63
1-2 Dios, Lue' nacu' Dios chia'.
Dxebile bénne'du xu'a da naca chiu',
na' be̱la' dxen chia' dxezá lazre' na da naca chiu'.
Naca chia' ca zúaqueza' tu xe̱zr la xu bizre naga
quebe bi nisa de̱.
Dxaní'siseze xida' lau Lue' chee̱ le'eda' xel-la' waca chiu',
ne xel-la' szren chiu',
cáte̱ze ba ble'eda' da naca chiu' lu lataj lá'azxa chiu'.
3 Cháwedxa naca xel-la' dxexache lazre' chiu'
ca xel-la' nabánqueze.
Chee̱ le̱ na' güe lá'anaqueza' Lue'.
4 Caníqueze nnia' chiu' da xrlátaje dxácate̱ naca bana'.
Chee̱ gucá'ana szrena' Lau' chísaqueza' na'a.
5 Xélaje bénne'du xu'a da naca na ca be̱se zrita,
ne be̱la' da dxánnele̱'e̱,
na' dute̱ xel-la' dxebé güe lá'anaqueza' Lue'
6 gate dxajsá lazra' chiu', ne dea' ga dxata',
ne gate dxulaba lazra' ca naca chiu' gate dxennaza' chizrela.
7 Lawe' da dxácale̱nu' neda', béle̱'e̱da' cuitu'
ca dxelún bedxuj dxé'enedu ca' zran xrila bedzuj.
8 Naca bénne'du xu'a Lue' tuze.
Nen na'u wal-la nuxru' neda'.
9 Benne' ca' gulezá lazre̱' xuluzría xi'e̱ neda'
cheajlecházie̱' lataj ba xa'.
10 Xelebía xi'e̱ lu xia nalá.
Xelaque̱' da xelagu becu' xixre' ca'.
11 Neda', wenná bea, beda' lu da naca chee̱ Dios.
Xegá'ana ba lá'ana nútete̱ze benne' dxuluchínene̱' la',
lawe' da xelezxuj dxu'a benne' ca' dxelenné̱' da we̱n lazre'.