51
Gúcale̱ neda', Dios, lu dute̱ xel-la' dxexache lazre' chiu'.
Dute̱ xel-la' dxexache lazre' chiu' bsula zria da nabaga'.
Gudibe neda' ca naca da cale̱la da nuna',
ne bca'ana chawe' neda' chee̱ dul-la da be̱na',
lawe' da dxexúnbe'a ca be̱na' gudábaga' Lue',
ne ca naca dul-la chia' tu dxáguze na zria neda'.
Lau' Lue' be̱na' dul-la.
Awe', lau' Lué'queze, ne ba be̱na' da cale̱la lau' Lue'.
Caní dxaca na chia' chee̱ gaca bea nacu' xrlátaje lu da dxenníu',
ne nacu' du lazre' ca da dxuchi'u chee̱ bénneache.
Gunná' xque, báchequeze nabaga' dul-la gate gúlajtea',
ne lu dul-la zúaqueza' gate guzrán xrna'a neda'.
Lue' dxezá lazru' sua da li lu xichaj lázrdawa',
ne lu xichaj lázrdawa' ba bzéajni'inu' neda' da naca sina.
Bca'ana chawe' neda' nen da na' dxuchínenu',
na' xegá'ana' xrlátaje.
Gudibe neda', na' gaca' chíchedxa ca tu bezxe'.
Be̱n xenda' xel-la' dxebé, ne da ba neza,
na' xelexezí' le dipa zrita xu'a, da ba gudíchaju'.
Quebe gusá lazru' ca naca dul-la da be̱na',
na' bsula xúgute̱ da cale̱la da nuna'.
10 Dios, bzua neda' tu lázrdawa' xrlátaje,
ne bzua tu be' li lazre' lu xichaj lázrdawa'.
11 Quebe gucuasu' neda' lau' Lue',
ne quebe xeca'u lu xichaj lázrdawa' be' lá'azxa chiu'.
12 Bexunna neda' xel-la' dxebé chee̱ xel-la' weselá chiu',
ne bzua chuchu be' chawe' da xu'a.
13 Nadxa gusé̱deda' benne' ca' dxelune̱' da zrinnaj
ca dxaca lazru' xelune̱',
na' benne' dul-la ca' xelexexaque̱' chiu' Lue'.
14 Bselá neda' lu zria da nabaga', be̱tia' benne'.
Lue' Dios, nacu' Dios dxuseláu' neda',
na' gúl-laqueza' chee̱ da xrlátaje nacu' Lue'.
15 Xran, gusalaj dxu'a,
na' guzenda' bénneache da dxue lá'ana' Lue'.
16 Quebe dxaca lazru' béadu ca' gutia'-ba' lau',
ne quebe dxaca lazru' béadu ca' guzézxea' lau'.
17 Da guzúadxu lau Dios da dxaca lazre̱' naca na
tu lázxdau dxexruj lazre'.
Tu lázxdau dxexruj lazre', ne da dxexíaje lazre'
quebe guzú' chalá'ala, Dios.
18 Dute̱ xel-la' zri'i lazre' chiu', be̱n gaca chawe' chee̱
xe̱zre Sión.
Bsegula ze'e da nazechaj na xe̱zre Jerusalén.
19 Nadxa xezaca ba lazru' nen béadu ca' gútentu' lau'
dute̱ da naca xrlátaje chee̱ntu',
ne béadu ca', ne da du ca' guzézxentu' lau'.
Nadxa xelútie̱' béadu ca' lu cugu chiu'.