129
Zúadxu lu da sté̱bele̱'e̱ gate nácate̱dxu cuide',
waca xelenná benne' Israel ca'.
Zúadxu lu da sté̱bele̱'e̱ gate nácate̱dxu cuide'
san quebe buluzria xi'e̱ dxi'u.
Belune̱' we̱' cúzrudxu gate beline̱' dxi'u xide,
na' gulaca cúzrudxu ca xe̱zr la xu naga dxedé xia chee̱ be̱zre.
Xlátaje̱ naca Xránadxu Dios.
Bselé̱' dxi'u lu na' benne' ca' buluchínene̱' dxi'u xadíaze.
Be̱n cheajlechaze, ne xelebígaqueze
xúgute̱ benne' ca' dxelecuídene̱' benne' Sión ca'.
Be̱n xelaque̱' ca xíxre'du ca' dxelebía na xrgu'u
da dxelebizre na gate ne zaj nadxé'ene na,
da na' quebe nu benne' dxexequé̱'e̱ na,
ne quebe seque' nu benne' gune̱' na tu cheaj weaj.
Quebe xelenná benne' dxeledée̱' naga zaj zria na:
Dxenábantu' gun Xránantu' Dios gaca chawe' chee̱le.
Lu La Xránantu' Dios dxenábantu' gaca chawe' chee̱le.