72
¡Dios, be̱n guchi'a wenná bea da dxaca chee̱ntu'
ca dxuchí'aquezu' Lue',
ne be̱n xelaca xrlátaje zri'ine wenná bea na'!
Nadxa le̱' guchi'a chee̱ bénneache chiu' ca naca
da naca xrlátaje,
ne ca naca da li guchi'e̱ chee̱ benne' chiu' ca' zaj zue̱'
lu da ba xa'.
Lu xi'a ca' xelebeza zri lazre' bénneache chiu',
ne lu xí'adu ca' xelezúe̱' lu da naca chawe'.
Guchi'e̱ chee̱ benne' ca' zaj zue̱' lu da ba xa'
lu xe̱zre chee̱ntu',
ne guselé̱' bidu ca' chee̱ benne' ca' dxelexázrjene̱',
ne guzría xi'e̱ benne' ca' dxulusaca zi'e̱ bénneache.
Xelezrebe̱' Lue' dxácate̱ ne zua gubizra,
ne beu' lawe' tu cuen tu cuen bénneache.
Gaca wenná bea na' ca nisa xiuj da dxaca naga ba nadín,
ne ca xrle̱'e̱la da dxaca dxe̱la lu xe̱zr la xu.
Lu zra chee̱ wenná bea na' gaca da xrlátaje,
ne xelebeza zri lazre' bénneache dxácate̱ ne zua beu'.
Nna be'e̱ dute̱ xe̱zr la xu,
ne dxu'a xe̱gu Eufrates, ga zrinte̱ dxu'a nísadau'.
Lau le̱' xuluzú zribe benne' ca' zaj zre̱'e̱ xe̱zr la xu,
na' guzéxruje̱' lazre' benne' guledábague̱' Le̱'.
10 Benne' wenná bea chee̱ xe̱zr la xu Tarsis,
ne wenná bea ca' chee̱ tu tu cue' xe̱zr la xu zitu' ca'
xelelé̱'e̱ zaj nu'e̱ da xulunézruje̱' chee̱',
na' benne' wenná bea chee̱ xe̱zr la xu Sabá,
ne wenná bea chee̱ Seba xulunézruje̱' chee̱' da gunní'a.
11 Xúgute̱ benne' wenná bea ca' xuluzú zribe̱' lau le̱',
na' benne' xúgute̱ cue' xe̱zr la xu xelune̱' zrin chee̱'.
12 Le̱' guselé̱' benne' ca' dxelexázrjene̱',
benne' dxululáwizre̱' le̱',
ne guselé̱' benne' ca' zaj zue̱' lu da ba xa',
ne quebe sua nu benne' gácale̱ne̱' le̱'.
13 Xexache lazre̱' benne' xache' ca', ne benne' ca'
dxelexázrjene̱',
na' guselé̱' benne' xache' ca' chee̱ xelaca bane̱'.
14 Xexá'awe̱' benne' xache' ca' lu na' benne' we̱n lazre' ca',
ne benne' snia ca'.
Gune̱' ba xuzre guselé̱' benne' ca' lu na' benne' ca'
dxelutie̱' benne'.
15 Gaca ban wenná bea nigá,
na' xulunézruje̱' chee̱' oro chee̱ xe̱zr la xu Sabá,
na' tu xelenábazqueze bénneache Dios gácale̱ne̱' le̱',
ne te zra chizrela xelenabe̱' Dios gune̱' gaca chawe'
chee̱ wenná bea na'.
16 Tu zrígadauze zrua' xtila xelaze̱' lu xe̱zr la xu,
ne lu xí'adu ca',
da cuíale̱'e̱ na ca da dxebía lu xi'a Líbano,
na' benne' zaj zre̱'e̱ lu xe̱zre ca' xelane̱' ca xixre' ze̱ lu xe̱zr la xu.
17 Tu súazqueze la benne' wenná bea na'.
Tu xuluchálajzqueze̱' chee̱ la le̱' dxácate̱ ne zua gubizra.
Ne̱ chee̱ le̱' gaca da ba neza chee̱ bénneache xúgute̱
cue' xe̱zr la xu,
na' xelenné̱' chee̱' naca chee̱' da ba neza zrente̱.
18 Xrlátaje naca Xránadxu Dios, Dios chee̱ benne' Israel ca',
na' tuze Le̱' dxune̱' da dxexebánedxu.
19 Xrlátaje naca La Le̱' da naca na da xabáa chadía chacanna,
na' dute̱ xe̱zr la xu nigá xelelé'ene̱' da xabáa chee̱'.
¡Ca'an naca na, ne ca'an gaca na!
20 Nigá dxexuzre xrtizra' David, da dxuchálajle̱ne̱' Dios.
David nigá naque̱' zri'ine Isaí.