2
Guîltziahl ni guhc guiedzy-Caná
1 Ni bionn dzé guhc guîltziahl to guiedzy ni le Caná ni nu lo ṟegioṉ-Galilea, no xmam Jesúz zu me uga ru gayahc guîltziahl.
2 Zegahc psieññ yâme Jesúz no xmeññ, no güya yâme lo guîltziahl.
3 Hor-ba byre vin, ra xmam Jesúz leeme:
―Ba byre vin ni rahp yâme.
4 Ra Jesúz leeme:
―Mam, ¿bia nacu gayahbyiꞌu naa? Dgueññ ziaꞌ gydzihñ dzé ni ctzon ni ba nac diidz.
5 Were ra xmam me meññ-gayacno yahc:
―Lâ ctzoo nitisy ga me laꞌd.
6 Zu shoꞌb guiuhs uga ni güyaa de guie ni riuꞌ nzeꞌ leññ, ni rquihñ meññ-Isṟael lee par gacnyar yâme lehdy guiaꞌn yâme nye lo Dioz mod-rtzoo gahc yâme xtâ ba xtze diaa; no to to guiuhs riuꞌ beeiy ochent o diby gayuu litr nzeꞌ leññu.
7 Ra Jesúz meññ-gayacno yahc:
―Lâ guistzee guius-wé yahc no nzeꞌ.
Were bistzee yâme leeyahcu.
8 Luxu ra Jesúz leeyâme:
―Lâ gboo doozyu, lâ tziyno ycaꞌ meññ-nu xcargü lni.
No ze ptzoo yâme.
9 Meññ-nu xcargü lni güee doozy nze-rieꞌ ni ba guhc vin, no nehx nann me bá byruuw; nunzy mós ni gayacno nann bá byruuw, porni leeyâme güloou leññ guiuhs. Were meññ-nu xcargü lni pquee me riedz ñoby-gayidzña,
10 ra me lee:
―To lo lni gyre meññ nier vin-ma mos rdee yâme roo meññ, no hor-ba güee yâme xtahl, were ba rdee yâme vin-nehx byruqueꞌ mos. No lii naꞌ, gülutziaawyiꞌ vin-ma mos xtâ hôrrieꞌ.
11 Nirieꞌ ni ptzoo Jesúz guiedzy-Caná lo ṟegioṉ-Galilea, wé we ni ngann ni nier lee ptzoo me, no wé guzlo rwieꞌ meññ xroꞌ ni rtzoo me; no xmeññ me bylíladzy yâme leeme.
12 Bylux nirieꞌ za Jesúz guiedzy ni le Capernaum no xmam me, no meññ-behtzy me, no zrieñ xmeññ me; no güyuꞌ yâme uga doozy dzé.
Güya Jesúz idoró
(Mt. 21:12-13; Mr. 11:15-18; Lc. 19:45-46)
13 Ba zidgahsh lni-Pascü ni rtzoo meññ-Isṟael, leewe Jesúz güya me Jerusaléṉ.
14 No leññ idoró, bwieꞌ me meññ ni gatoꞌ bueiy, xiily, no ximbue, no meññ-dxie yahc ruꞌ miax ni gatzee xmedy meññ.
15 Were cuaꞌ me duu, psiuꞌg meu no gachaḻ meu, güloo me gyre meññ-caḻ yahc stziuꞌ de idoró no xshiily yâme no xbueiy yâme; no meññ-rtzee yahc medy, pchaꞌdz me xmedy yâme zegahc, no ptiꞌx me xmiax yahc yâme.
16 No ra me meññ ni gatoꞌ ximbue:
―¡Lâ gboo gyre nirieꞌ neꞌ! ¡Di ctzoo laꞌd xiryuꞌ dTadaꞌ to yu-lóguiaꞌ!
17 Were bitsêlou xmeññ me ni rnii lo Guehtzy ru queꞌ xtiidz Dioz, ru neu: “Tant racdadzyaꞌ gacnda xiryuꞌy, lé zidguiahcu beeiy gue ni rdzuu dguîlmbahñaꞌ.”
18 Ra meññ-Isṟael leeme ni rtzoo mdad:
―¿Bia ni ngann ctzooy lehdy gann noꞌ dxu naquiꞌ ctzooy gyre nirieꞌ?
19 Ra Jesúz leeyâme:
―Lâ iguiñguie idoro-rieꞌ, no leññ tzonn dzé ba bzan leeu sto.
20 Were ra yâme leeme:
―Cuarentayseiz ihz guhc dziiñ par biahs ido-rieꞌ. ¿No lii neꞌy leññ tzonn dzé ba bzaay leeu sto la?
21 Per idoo de ni ganii Jesúz naꞌ, de xcuerp gahcme we ganii me.
22 No leewe, dze-gübahñ me de lahd mînguty, xmeññ me bitsêlou leeyâme nirieꞌ ni günii me, no bylíladzy yâme ni rnii lo Guehtzy ru queꞌ xtiidz Dioz, no zegahc bylíladzy yâme ni günii Jesúz.
Jesúz rzaclo me ni nac gyre meññ
23 Ru nu Jesúz Jerusaléṉ lo lni-Pascü ni rtzoo meññ-Isṟael, xtahl meññ bylíladzy leeme porni bwieꞌ yâme gatzoo me xtahl ni ngann.
24 Per Jesúz rqueꞌladzy leeyâme, porni rzaclo me ni nac gyre meññ.
25 No nehx rbiahz me ña ndruhty leeme ni nac cad to meññ, porni nann me ni nu leññ xguîlmbahñ meññ.