2
Por xlaꞌy Dioz bylaa nó
1 Tzcaḻ, guhc laꞌd beeiy mînguty porni nehx bzobdiidz laꞌd Dioz no ptzoo laꞌd guîlquie;
2 bisnáḻ laꞌd ni nahcsy, mod-rtzoo meññ-nu lo guiedzylie-rieꞌ, no ptzoo laꞌd ni ne bêndzab ni rtzoo mdad gyre mbenahcsy, no rahc ni rnii me leññ xguîlmbahñ meññ-di rzobdiidz Dioz.
3 No ze güyuꞌ gyre nó tzcaḻ, ptzoo nó ni nahcsy yahc ni nehzy dihqy nó, no bzobdiidz nó guîlquie no guîlrieñ-nahcsy ni gulno nó lee. Leewe, xguîlné Dioz ni ziaad chehsh zrieñ, guhcu par nó zegahc tzcaḻ.
4 Per Dioz naꞌ, ndruhty nehx rioob meññ beeiy leeme, no xguîlndzi me xroꞌu no nó.
5 Nîcze guhc nó beeiy mînguty porni ptzoo nó guîlquie, per Dioz bdee me guîlmbañ-coby nó tohzy no Crist (por xlaꞌy Dioz bylaa laꞌd de lo guîlnadz).
6 Zidguiahcu beeiy ni bispahñ Dioz nó tohzy no Crist, no de ni gülahqy me nó gybaa tohzy no lee.
7 Dioz ptzoo me nirieꞌ lehdy dzé ni ziaad gluu me meññ mod-xroꞌ we xlaꞌy me, no mod-rahp me guîlmbañ-tziaawy no nó, porni nu nó no Crist Jesúz.
8 Ba bylaa laꞌd por xlaꞌy Dioz ni güluꞌ me leññ xguîlmbahñ laꞌd porni bylíladzy laꞌd Crist. No nirieꞌ naꞌ, dac‑e de laꞌd ziaadu, mazyg to ni biscady Dioz‑e leeu par laꞌd.
9 Nehx rdee meu por behch ni ntzoo mu, lehdy ndruhty nehx beeiy nguguia leegahc.
10 Dioz ptzoo me nó mod-ba nac nó; bdee me nó guîlmbañ-coby no nu nó no Crist Jesúz lehdy ctzoo nó ni mos, ni ba günii me ctzoo nó.
Ni gydzihñ meññ mos lo Dioz
11 Lâ guitsêlou laꞌd mod-güyuꞌ laꞌd tzcaḻ. Laꞌd‑e meññ-nehx meññ-Isṟael; leewe meññ-nu señ lady ni ne xmeññ Dioz lee, ra yâme laꞌd‑e meññ-nehx nu señ lady. Per de ni riuꞌ señ lady meññ la, nunzy xcuerp mu rtzeeu, no meññ gahc‑e rtzoou.
12 Tzcaḻ nehx nann laꞌd dxu we Crist, no rahc cuent ziht nu laꞌd de meññ-Isṟael, no meññ-diby lad‑e laꞌd no nehx nann laꞌd ni bdee Dioz xtiidz me ctzoo me no leeyâme. No tzcaḻ nu laꞌd lo guiedzylie-rieꞌ, per nehx nu ni mbiahz laꞌd lee, ni nehx nu laꞌd no Dioz.
13 Nîcze ba xtze ziht güyuꞌ laꞌd de Dioz, per naꞌ porni nu laꞌd no Crist Jesúz, ba gübigy laꞌd gahsh de Dioz por xrieñ Crist ni byxieꞌ dze-guhty me.
14 Porni Crist gahc‑e gucno me nó, nu nó dzie tziaawy de ni guhc nó chohp cuib, no ba ptzoo me nó tohzy guiedzy. No güloo me de ni nehx rwieꞌ dsaꞌ nó mos.
15 No por xguîlguhty me, güloo me de ni rquihñu ctzoo meññ ni ne xleiy Moiséz no ni rtzoou mdad, lehdy gyrop cuib ptzoo me lee tohzy no leeme; no mod-wé ptzoo me de ni nu yâme dzie tziaawy.
16 No mod-wé, por xguîlguhty me lo cruzy, ptzoo me gyrop cuib meññ tohzy guiedzy no bistzihñ me lee mos lo Dioz; mod-wé güloo me de ni néladzy saꞌ yâme.
17 Crist biahd me, bidgyuno me didz-mos laꞌd de ni tzu laꞌd dzie tziaawy, laꞌd ni güyuꞌ ziht de Dioz. No mod-wé gahc bidgyuno meu noꞌ ni ba nu gahsh tzcaḻ.
18 No por Crist gyre nó, bâḻ nac nó meññ-Isṟael o bâḻ nehx nac nó meññ-Isṟael, beeiy gydzihñ nó lo dTad nó Dioz por Spirt-Sant gahc ni cuaꞌ nó.
19 No leewe, ba nehx zidguiahc laꞌd beeiy mbiuhz ni meññ-zrieñ lad, mazyg ba tohzy guiedzy‑e laꞌd no xmeññ Dioz, no ba xfamily Dioz‑e laꞌd.
20 Zidguiahc laꞌd beeiy to yuꞌ, no nieꞌu, wé we apóstl yahc no profet. No guie ni nash squiñp ru raa guie ni ma rquihñ lehdy tzaa yuꞌ zaꞌgndzi, wé we Crist Jesúz.
21 Crist gahc‑e gayacno laꞌd ni zidguiahc beeiy yu-rieꞌ, leewe ganiꞌzyu lehdy gacu to idoo nunzy par Crist ni rtzoo mdad.
22 No porni nu laꞌd no Crist, zegahc zidguiahc laꞌd beeiy to yuꞌ tohzy no gyre zrieñ xmeññ Crist, lehdy gac gyre nó beeiy tohzy ru nu Dioz por xiSpirt me.