19
Gudé na' benda' chi'i benne' zan zaj zre̱'e̱ xabáa, dxelenné̱' zizraj:
¡Gaca ba Dios! ¡Xel-la' weselá, ne xel-la' szren, ne xel-la' dxenná bea zaj naca na chee̱ Dios chee̱dxu.
Ca dxuchi'a Le̱', xrlátaje̱, ne li lazre' naca na!
¡Ba bzria xi'e̱ xe̱zre na' dxulé'e na nu'ula na' núnle̱'e̱ da sban,
nu'ula na' bxrínnaje̱' bénneache zaj zre̱'e̱ dute̱ xe̱zr la xu lu da sban da be̱ne̱'!
¡Dios ba bebéaj lazre̱' nu'ula na' lawe' da be̱tie̱' we̱n zrin ca' chee̱ Dios!
Nadxa gulenné̱' da xula:
―¡Gaca ba Dios lawe' da tu cuénzqueze zren chee̱ xe̱zre na' dxezxe na!
Nadxa tape dxua benne' gula ca' ne tapa benne' ban ca' buluzú zribe̱', na' bulucá'ana szrene̱' Dios, Bénnea' dxe'e̱ lataj blau na', dxelenné̱':
―¡Ca' naca na! ¡Gaca ba Dios!
Nadxa ben tu chi'i benne' lu lataj blau na', dxenné̱':
¡Le güe lá'ana Dios chee̱dxu, xúgute̱le le'e dxunle zrin chee̱',
ne dxezrébele Le̱', le'e benne' blau, ne benne' quebe nu nácale!
Laní chee̱ wechaga na' chee̱ Bénnea' naque̱' Zríla'dau'
Cá'anqueze benda' tu da naca ca chi'i benne' zan, ca dxeleninne zánete̱ xe̱gu, ne ca dxelenné̱le̱'e̱ guziu' ca', dxelenné̱':
¡Gaca ba Dios lawe' da ba guzú lau dxenná bea Xránadxu Dios, Benne' nape̱' dute̱ xel-la' dxenná bea!
¡Du be! ¡Béle̱'e̱quezdxu, ne güe lá'anadxu Le̱'!
¡Ba bzrin zra chee̱ laní wechaga na' chee̱ Bénnea' naque̱' Zríla'dau'!
Nu'ula na' si'e̱ ba nupá'a cuínabe',
nu'ula na' nazi'ibe' lataj nácube' ladxe' zaca, da quebe nadxén na, ne dxácatite na.
Ladxe' zaca na' zéaje̱ na da xrlátaje̱ da zaj nun benne' ca' zaj naque̱' bi chee̱ Dios.
Nadxa guzre gubáz chee̱ xabáa neda':
―Bzuaj caní: Ba neza zren naca na chee̱ benne' ca' gunné̱ Dios xelelé̱'e̱ laní wechaga na' chee̱ Bénnea' naque̱' Zríla'dau'.
Nadxa guzre̱' neda':
―Da caní zaj naca na dizra' li chee̱ Dios.
10 Nadxa bzu zriba' lau gubáz chee̱ xabáa na' chee̱ gucá'ana szrena' le̱', na' le̱' guzre̱' neda':
―Quebe gunu' caní lawe' da nácaqueza' neda' we̱n zrin chee̱ Dios ca lue', ne ca benne' bichu' ca' zéajle̱le da li na' da ble'e Jesús le'e. Bca'ana szren Dios. Da li na' da ble'e Jesús le'e naca na da dxelenná benne' ca' dxuluchálaje̱' waláz chee̱ Dios.
Benne' zrie̱' bzrina' chiche
11 Nadxa ble'eda' ba naxalaj xabáa, na' ble'e lau tu bzrina' chiche, na' Benne' zrie̱'-ba' le̱' Du Lazre', ne Li Lazre', lawe' da dxenná be'e̱, ne dxune̱' wedil-la lu da xrlátaje̱. 12 Xiaj lawe̱' dxelácatite na ca xi' ca, na' xíchaje̱' zaj zria zánete̱ da zaca ca', na' naxúaj tu le̱' lawe̱', da nézene̱' tuze Le̱'. 13 Nacue̱' tu zre̱' da nazaj na dxen, na' La Le̱' naca na Xrtizra Dios. 14 Xúgute̱ benne' ca' zaj zre̱'e̱ xabáa zjácale̱ne̱' Le̱', zaj nacue̱' ladxe' zaca ca', ladxe' chiche zríladau', ne zaj zrie̱' bzrina' chiche ca'. 15 Dxu'a Bénnea' zua tu da naca na ca tu xia nalále̱'e̱ da quine̱' benne' xe̱zre ca', na' nna be'ene̱' benne' ca' nen tu bar xia. Le̱' guzría xi'e̱ benne' ca' ca tu benne' dxesíe̱' uva ca', ne dxuléaje̱' na, da zéaje̱ na da ba xa' da nucueza Dios lu xel-la' dxezrá'a chee̱', ca da xelezaca bénneache ca'. 16 Naxúaj le̱'e̱ zre̱', ne zríchuje̱' da nazí Le̱' caní: Benne' Dxenná Be'ene̱' Benne' Wenná Bea Ca', ne Xrane Benne' Ca' Zaj Naque̱' Xrane Bénneache.
17 Nadxa ble'eda' tu gubáz chee̱ xabáa ze̱' lu gubizra, na' gunné̱' zizraj xúgute̱ be̱ zua xrila, be̱ dxeledá zran xabáa, dxenné̱':
―Le da. Le zraga gágule da dxúnnale̱'e̱ Dios le'e, 18 chee̱ gágule be̱la dxen chee̱ benne' wenná bea ca', ne chee̱ benne' dxelenná be'e̱ lu wedil-la, ne chee̱ benne' wal-la ca', ne chee̱ bzrina' ca', ne chee̱ benne' zaj zrie̱'-ba', ne chee̱ xúgute̱ bénneache, benne' ca' zaj nadá'ue̱', ne benne' ca' quebe zaj nadá'ue̱', benne' blau ca' ne benne' quebe nu zaj naque̱'.
19 Nadxa ble'eda' be̱ xixre' schanni', ne ca naca benne' wenná bea zaj zre̱'e̱ xe̱zr la xu nen benne' dxjaca wedil-la chee̱ ' ca', ba nazrague̱' chee̱ xeledíl-lale̱ne' Bénnea' zrie̱' bzrina' chiche na', ne nen benne' ca' zaj de̱'e̱ Le̱'. 20 Gule̱l-le̱' be̱ xixre' schanni' na' tu zren nen bénnea' gunné̱' waláz chee̱ba', bénnea' bé̱nle̱'e̱ xel-la' waca zren lauba'. Ne̱ chee̱ xel-la' waca caní da be̱ne̱', benne' nigá guzí xe̱'e̱ benne' ca' belú'e̱ lataj guzriche luzrgue̱' laba', ne bulucá'ana szrene̱' bedau' chee̱ba'. Nadxa beleché̱'e̱ be̱ xixre' schanni' na', ne bénnea' gunné̱' waláz chee̱ba', na' belegu'e̱ le̱' zaj nabante̱' lu xi' chee̱ da dxuzézxele̱'e̱ na da dxe' ca tu nísadau'. 21 Nadxa Bénnea' zrie̱' bzrina' chiche be̱tie̱' benne' ca' xezícala nen xia nalá na' zua dxu'e, na' xúgute̱ bea ca' zaj zua xrila gulélajba' be̱la dxen chee̱ benne' ca'.