15
Da dxuxrinnaj na bénneache
(Mr. 7.1-23)
1 Nadxa benne' fariseo ca', ne benne' dxuluxuzájle̱'e̱ da bdxixruj be'e Moisés, benne' ca' beledxuaje̱' lu xe̱zre Jerusalén, gulebigue̱' lau Jesús, na' buluche̱be̱' Le̱', dxelenné̱':
2 ―¿Bizr chee̱ na' benne' ca' dxusé̱denu' quebe dxuluzúe̱' dizra' ca naca da gulún xra xrtaudxu? Quebe dxelíbequeze ne̱'e̱ ca naca da zéajle̱ntu' gate dxelawe̱'.
3 Jesús bche̱be̱' benne' ca', gunné̱':
―¿Bizr chee̱ na' le'e quebe dxuzuale dizra' da dxenná be'e Dios? Dxunle ca naca da zéajle̱le.
4 Dios gunné̱': “Gudapa ba lá'ana xra xrna'u.” Cá'anqueze gunné̱': “Benne' nne̱' schanni' chee̱ xra xrne̱'e̱, le gute bénnea'.”
5 Le'e dxennale waca xe̱ tu benne' xra xrne̱'e̱: “Quebe séqueda' bi gunna' le'e lawe' da ba guche̱be lazra' gunézruja' Dios xúgute̱ da de̱ chia'.”
6 Dxennale che tu benne' dxune̱' caní québedxa dxun na ba xen gácale̱ne̱' xra xrne̱'e̱. Caní dxunle le'e, dxuzuale chala'ala da bdxixruj be'e Dios, chee̱ gunle ca naca da zéajle̱le.
7 Le'e, láweze dxunle da xrlátaje. Da li naca da gunná Isaías, bénnea' bchálaje̱' waláz chee̱ Dios, ca naca chee̱le le'e, gunné̱':
8 Benne' caní dxelape̱' neda' ba lá'ana nen dxú'aze̱'.
Quebe dxelape̱' neda' ba lá'ana dute̱ lázrdawe̱'.
9 Dácheze naca dxelúe lá'ane̱' neda'.
Da gulenná be'ene̱' bénneache naca na da ca' dxulusé̱dene̱'.
10 Nadxa Jesús gunné̱' benne' ca', dxenné̱':
―Le xene, ne le chéajni'i.
11 Da dxu'u na dxu'a bénneache quegá le̱ na guxrinnaj na bénneache. Da dxedxuaj na dxu'a bénneache naca na da dxuxrinnaj na bénneache.
12 Nadxa benne' ca' dxuse̱de Jesús gulebigue̱' lau Le̱'. Dxelé̱'e̱ Le̱':
―¿Nézenu' gulaca tula benne' xudau' fariseo ca' gate belenne̱' da gunnáu'?
13 Jesús guzre̱' benne' ca':
―Bítete̱ze xágadau' da quebe guza Xra' zue̱' xabáa, welé̱peda'.
14 Le gusán benne' ca'. La chul-la zaj naque̱', ne dxulusi'e̱ neza le sa' ljwezre̱' la chul-la ca'. Che tu la chul-la che̱'e̱ le sa' ljwezre̱' la chul-la, dxúpate̱' xelebixre̱' tu lu xe̱dxu.
15 Nadxa Pedro guzre̱' Jesús:
―Bzéajni'i netu' ca naca chee̱ da dxulé'e nigá.
16 Gunná Jesús:
―¿Cá'anqueze le'e quebe dxéajni'ile?
17 ¿Quebe nézele xúgute̱ da dxu'u na dxú'adxu zeaj na le̱'e̱dxu, na' te na' xedxuaj na?
18 Da dxedxuaj na dxú'adxu naca na da za' lu xichaj lázrdaudxu. Da nigá naca na da dxuxrinnaj na bénneache.
19 Lu xichaj lázrdau bénneache dxeledxuaj da dxezá lazre̱' da cale̱la, ca naca xel-la' we̱te benne', ne ca naca xel-la' zuale̱ zru'ula benne' xula, ne ca naca da sban da dxelún bénneache, ne ca naca xel-la' gubán, ne xel-la' we̱n lazre', ne xel-la' wetupa dizra' bizruj.
20 Da caní dxuluxrinnaj na bénneache. Che tu benne' quebe dxexibe ne̱'e̱ ca da zéajle̱le gate dxawe̱' xeta, da nigá quebe dxuxrinnaj na le̱'.
Tu nu'ula zitu' dxéajle̱'e̱ chee̱ Jesús
(Mr. 7.24-30)
21 Nadxa bedxuaj Jesús na', zexíaje̱' chala'a naga zaj nababa xe̱zre Tiro, ne xe̱zre Sidón.
22 Tu nu'ula Canaán zue̱' na' ze̱'e̱ dxebezre xe̱'e̱ cúzrela Jesús, dxenné̱':
―Xran, Zri'ine David, bexache lazre' neda'. Xu'ube' be' xriwe̱' zri'ina' nu'ula, ne cátitega dxezácabe'.
23 Quebe bi beche̱be Jesús. Nadxa belezrín benne' ca' dxusé̱dene̱', ne gulata' xuene̱' Le̱', gulé̱'e̱ Le̱':
―Bsel-la nu'ula nigá lawe' da ze̱'e̱ dxebezre xe̱'e̱ cúzrudxu.
24 Nadxa gunná Jesús:
―Dios gusel-le̱' neda' gácale̱za' benne' Israel ca' zaj naque̱' ca zríla'du ca' zaj naníteba'.
25 Gubiga nu'ula na' naga zua Jesús, ne bzu zribe̱' lau Le̱', ne dxe̱'e̱ Le̱':
―Xran, gúcale̱ neda'.
26 Jesús guzre̱' le̱':
―Quebe naca xrlátaje cá'adxu da dxelagu zrí'inedxu, chee̱ gunézrujdxu na bécudu ca'.
27 Nadxa nu'ula na' guzre̱' Jesús:
―Awe', Xran, san bécudu ca' dxeláguquezeba' da bízrujdu ca' dxelexruj zran naga dxelagu xránaba'.
28 Nadxa Jesús guzre̱' le̱':
―Nú'uladu, da zrente̱ naca xel-la' dxeajlí lazre' chiu'. Gaca ca dxaca lazru'.
Lu zra ná'queze bexaca zrí'ine̱' nú'uladu na'.
Jesús dxexune̱' benne' zante̱ benne' we̱'
29 Jesús guzé̱'e̱ na', gudée̱' dxu'a nísadau' chee̱ Galilea. Guluéne̱' tu lu xi'a, ne gudxé'e̱ na'.
30 Benne' zan belezrine̱' naga zua Jesús, zaj naché̱'e̱ benne' zrinnaj ca', ne benne' la chul-la ca', ne benne' quebe dxaca xelenné̱', ne benne' zan zaj nadxugu ni'a na', ne zánedxa benne' we̱'. Buluzré̱'e̱ benne' ca' lau Jesús, na' Le̱' bexune̱' le̱'.
31 Ca'an guca belexebane benne' ca' gate belelé'ene̱' dxelenné̱' benne' ca' quebe guca xelenné̱' nédxula, ne belexexaca benne' ca' gulaque̱' benne' ni'a na' dxugu, ne dxeledá benne' ca' gulaque̱' benne' zrinnaj, ne dxelelé'e benne' ca' gulaque̱' benne' la chul-la. Gulezú lawe̱' dxelúe lá'ane̱' Dios chee̱ benne' Israel ca'.
Jesús dxugawe̱' tapa cue' tu gaxúa benne' biu
(Mr. 8.1-10)
32 Nadxa Jesús gunné̱' benne' ca' dxusé̱dene̱'. Dxe̱'e̱ le̱':
―Dxexache lazra' chee̱ benne' caní lawe' da ba zeaj chunna zra zrále̱ne̱' neda' nigá, ne quebe bi de̱ da xelawe̱'. Quebe dxaca lazra' xesel-la' le̱' chee̱ cheajxaque̱' lizre̱' quebe ne xelawe̱' chee̱ quebe xelate ni'a ne̱'e̱ la neza.
33 Nadxa benne' ca' dxuse̱de Jesús gulé̱'e̱ Le̱':
―¿Ájazra guntu' zrélentu' da xelagu cátite̱ benne' zan caní? Lataj nigá quebe nu chilá' benne' zua lizre̱' nigá.
34 Jesús bche̱be̱' benne' ca', dxenné̱':
―¿Bal-la xeta xtila nápale?
Benne' ca' belexeche̱be̱':
―Gazre na, ne xetú chupa béladau'.
35 Nadxa Jesús gunná bé'ene̱' benne' zan ca' xelebé'e̱ lu xu.
36 Guqué̱'e̱ da gazre xeta xtila, ne béladu ca', na' guzre̱' Dios: “Xcalenu'.” Nadxa bzúzruje̱' na, ne bnézruje̱' na benne' ca' dxusé̱dene̱', na' benne' ca' gulísie̱' na chee̱ benne' zan ca'.
37 Xúgute̱' gulawe̱', ne belélajte̱ne̱'. Gudé na' bulusuzrate̱' gazre ga' da bízrujdu ca' zaj nagá'ana.
38 Benne' gulagu zaj naque̱' tapa cue' chi gaxúa benne' biu, ne quebe nu blaba nu'ula, ne bidu ca'.
39 Gudé na' Jesús bze̱' benne' zan ca' dizra', na' bexu'e̱ lu da dxedá lawe' nísadau' zexíaje̱' naga nababa xe̱zre Magdala.