112
1 Ba neza zrente̱ naca na chee̱ bénnea' dxezrebe̱'
Xránadxu Dios,
ne ca zaj naca da bdxixruj be̱'e̱ dxezaca ba lázrele̱'e̱ne̱'.
2 Zri'ine zre sua bénnea' xelape̱' xel-la' dxenná bea
lu xe̱zr la xu,
na' gaca chawe' chee̱ benne' xrlátaje ca'.
3 Da zan da de̱, ne xel-la' gunní'a zaj zra na xu'u lizre̱',
ne tu chí'izqueze zua da xrlátaje da dxun bénnea'.
4 Dxusaní' tu xi' lu da chul-la naga zaj zra' benne' li lazre' ca',
benne' ca' zaj naque̱' zren lazre', ne xrlátaje,
ne dxelexache lazre̱' bénneache.
5 Tu benne' xrlátaje dxexache lazre̱' bénneache,
ne dxusane̱' le̱' dumí.
Lu da xrlátaje dxenná bé'ene̱' da zaj xu'u lu ne̱'e̱.
6 Chee̱ le̱ na' quebe bi gutá na le̱' lu lataj naga zue̱',
na' tu chí'izqueze xeajlesá lazre̱' bénneache ca'.
7 Quebe zrebe̱' gate xenne̱' dxaca da cale̱la chee̱
da xu'u lu ne̱'e̱.
Ze̱ chacha lázrdawe̱' lawe' da dxuxrén lazre̱' Xránadxu Dios.
8 Zua chawe' lázrdawe̱', ne quebe bi dxezrebe̱',
ca zrindxa zra lé'ene̱' gaca chee̱ benne' ca' guledábague̱' le̱'
ca da dxezá lazre̱'.
9 Dxisie̱' da de̱ chee̱', ne dxunézruje̱' da gácale̱
benne' xache' ca',
ne tu chí'izqueze zua da xrlátaje da dxune̱'.
Lu da xabáa xegá'ana szren xel-la' dxenná bea chee̱'.
10 Walé'e benne' we̱n da cale̱la da nigá, na' gueque zréajene̱'.
Gágu xa'ate̱ lazxe̱', ne cue'e̱ gunne xue.
Xelenite da ca' dxelezá lazre' benne' ca' dxelune̱' da cale̱la.