46
Dios naque̱' Benne' dxuxúe̱' dxi'u, ne dxune̱' dxi'u
benne' wal-la.
Zúate̱queze̱' gácale̱ne̱' dxi'u gate dxededxu xel-la' zi'.
Chee̱ le̱ na', quebe zrébedxu lácala xru' xe̱zr la xu nigá
na' cheajlechaze xi'a ca' lu nísadau',
ne lácala xeajxruza zren chee̱ nísadau' xuluninne na,
ne dxelúnle̱'e̱ na schaga,
na' welezrízequeze xi'a ca' ne̱ chee̱ da dxezrú'.
 
De̱ tu xe̱gu da dxunna na xel-la' dxebé lu xe̱zre chee̱ Dios,
ne lu xu'u lá'azxa chee̱ Dios, Benne' nape̱' dute̱ xel-la' szren.
Dios zue̱' xe̱zre na', ne cabata' cuía xi na.
Dxaní'sise̱' xide̱' gácale̱ne̱' bénneache zaj zre̱'e̱ xe̱zre na'.
Dxelezrébele̱'e̱ benne' xe̱zr la xu ca',
na' dxelezrize benne' chee̱ wenná bea ca'.
Dxenné̱ Dios ca dxenné̱ guziu', na' dxexuna xe̱zr la xu.
 
Dios, Bénnea' nape̱' dute̱ xel-la' waca, zúale̱ne̱' dxi'u.
Dios na' chee̱ Jacob dxucache chawe̱' dxi'u.
 
Le da lé'ele da ca' nun Xránadxu.
Le nna' ca naca da dxebánedxu da nune̱' lu xe̱zr la xu.
Dxebeque zrie̱' wedil-la da dxelaca du gabí'i xe̱zr la xu.
Dxuzúzruje̱' da dxuzala na xaga nalá xéche'ze ca',
ne dxíchuje̱' xaga tuche' ca' chee̱ wedil-la,
na' dxuzezxe̱' da ca' zaj nache̱' benne' wedil-la ca'.
10 Dxenná Dios: “Le sua zrize, ne le xúnbea naca' Dios.
Naca' szrendxa ca zaj naca xúgute̱ cue' xe̱zr la xu.
Naca' szrendxa ca dute̱ xe̱zr la xu.”
 
11 Dios, Bénnea' nape̱' dute̱ xel-la' waca, zúale̱ne̱' dxi'u.
Dios na' chee̱ Jacob dxucache chawe̱' dxi'u.