anqueze nu'ula na' gunná be'e̱ chalá'a naga dxedá gubizra beu' zaga ca' wexásaqueze̱' lu zra guchi'a Dios gate guchi'e̱ chee̱ bénneache zaj zre̱'e̱ na'a, na' nu'ula na' gulé'ene̱' zaj nabaga zria benne' caní lawe' da bezé̱'e̱ naga naca zítu'te̱ chee̱ xe̱zr la xu nigá chee̱ xenne̱' dizra' sina da bchalaj Salomón, na' blaudxa ca Salomón na' naca Benne' zue̱' nigá.
Ca naca chee̱ be' xriwe̱' da bexú'u na tu benne'
(Lc. 11.24-26)
43 Na' gunná Jesús:
―Gate tu be' xriwe̱' dxedxuaj na tu benne', na' dxedá na lataj naga nabizre, dxexilaj na naga xezí' lazre' na, na' che quebe xezrele na, na' dxenná na lu xichaj lázrdau na: 44 “Webi'a xexá'a lizra' naga bedxúaja'.” Ca xezrín na, le'e na benne' na', naque̱' ca tu xu'u da naxíajlbe̱ lu'ule na, ne nalúa na, ne nagá'ana chawe na. 45 Nadxa cheaj na cheajxezrí na xegazre be' xriwe̱' da zaj naca na xríwe̱dxa ca le̱ na, na' xúgute̱ na dxelú'u na lu bénnea', na' naca chee̱ benne' na' da calé̱ladxa ca guca chee̱' nedxu. Cá'anqueze gaca chee̱ bénneache we̱n da cale̱la caní.
Benne' zaj naque̱' ca xrna Jesús, ne ca benne' biche̱' ca'
(Mr. 3.31-35; Lc. 8.19-21)
46 Jesús ne zue̱' dxuchálajle̱ne̱' benne' caní gate belezrín xrne̱'e̱ ne benne' biche̱' ca' ga na'. Gulezré̱'e̱ chalé'ajla, ne dxelaca lazre̱' xuluchálajle̱ne̱' Jesús. 47 Nadxa tu benne' guzre̱' Jesús:
―Xrna'u, ne bi bichu' ca' zaj zre̱'e̱ chalé'ajla. Dxelaca lazre̱' xuluchálajle̱ne̱' Lue'.
48 Jesús guzre̱' benne' nigá:
―¿Núnbeale nuzra na' xrna'a, ne bi bícha'dau' ca'?
49 Nadxa ble'e Jesús benne' ca' dxusé̱dene̱', dxenné̱':
―Benne' caní zaj naque̱' xrna'a, ne bi bícha'dau' ca'. 50 Caní naca na lawe' da nútete̱ze benne' dxune̱' ca da dxaca lazre' Xra' zue̱' xabáa, benne' nigá naque̱' benne' bicha', ne benne' zana', ne xrna'a.