77
1 Nen chi'a bláwizra' Dios.
Bláwizra' Dios, na' Le̱' buzé̱ nague̱' chi'a.
2 Guxu'a lau Xránadxu lu zra guzúa' lu da ba xa'.
Chizrela guchisa na'a lau Le̱', ne quebe guzúa zria'.
Quebe be̱'a lataj nu benne' xue zrene̱' neda'.
3 Bsa lazra' chee̱ Dios, ne guzúa' ste̱be.
Gudawa' zria lawe̱', ne bedú lazra'.
4 Begúe̱' bchigala chia'.
Guzúa' sté̱bele̱'e̱, ne quebe guca guchálaja'.
5 Blaba lazra' ca naca zra nédxute̱.
Ca naca iza zan ca' da ba guledé chee̱ na.
6 Bsa lazra' ca naca da bil-la' chizrélala,
ne blaba lázrequeza' ca zaj naca na, na' gunaba be' xu'a:
7 ¿Guzúa Xránadxu dxi'u chalá'ala tu chi'ize
ne québedxa gácale̱ne̱' dxi'u?
8 ¿Cabátadxa xexache lazre̱' dxi'u?
¿Cabátadxa gune̱' ca da guche̱be lazre̱'?
9 ¿Gul-la lázrequeze Dios xexache lazre̱' dxi'u?
¿Dxezré̱'e̱ dxi'u, na' québedxa xexache lazre̱' dxi'u?
10 Nadxa gunnía': Caní dxuna' lawe' da quebe chawe' zua'.
Chee̱ le̱ na' cheajsá lazra' chee̱ xúgute̱ da zrente̱
da be̱n Dios zrente̱ lu iza ba guledé chee̱ na.
11 Cheajsá lazra' chee̱ da zrente̱ ca' da be̱n Jah.
Awe', cheajsá lazra' chee̱ da be̱nu' nédxudaute̱ da ca'
dxexebánentu'.
12 Gulaba lazra' ca naca xúgute̱ da ba be̱nu',
ne guchálaja' ca zaj naca da nunu'.
13 Dios, lá'azxa naca da dxusé̱denu' netu' ca guntu'.
¿Zua xetú Dios naque̱' benne' zren ca naca Dios chee̱ntu'?
14 Lue' nacu' Dios, dxunu' da ca' dxexebánentu'.
Blé'enu' xúgute̱ bénneache lu xe̱zr la xu ca zrente̱
naca xel-la' waca chiu'.
15 Nen xel-la' waca chiu' bexa'u bénneache chiu',
zri'ine zre sua Jacob, ne zri'ine zre sua José.
16 Xe̱gu nisa ca' belelé'en Lue', Dios.
Belelé'e xe̱gu nisa ca' Lue', na' belezrébele̱'e̱ na.
Cá'anqueze gulezúa ste̱be nísadau' situj ca'.
17 Nisa xiuj zila bdxuaj na lu beuj bza ca',
ne gulenné̱le̱'e̱ guziu', ne gulé̱pele̱'e̱ xesa.
18 Lu be' bdunu' ben guziu' chiu' da gunné̱le̱'e̱ na.
Bulusaní' xesa guziu' ca naca xe̱zr la xu.
Guzúa ste̱be, ne guzrize xe̱zr la xu.
19 Lawe' nísadau' guza'u,
ne lawe' nisa zila ca' gudéquezu',
ne quebe naca bea naga bléaju'.
20 Guche̱'u bénneache chiu' ca zrila' ca'
lu na' Moisés, ne lu na' Aarón.