4
Ni nabaṉnäj guedxliuj
1 ¿Casiääd rebiejy, reyäḻrdxe'ch lo sa'ni ni casiajctu? ¿La direni jiääd xcuent lagajc xhigab ni yu' lastootu, ä? Lagajc rexhigabga rujn biejy neṉ lastootu, ruscäjyreni xcäriejntu.
2 La'tu rlajztu ga'ptu nani ditu ga'p, dxejcti rugu'ttu sa'tu. Rsiäblajztu xhixten sa'tu, luxh sa'csi digacdi xca'tuni, dxejc rucuanäjtu sa'tu, rdiḻnäjtu sa'tu. Ditu ga'p nani rlajztu sa'csi ditu guiniabni loj Dios.
3 Rniabtuni, niluxh dini guniidxnini sa'csi xhet laadi najc xhigabtu gunabtuni, alga gunabtuni sa'csi rlajztu gunijttuni si'cni rlajztu.
4 ¡Aii! Bejṉ ni di gandzu' Diostis. ¿La ditu gan bejṉ nani rlajz gun redzuun ni rujn rebeṉ guedxliuj, bejṉga rdxe'chreni lo Dios, ä? Ni'cni palga yu' chu tejtu ni rlajz chanuu lo ni rajc lo guedxliujre, bejṉga rdxe'ch lo Dios.
5 O ¿la rchalotu xlia'si caj lo xtidx Dios rediidxre: “Sprit ni baxhaḻ Dios te cuääzni neṉ lastoonu, randzu'ni nuurnu sa'csi rlajzni guinibeeni nuurnu”?
6 Niluxh runiidxru Dios xcäḻracnäjni loonu. Ni'cni rnii xtiidxni scree: “Dios rdxechnäj renani runnaro lagajc laareni, niluxh rudeedruni xcäḻracnäjni lo rebeṉnadolajz.”
7 Coḻjiu'pac lo xnezyuj Dios. Coḻsudzu'tzpac te di guntu ni rlajz beṉdxab, te guxuṉni lojtu.
8 Coḻguibigru lo Dios te guibigzani lojtu. Beṉdojḻ, coḻquiib ṉaatu, nalajznu na'cru guntu latsiaj; coḻgusia lastootu, la'tu ni runtio'p lajztu.
9 Sugacnaj lajztu, suchuti xliajs, coḻyonduxh. Coḻguchaa xcäḻruxijstu, coḻca' yäḻhuin, coḻguchaa xcäḻrbalajztu, coḻca' yäḻroon.
10 Coḻyajc si'c bejṉ ni xhetliidi sajc nez loj Dad Jesucrist, te laani guiliäsni la'tu gunni la'tu beṉro.
Na'c guiniyajtu sa'tu
11 Rebetzä, na'c guiniyajtu resa'tu. Sa'csi renani rniyaj sa'ni o rujnni yäḻguxhtis sa'ni, reni'c rniyaj xleii Dios, rujnreni yäḻguxhtis xleii Dios luxh palga guntu si'c, dirutu gac renani rusoob xtidx Dios, alga najctu juejz xten leii.
12 Tejtis najc nani runiidx leii loonu, tejtis najc juejz; najcni nani rajc rusḻaa bejṉ lo dojḻ, nani sajcza gunitloj bejṉ. La'tu, ¿chuxh najctu te guntu yäḻguxhtis lo sa'tu, ä?
Dinu gan xhi gac guixee
13 N̲aj coḻcuadiajg dee, la'tu ni rniitu, nadxej o guixee chonnu te guejdx nezrec. Ro'c guideednu tebijz te guiziinu, guito'nu te jiennu gaan meel.
14 Luxh nicla gantu xho gac xcäḻnabajṉtu guixee. Xcäḻnabajṉtu najc si'csi te za nani rieṉloj teṟa'tbäz, dxejcti rnitlojni.
15 Hueenru guiniitu scree: “Palga rlajz Dios sibaannu, te jiennu dee o dec.”
16 Niluxh si'c ni rujntu ṉaj, rajc guyalajztu rniitu didxro; luxh guiraa redidxroga najc dojḻ.
17 Ni'cni ni najn xho riäjl gunni, palga dini gun si'c, rujnni dojḻ.