139
1 Xrana' Dios, ba gunná' xánniu' neda'
ne núnbea xánniu' neda'.
2 Nézqueznu' gate dxe'a, ne gate dxasa'.
Zítu'la nézqueznu' da zaj xu'u xichaj lázrdawa'.
3 Ba gunná' xánniu' ca dxuna', ne ca dxexezí' lazra'.
Nézqueznu' xúgute̱ da dxuna'.
4 Gate quebe ne guchálaja' ba nézqueznu' Lue', Xran,
xúgute̱ da nnia'.
5 Gátete̱zla cuita' neda' zúaquezu' Lue', Xran,
ne nuzé̱ na'u neda'.
6 Ca szrente̱ naca da nézenu' Lue' naca na da dxebáneda'.
Nácale̱'e̱ na sina da quebe gaca chéajni'ida'.
7 ¿Gala cha'a zitu' naga quebe zúaqueze Be' chiu'?
¿Gala guzrúnnuja' naga quebe zúaquezu' Lue'?
8 Che cuena' sibe zran xabáa, na' zúaquezu' Lue',
ne che xétaja' lu da situj chee̱ xe̱zr la xu, na' zu' Lue'.
9 La séqueda' tea' lu be', ne cha'a zitu' naga dxalaj gubizra,
u tea' xechalá'a nísadau' naga dxebía gubizra,
10 cá'anqueze na' súale̱nu' neda',
ne guxru na'u xabe̱la neda'.
11 Chela gaca guna' gacu da chul-la neda',
u guna' xexaca lení' da naxechaj neda', chee̱
xaca na da chul-la,
12 da chul-la na' quebe gaca gucache na neda' lau Lue',
na' chizrela xaca na ca te zra lau'.
Túzqueze ca zaj naca da chul-la, ne xel-la' naxaní' lau Lue'.
13 Lue' be̱nu' da zaj xu'u lu be̱la' dxen chia'.
Lue' bzalju' neda' lu le̱'e̱ xrna'a.
14 Güe lá'anaqueza' Lue' lawe' da szrente̱ zaj naca da dxunu',
ne dxebáneda' ca zaj naca na.
Dute̱ lázrdawa' nézquezda' caní naca na.
15 Blé'equeznu' neda' gate gulá' gubinna zrita xu'a,
gate na' belezraga na lu le̱'e̱ xrna'a,
gate na' bgula' lu da bagácheze na'.
16 Ble'enu' be̱la' dxen chia' gate gulá' gubinna na.
Xúgute̱ da caní ba naxúaj na lu xiche chiu',
na' ca gudé na' gulá' gubinna na,
na' xúgute̱ na gulaca na cáte̱ze zaj naxúaj na.
17 Dios, szrente̱ zaj naca da dxuwía lazru' gunu'.
Da zante̱ ca zaj naca na.
18 Chela gaca lazra' gulaba' ca zaj naca na,
zaj naca na ca xuzre' dxe' dxu'a tu xe̱gu zren.
Gate dxexebana', ne zúale̱queza' Lue'.
19 Dios, da líqueze gutiu' benne' ca' dxelune̱' da cale̱la.
Chee̱ le̱ na', le gucuasa naga zua', le'e, we̱te benne'.
20 Chiu' Lue', Dios, dxelenné̱' dizra' schanni'.
Benne' ca' dxeledábague̱' lue' dxuluzétaje̱' Lau' lu da xálaze.
21 Xrana' Dios, dxecuídeda' benne' ca' dxuluzúe̱' Lue'
chalá'ala,
ne dxezrá'li'a benne' ca' dxeledábague̱' Lue'.
22 Dute̱ lázrdawa' dxecuídeda' benne' ca'.
Dxéqueda' benne' ca' ca benne' ca' dxeledábague̱' nédaqueza'.
23 Gunná' xanne' neda', Dios, ne gunná' da xu'u na lázrdawa'.
Bxue neda' chee̱ nézenu' da xu'u lu xichaj lázrdawa'.
24 Gunná' che zúale̱ tu da cale̱la neda',
na' bsi neda' lu neza chawe' chiu' da zeajlí canna.